ஐசிசி மகளிர் டி20 உலகக் கோப்பை தொடரில் அபாரமான ஆட்டத்தை வெளிப்படுத்தி வரும் இந்திய இளம் சுழற்பந்துவீச்சாளர் ஸ்ரீ சரணி, சமீபத்திய ஐசிசி மகளிர் டி20 பந்துவீச்சாளர் தரவரிசையில் முதலிடத்தை பிடித்துள்ளார்.
ஏற்கனவே முதலிடத்தில் இருந்த இங்கிலாந்து சுழற்பந்துவீச்சாளர் லின்சி ஸ்மித்-ஐ பின்னுக்குத் தள்ளி முதலிடத்தை ஸ்ரீசரணி கைப்பற்றியுள்ளார். இவர் நடப்பு உலகக் கோப்பை தொடரில் இதுவரை அதிக விக்கெட்டுகள் வீழ்த்திய வீராங்கனையாக திகழ்கிறார். அவர் மூன்று போட்டிகளில் 10 விக்கெட்டுகளை கைப்பற்றி அசத்தி வருகிறார்.
21 வயதான ஸ்ரீ சரணி, சர்வதேச கிரிக்கெட்டில் அறிமுகமாகி ஒரு ஆண்டே ஆன நிலையில், நெதர்லாந்துக்கு எதிராக லீட்ஸில் நடைபெற்ற போட்டியில் 4 விக்கெட்டுகள் வீழ்த்தியதுடன், மான்செஸ்டரில் தென்னாப்பிரிக்காவுக்கு எதிரான போட்டியில் மேலும் 3 விக்கெட்டுகளை கைப்பற்றினார். இந்த சிறப்பான செயல்பாடே அவரை உலகின் நம்பர் 1 டி20 பந்துவீச்சாளராக உயர்த்தியுள்ளது.
முன்னாள் முதலிட வீராங்கனையான லின்சி ஸ்மித், உலகக் கோப்பை தொடரில் எதிர்பார்த்த அளவுக்கு செயல்படாததால் மூன்றாவது இடத்திற்கு சரிந்துள்ளார். அவரது இங்கிலாந்து அணித்தோழி சார்லி டீன், மூன்று போட்டிகளில் 5 விக்கெட்டுகள் வீழ்த்தியதன் மூலம் இரண்டாவது இடத்திற்கு முன்னேறியுள்ளார்.
பேட்டிங் தரவரிசை
மகளிர் டி20 பேட்டிங் தரவரிசையில் ஆஸ்திரேலிய தொடக்க வீராங்கனை ஜார்ஜியா வோல் முதலிடத்தைத் தக்க வைத்துள்ளார். உலகக் கோப்பை தொடரில் மூன்று இன்னிங்ஸ்களில் 62 ரன்கள் மட்டுமே எடுத்திருந்தாலும், அவர் முதலிடத்தில் தொடர்கிறார்.
அவரைத் தொடர்ந்து அவரது அணித்தோழி பெத் மூனி இரண்டாவது இடத்தில் உள்ளார். இந்திய வீராங்கனைகள் ஷெஃபாலி வர்மா ஆறாவது இடத்திற்கும், ஹர்மன்பிரீத் கவுர் 10வது இடத்திற்கும் முன்னேறியுள்ளனர்.
ஆல்ரவுண்டர் தரவரிசை
மகளிர் டி20 ஆல்ரவுண்டர் தரவரிசையில் ஹேலி மேத்யூஸ் தொடர்ந்து முதலிடத்தில் உள்ளார். அவருக்கு அடுத்ததாக நியூசிலாந்தின் மெலி கெர் இரண்டாவது இடத்தில் உள்ளார்.
இலங்கை கேப்டன் சமரி அதபத்து, அயர்லாந்தின் ஓர்லா பிரெண்டர்காஸ்ட், பாகிஸ்தான் கேப்டன் பாத்திமா சனா ஆகியோர் முதல் 10 இடங்களுக்குள் முன்னேறியுள்ளனர். தென்னாப்பிரிக்காவின் மரிசான் காப், இந்தியாவுக்கு எதிரான போட்டியில் ஆட்டநாயகி விருது வென்றதன் பலனாக ஐந்து இடங்கள் முன்னேறி ஒன்பதாவது இடத்தை பிடித்துள்ளார்.
