பீகார் மாநிலத்தின் பாட்னா மாவட்டத்தில் அமைந்துள்ள பங்கிபூர் சட்டமன்றத் தொகுதிக்கான இடைத்தேர்தல் வாக்கு எண்ணிக்கை ஆகஸ்ட் 3ஆம் தேதி காலை முதல் தீவிரமாக நடைபெற்று வருகிறது. ஜூலை 30 அன்று நடைபெற்ற வாக்குப்பதிவில் சுமார் 34 சதவீத வாக்காளர்கள் மட்டுமே பங்கேற்றனர். இது முந்தைய சட்டமன்றத் தேர்தலை விட குறைவானது.
பாஜக தேசியத் தலைவர் நிதின் நபின் மாநிலங்களவை உறுப்பினராகத் தேர்ந்தெடுக்கப்பட்டதைத் தொடர்ந்து தனது சட்டமன்ற உறுப்பினர் பதவியை ராஜினாமா செய்ததால் இந்த தொகுதி காலியானது. 2010ஆம் ஆண்டு தொகுதி மறுசீரமைப்புக்குப் பிறகு நடைபெற்ற அனைத்து சட்டமன்றத் தேர்தல்களிலும் பாஜகவே வெற்றி பெற்று வந்த கோட்டையாக இத்தொகுதி கருதப்படுகிறது. நிதின் நபின் தொடர்ந்து ஐந்து முறை இங்கு வெற்றி பெற்றிருந்தார்.
இந்த இடைத்தேர்தலில் ஜன் சூரஜ் கட்சியின் நிறுவனர் பிரசாந்த் கிஷோர் முதல் முறையாக தேர்தல் களத்தில் இறங்கியுள்ளார். முன்னாள் தேர்தல் வியூக வகுப்பாளரான இவர், கடந்த ஆண்டு பீகார் சட்டமன்றத் தேர்தலில் தனது கட்சியை அறிமுகப்படுத்தினார். அப்போது 238 தொகுதிகளில் போட்டியிட்டும் ஒரு இடத்திலும் வெற்றி பெற முடியவில்லை. பெரும்பாலான தொகுதிகளில் டெபாசிட் தொகையை இழந்தார். அந்த பின்னணியில் இப்போது பாஜகவின் பலமான தொகுதியில் சவால் விடுத்துள்ளார்.
மதியம் 1 மணி நிலவரப்படி 12 சுற்று வாக்கு எண்ணிக்கை முடிவடைந்த நிலையில், பிரசாந்த் கிஷோர் 23,756 வாக்குகளுடன் முன்னிலையில் உள்ளார். பாஜக வேட்பாளர் நீரஜ் குமார் சின்ஹா 17,110 வாக்குகளுடன் இரண்டாமிடத்திலும், ஆர்ஜேடி வேட்பாளர் ரேகா குப்தா (ரேகா குமாரி) 4,850 வாக்குகளுடன் மூன்றாமிடத்திலும் இருக்கின்றனர். மொத்தம் 31 சுற்றுகளாக எண்ணப்படவுள்ள வாக்குகளில் இன்னும் பல சுற்றுகள் மீதமுள்ளன.
மாலை 4 மணிக்குள் முழுமையான முடிவுகள் வெளியாகும் என எதிர்பார்க்கப்படுகிறது. பாஜகவின் பாரம்பரிய பலப்பகுதி எனக் கருதப்பட்ட இத்தொகுதியில் பிரசாந்த் கிஷோர் தொடர்ந்து முன்னிலை வகித்து வருவது அரசியல் வட்டாரங்களில் பெரும் பரபரப்பை ஏற்படுத்தியுள்ளது. இவரது வெற்றி அல்லது தோல்வி, பீகார் அரசியலில் ஜன் சூரஜ் கட்சியின் எதிர்காலப் போக்கையும், பாஜகவின் கோட்டையில் ஏற்பட்டுள்ள மாற்றத்தையும் சுட்டிக்காட்டும் முக்கிய நிகழ்வாகக் கருதப்படுகிறது.
