ஈரானுக்கு எதிராக மீண்டும் விரிவான ராணுவ தாக்குதலை நடத்துவது குறித்து அமெரிக்க அதிபர் டொனால்ட் டிரம்ப் உயர்மட்ட ஆலோசனைகளை மேற்கொண்டிருந்தாலும், தற்போதைக்கு ராணுவ நடவடிக்கையை விட தூதரக பேச்சுவார்த்தையைத் தொடர முடிவு செய்துள்ளதாக வால் ஸ்ட்ரீட் ஜர்னல் வெளியிட்டுள்ள செய்தியில் தெரிவிக்கப்பட்டுள்ளது.
அந்த அறிக்கையின்படி, அமெரிக்க பாதுகாப்புத் துறை அமைச்சர் பீட் ஹெக்செத் மற்றும் கூட்டுப் படைத்தளபதிகளின் தலைவர் ஜெனரல் டேன் கேய்ன் ஆகியோருடன் டிரம்ப் பல சுற்று ஆலோசனைகளை நடத்தினார். இதில், ஈரானுடனான அணு ஆயுத பேச்சுவார்த்தையை கைவிட்டு மீண்டும் முழுமையான ராணுவ நடவடிக்கைக்கு திரும்ப வேண்டுமா என்பது குறித்து விவாதிக்கப்பட்டதாக கூறப்படுகிறது.
ஈரானின் அணு ஆயுத திட்டத்தை முற்றிலும் முடிவுக்கு கொண்டுவரும் நோக்கில் “வேலையை முழுமையாக முடிக்க வேண்டுமா?” என்ற கேள்வியும் இந்த ஆலோசனைகளில் முக்கியமாக பேசப்பட்டதாக தகவல்கள் தெரிவிக்கின்றன.
ஆனால், தற்போதைய சூழலில் மீண்டும் ராணுவ நடவடிக்கை மேற்கொண்டால் நடைபெற்று வரும் பேச்சுவார்த்தைகள் பாதிக்கப்படலாம் என்றும், இறுதி அணு ஒப்பந்தம் எட்டும் வாய்ப்பும் குறையக்கூடும் என்றும் டிரம்ப் கருதுவதாக அதிகாரிகள் தெரிவித்துள்ளனர்.
மேலும், அணு ஒப்பந்தத்தை எட்டுவதற்காக நிர்ணயிக்கப்பட்டுள்ள ஆகஸ்ட் 18 காலக்கெடுவையும் தாண்டி பேச்சுவார்த்தையை நீட்டிக்க டிரம்ப் தயாராக இருப்பதாகவும் கூறப்படுகிறது. இருப்பினும், தற்போதுள்ள புரிந்துணர்வு ஒப்பந்தத்தை ஈரான் மீறினால், வரையறுக்கப்பட்ட பதிலடி தாக்குதல்களுக்கு அவர் ஆதரவு அளிப்பார் என்றும் தகவல் வெளியாகியுள்ளது.
இதற்கிடையில், அமெரிக்காவின் மத்திய கிழக்கு சிறப்பு தூதர்கள் ஸ்டீவ் விட்காஃப் மற்றும் ஜாரெட் குஷ்னர் ஆகியோர் கத்தார் தலைநகர் தோஹாவில் நடைபெறும் மறைமுக பேச்சுவார்த்தையில் பங்கேற்க சென்றுள்ளனர். கத்தார் நடுவர் முயற்சியின் மூலம் ஈரான் பிரதிநிதிகளுடன் இந்த பேச்சுவார்த்தை நடைபெற்று வருகிறது.
எனினும், ஹோர்முஸ் நீரிணை வழியாக செல்லும் கப்பல்களிடம் சேவைக் கட்டணம் வசூலிக்க வேண்டும் என்ற ஈரானின் கோரிக்கை மற்றும் அதன் அணு திட்டத்திற்கு விதிக்கப்படும் கட்டுப்பாடுகள் உள்ளிட்ட முக்கிய விவகாரங்களில் இரு தரப்புக்கும் இடையே இன்னும் கருத்து வேறுபாடுகள் நீடித்து வருகின்றன.
இதற்கிடையில், தூதரக பேச்சுவார்த்தை தோல்வியடைந்தால் மேற்கொள்ள வேண்டிய ராணுவ நடவடிக்கைகள் குறித்த பல்வேறு திட்டங்களை அமெரிக்க பாதுகாப்புத் துறை தொடர்ந்து டிரம்பிடம் சமர்ப்பித்து வருவதாகவும் தகவல்கள் தெரிவிக்கின்றன.
மறுபுறம், சமீபத்திய பதற்றத்தைத் தொடர்ந்து மத்திய கிழக்கிற்கு வந்துள்ள அமெரிக்க உயர் மட்ட தூதர்களை சந்திக்க எந்தத் திட்டமும் இல்லை என்று ஈரான் செவ்வாய்க்கிழமை அறிவித்துள்ளது. இதனால் இரு நாடுகளுக்கும் இடையே நீடித்த அமைதி ஏற்படும் வாய்ப்பில் மீண்டும் சந்தேகம் எழுந்துள்ளது.
