தவெக தலைமையிலான தமிழ்நாடு அரசின் அமைச்சரவை பதவியேற்றதைத் தொடர்ந்து, தற்போது அமைச்சர்களின் அதிகாரப்பூர்வ மூப்பு நிலைப் பட்டியல் (Seniority List) வெளியிடப்பட்டுள்ளது.
தமிழகத்தில் அண்மையில் நடைபெற்ற சட்டமன்றத் தேர்தலில் வரலாற்றுச் சிறப்புமிக்க வெற்றியைப் பெற்று, தமிழக வெற்றிக் கழகத்தின் (தவெக) அக்கட்சியின் தலைவர் விஜய் தலைமையில் புதிய அரசு பொறுப்பேற்றது. மே 10ம் தேதி நடைபெற்ற பதவியேற்பு விழாவில் முதலமைச்சராக விஜய் பொறுப்பேற்றார். என்.ஆனந்த், ஆதவ் அர்ஜூனா, அருண்ராஜ், செங்கோட்டையன் என மேலும் 9 பேர் அமைச்சர்களாக பதவியேற்றனர்.
இதையடுத்து மே 21ம் தேதி நடைபெற்ற அமைச்சரவை விரிவாக்கத்தின்போது 23 பேர் அமைச்சர்களாக பதவியேற்றனர். ஆட்சி அமைக்க ஆதரவு தந்த காங்கிரஸ், ஐயூஎம்எல் மற்றும் விடுதலைச் சிறுத்தைகள் கட்சிக்கு அமைச்சரவை இடம் வழங்கப்பட்டது. காங்கிரசுக்கு 2, ஐயூஎம்எல் மற்றும் விசிக-வுக்கு தலா ஒரு இடங்கள் அமைச்சரவையில் தரப்பட்டன. ஆக மொத்தம் தவெக அமைச்சரவையின் மொத்த அமைச்சர்களின் எண்ணிக்கை 33ஆக உயர்ந்தது.
இந்தநிலையில், தமிழ்நாடு அமைச்சர்களின் அதிகாரப்பூர்வ மூப்பு நிலைப் பட்டியல் (Seniority List) வெளியிடப்பட்டுள்ளது. அதன்படி, முதலமைச்சர் விஜய் – அமைச்சரவையின் தலைவர் (முதலிடம்), நீர்வளத்துறை அமைச்சர் என். ஆனந்த் 2ம் இடம், விளையாட்டு, இளைஞர் நலத்துறை அமைச்சர் ஆதவ் அர்ஜூனாவுக்கு 3ம் இடம் வழங்கப்பட்டுள்ளது. வருவாய் மற்றும் பேரிடர் மேலாண்மைத்துறை அமைச்சர் செங்கோட்டையனுக்கு 5-வது இடம் வழங்கப்பட்டுள்ளது.
ஆட்சி அமைக்க ஆதரவு தந்த காங்கிரசை சேர்ந்த உயர்கல்வித்துறை அமைச்சர் விஸ்வநாதன் 11-வது இடம், சுற்றுலாத்துறை அமைச்சர் ராஜேஷ்குமார் 12-வது இடம், IUML-ஐ சேர்ந்த பிற்படுத்தப்பட்டோர், சிறுபான்மையினர் நலத்துறை அமைச்சர் ஷாஜகான் 13-வது இடம், விடுதலைச் சிறுத்தைகள் கட்சியை சேர்ந்த சமூக நலத்துறை அமைச்சர் வன்னிய அரசு 14-வது இடம் வழங்கப்பட்டுள்ளது.
