நெல்லையப்பர் கோவில் ஆனித் தேரோட்டம்..!! இதெல்லாம் பயன்படுத்த தடை..!! கமிஷனர் வார்னிங்..!!

தேரோட்ட திருவிழாவின்போது 1,200-க்கும் மேற்பட்ட போலீசார் பாதுகாப்பு பணியில் ஈடுபட உள்ளனர்.

நெல்லை: வரலாற்றுப் புகழ் பெற்ற நெல்லையப்பர் காந்திமதியம்மாள் கோவிலின் ஆனிப்பெருந்தேர் திருவிழா வரும் ஜூன் 28-ம் தேதி ஞாயிற்றுக்கிழமை வெகு விமரிசையாக நடைபெறவுள்ளது. லட்சக்கணக்கான பக்தர்கள் கலந்துகொள்ளும் இந்தப் பெருந்திருவிழாவை அமைதியான முறையில் நடத்துவதற்காக மாவட்ட நிர்வாகம் பல்வேறு பாதுகாப்பு ஏற்பாடுகளை மேற்கொண்டு வருகிறது.

நெல்லை கமிஷனர் தேஷ்முக் சேகர் சஞ்சய் இன்று தேரோட்டப் பாதையில் பாதுகாப்பு ஏற்பாடுகளை நேரில் ஆய்வு செய்தார். ஆய்வுக்குப் பின்னர் செய்தியாளர்களிடம் பேசிய அவர், திருவிழாவின்போது சட்டம் ஒழுங்கைப் பேணும் வகையில் கடும் நடவடிக்கைகள் எடுக்கப்படும் என எச்சரித்தார். “தேர் திருவிழாவில் 1,200க்கும் மேற்பட்ட போலீசார் பாதுகாப்புப் பணியில் ஈடுபட உள்ளனர். திருவிழா நடைபெறும் பகுதியில் போக்குவரத்து மாற்றம், கூட்ட நிர்வாகம் உள்ளிட்ட அனைத்து ஏற்பாடுகளும் திட்டமிட்டபடி செய்யப்பட்டுள்ளன.

முக்கியமாக, சாதி ரீதியான கொடிகள், சின்னங்கள், டி-சர்ட்கள், கயிறுகள் உள்ளிட்ட எந்தவிதமான அடையாளங்களையும் பயன்படுத்த முழுமையான தடை விதிக்கப்பட்டுள்ளது” என்று கமிஷனர் தெரிவித்தார். ஏற்கனவே சமூக ஊடகங்களில் சாதி ரீதியான பதிவுகளை வெளியிட்ட இரு சம்பவங்களில் நெல்லை டவுண் காவல் நிலையத்தில் வழக்குகள் பதிவு செய்யப்பட்டுள்ளன. இத்தகைய செயல்கள் திருவிழா அமைதியைப் பாதிக்கும் என்பதால், எந்தவிதமான சாதி அடையாளங்களும் அனுமதிக்கப்படாது என்று திட்டவட்டமாகக் கூறினார்.

இந்த உத்தரவை மீறுபவர்கள் மீது சட்டப்படி கடுமையான நடவடிக்கை எடுக்கப்படும் என எச்சரித்தார். நெல்லையப்பர் கோவில் தமிழகத்தின் பழமை வாய்ந்த கோவில்களில் ஒன்றாகும். ஆண்டுதோறும் நடைபெறும் ஆனிப்பெருந்தேர் திருவிழா பக்தர்களிடையே மிகுந்த எதிர்பார்ப்பை ஏற்படுத்தியுள்ளது. தேர் இழுக்கும் போது பாதுகாப்பு, மருத்துவ உதவி, தண்ணீர் வசதி உள்ளிட்ட அடிப்படைத் தேவைகளை உறுதி செய்ய மாவட்ட நிர்வாகம் தீவிரம் காட்டி வருகிறது. தீயணைப்பு வாகனங்கள், ஆம்புலன்ஸ் வாகனங்கள் உள்ளிட்ட அவசர உதவி ஊர்திகள் தயார் நிலையில் வைக்கப்படும்.

மேலும், திருவிழாவை முன்னிட்டு நெல்லை டவுண் பகுதியில் போக்குவரத்து மாற்றங்கள் செய்யப்பட்டுள்ளன. பக்தர்கள் ஒழுங்காக வரிசையில் நின்று தரிசனம் செய்ய ஏற்பாடுகள் செய்யப்பட்டுள்ளதாக அதிகாரிகள் தெரிவித்தனர். திருவிழா அமைதியாகவும், பக்தி சார்ந்த சூழலிலும் நடைபெறுவதை உறுதி செய்ய அனைத்துத் தரப்பினரும் ஒத்துழைப்பு தர வேண்டும் என கமிஷனர் வேண்டுகோள் விடுத்தார்.

இந்தத் திருவிழா வெற்றிகரமாக நடைபெறுவதற்கு மாவட்டக் காவல் துறை, வருவாய்த் துறை, உள்ளாட்சி அமைப்புகள் உள்ளிட்ட பல்வேறு துறைகள் இணைந்து செயல்பட்டு வருகின்றன. பக்தர்கள் பாதுகாப்புடன் திருவிழாவில் கலந்துகொள்ளவும், சாதி, மத பேதமின்றி ஒற்றுமையுடன் இருக்கவும் அனைவரும் ஒத்துழைக்க வேண்டும் என மாவட்ட நிர்வாகம் வலியுறுத்தியுள்ளது.