மக்கள் நீதி மய்யம் தலைவரும், மாநிலங்களவை உறுப்பினருமான நடிகர் கமல்ஹாசன், சமீபத்திய தேர்வு முறைகேடு போராட்டங்கள் தொடர்பாக எக்ஸ் தளத்தில் முக்கியப் பதிவொன்றை வெளியிட்டுள்ளார். மோதலுக்கு பதிலாக உரையாடல் நடைபெறுவதைக் கண்டு மகிழ்ச்சி அடைவதாகக் குறிப்பிட்ட அவர், கருத்து வேறுபாடுகளைத் தீர்க்க உரையாடல் அவசியம் என்றும், இதுவே ஜனநாயகத்தின் உண்மையான செயல்வடிவம் என்றும் வலியுறுத்தினார்.
“பெல்லட் துப்பாக்கிகள், மின் அதிர்ச்சித் தடியடிகள் மற்றும் ஆணிகள் பதிக்கப்பட்ட தடிகளுக்கு காந்தியின் மண்ணில் இடமில்லை” எனக் கூறிய கமல்ஹாசன், பாதுகாப்புப் படையினர் மற்றும் பொதுச் சொத்துக்கள் மீதான தாக்குதல்களும் நேர்மையான விசாரணைக்கு உள்ளாக்கப்பட வேண்டும் என்றார். பொறுப்புக்கூறல் எந்தப் பாரபட்சமும் இன்றி இருக்க வேண்டும் என்றும், தற்போதைய தருணம் வெறும் தாள் கசிவு பிரச்னையைத் தாண்டியது என்றும் சுட்டிக்காட்டினார்.
மேலும், தேர்வுகள் மீதான மக்களின் நம்பிக்கையை மீட்டெடுக்கவும், மாணவர்களுக்கு ஏற்படும் கல்வி சார்ந்த மன அழுத்தத்தைக் குறைக்கவும், கல்வி முறையை நவீனமயமாக்கவும் ஒரு தேசிய கல்வி மற்றும் தேர்வு சீர்திருத்த ஆணையத்தை அமைக்க வேண்டும் என்று வலியுறுத்தினார். இந்த ஆணையம் மூன்று மாத கால அவகாசத்தில் செயல் திட்டத்தை வகுத்து அமல்படுத்த வேண்டும் என்றார். தமிழ்நாட்டின் முன்னோடி குரலாக, NEET தேர்வு அழுத்தத்தால் உயிரிழந்த மாணவி அனிதாவின் மரணத்தைச் சுட்டிக்காட்டிய கமல்ஹாசன், அந்த ஆணையம் தமிழ்நாட்டின் குரலையும் கேட்க வேண்டும் என்று வலியுறுத்தினார்.
அரசு இதில் காட்டும் விருப்பத்தை வரவேற்ற அவர், உரையாடல் நீடித்த சீர்திருத்தங்களுக்கு வழிவகுக்க வேண்டும் என்றார். “முன்னால் உள்ள பாதை நீண்டது, ஆனால் இந்தியர்கள் அதை ஒன்றாகக் கடக்க வேண்டும்” எனக் குறிப்பிட்டார். கல்வித் துறையில் தொடர் சீர்திருத்தங்கள், மாணவர்களின் எதிர்காலம் மற்றும் தேசிய ஒற்றுமை ஆகியவற்றை வலியுறுத்தும் கமல்ஹாசனின் இந்தப் பதிவு, தற்போதைய போராட்டச் சூழலில் முக்கியத்துவம் பெறுகிறது.
