உலகளவில் பல கோடி மக்களால் பயன்படுத்தப்படும் முன்னணி குறுஞ்செய்தி செயலியான வாட்ஸ்அப், ஆண்ட்ராய்டு பயனர்களின் பயன்பாட்டை மேலும் எளிதாக்கும் வகையில் இரண்டு புதிய முக்கிய அப்டேட்களைச் சோதித்து வருகிறது. ஃபேஸ்புக் மற்றும் இன்ஸ்டாகிராமில் இருப்பது போன்ற ‘கிரீன் ஆன்லைன் இண்டிகேட்டர்’ (Green Online Indicator) மற்றும் மேம்படுத்தப்பட்ட ‘பேக்கப் மேனேஜ்மென்ட்’ (Backup Management) ஆகிய வசதிகளை கொண்டுவர சோதிக்கப்பட்டு வருகிறது,
தற்போது நாம் ஒருவருடன் சாட் செய்யும் போது மட்டுமே அவர் ஆன்லைனில் இருக்கிறாரா என்பது தெரியவரும். ஆனால், இனி ஒரு பயனர் வாட்ஸ்அப் செயலியில் ஆக்டிவாகஇருந்தால், அவரது சுயவிவரப் படத்தின் அருகில் சிறிய பச்சை நிறப் புள்ளி தோன்றும்.
இந்த வசதி தற்போது ஆண்ட்ராய்டு பீட்டா (Android Beta version 2.26.24.5) பதிப்பில் சோதிக்கப்பட்டு வருகிறது. ஃபேஸ்புக் மெசஞ்சர் மற்றும் இன்ஸ்டாகிராமில் ஏற்கனவே இருக்கும் இந்த வசதி, இனி வாட்ஸ்அப்பிலும் வரவுள்ளது. இதனால் ஒருவருக்கு மெசேஜ் அனுப்பும் முன்பே அவர் ஆன்லைனில் இருக்கிறாரா என்பதை எளிதாக அறிய முடியும்.
பயனர்களின் பிரைவசி அமைப்புகளுக்கு ஏற்பவே இந்த கிரீன் டாட் செயல்படும் என்பதால், ஆன்லைன் ஸ்டேட்டஸை மறைத்து வைப்பவர்களுக்குப் பாதிப்பு இருக்காது. எதிர்காலத்தில், சாட்டின் உள்ளே இருக்கும் “Online” என்ற எழுத்து வடிவத்திற்குப் பதிலாக இந்த பச்சை புள்ளி மட்டுமே பயன்படுத்தப்பட வாய்ப்புள்ளது.
வாட்ஸ்அப் பயனர் தரவுகளைச் சேமிப்பதில் உள்ள சிரமங்களைக் குறைக்க, ஒரு பிரத்யேக பேக்கப் மேனேஜ்மென்ட் பகுதியை உருவாக்கி வருகிறது. இதன் மூலம் பயனர்கள் தங்களின் தற்போதைய பேக்கப் நிலையைச் சரிபார்க்கலாம். தேவையில்லாத பழைய கோப்புகளை (Unused files) நீக்கலாம். தேவைப்பட்டால் பேக்கப் கோப்புகளின் நகல்களை உருவாக்கிக் கொள்ளவும் முடியும். இது மொபைல் ஸ்டோரேஜை திறம்பட நிர்வகிக்க உதவும்.
ஆண்ட்ராய்டு பயனர்களின் வசதிக்காக கூகுள் நிறுவனமும் வாட்ஸ்அப்புடன் இணைந்து இதில் செயல்பட்டு வருகிறது. கூகுள் பிளே சர்வீசஸ் (Google Play Services version 26.23) அப்டேட் மூலம், பயனர்கள் தங்கள் மொபைலின் செட்டிங்ஸ் பக்கத்திலிருந்தே நேரடியாக வாட்ஸ்அப் பேக்கப் ஆப்ஷன்களை அணுக முடியும். கூகுள் டிரைவ் வழியாக பேக்கப்களை நிர்வகிப்பதும், ஸ்டோரேஜ் கட்டுப்பாடுகளை மாற்றுவதும் இதன் மூலம் மிகவும் எளிதாகப் போகிறது.
இந்தியாவில் எப்போது கிடைக்கும்?
இந்த அம்சங்கள் அனைத்தும் தற்போது சோதனைக் கட்டத்திலும், உருவாக்க நிலையிலும் உள்ளதால், பொதுப் பயனர்களுக்கு இன்னும் முழுமையாகக் கிடைக்கவில்லை. எனினும், சோதனைகள் முடிவடைந்தவுடன் விரைவில் இந்தியப் பயனர்கள் உள்ளிட்ட அனைவருக்கும் இந்த புதிய அப்டேட்கள் அதிகாரப்பூர்வமாக வெளியாகும் என எதிர்பார்க்கப்படுகிறது.
