பிரதமர் நரேந்திர மோடி தலைமையில் நடைபெற்ற மத்திய அமைச்சரவைக் கூட்டத்தில், இந்தியாவின் உள்கட்டமைப்பு மற்றும் உற்பத்தித் துறையை உலகத் தரத்திற்கு உயர்த்தும் வகையில் ₹2.19 லட்சம் கோடி மதிப்பிலான 7 முக்கிய மெகா திட்டங்களுக்கு ஒப்புதல் அளிக்கப்பட்டுள்ளது.
டெல்லியில் நடைபெற்ற நிகழ்ச்சியில் அமைச்சரவை முடிவுகள் குறித்த விவரங்களை மத்திய அமைச்சர் அஸ்வினி வைஷ்ணவ் வெளியிட்டார்.
இந்தியாவை உலகளாவிய சிப் உற்பத்தி மையமாக மாற்றுவதை நோக்கமாகக் கொண்டு, செமிகான் 2.0 திட்டத்திற்கு ₹1,27,500 கோடி நிதி ஒதுக்கீடு செய்யப்பட்டுள்ளதாக அவர் குறிப்பிட்டார். சிப் வடிவமைப்பு, உற்பத்தி உபகரணங்கள், செமிகண்டக்டர் பேக்கேஜிங் மற்றும் ஆராய்ச்சி ஆகிய 6 முக்கிய தூண்களை அடிப்படையாகக் கொண்டு இத்திட்டம் செயல்படுத்தப்பட உள்ளதாக மத்திய அமைச்சர் அஸ்வினி வைஷ்ணன் தெரிவித்தார்.
உள்நாட்டிலேயே மொபைல் போன் உற்பத்தியை அதிகரிக்கவும், விநியோகச் சங்கிலியை வலுப்படுத்தவும் ₹62,500 கோடி மதிப்பிலான புதிய மொபைல் போன் உற்பத்தித் திட்டத்திற்கு அமைச்சரவை ஒப்புதல் அளித்துள்ளதாகவும் அவர் கூறினார்.
உரம் உற்பத்தியில் இந்தியா தற்சார்பு அடைவதை நோக்கமாகக் கொண்டு, “தேசிய முதலீட்டுக் கொள்கை-2026” ஒப்புதல் பெற பெற்றுள்ளது. இந்த புதிய கொள்கையின் மூலம் அமைக்கப்படும் புதிய உர ஆலைகள் மூலம் உற்பத்திச் செலவு கணிசமாகக் குறையும் எனத் தெரிவிக்கப்பட்டுள்ளது.
உத்திரப்பிரதேச மாநிலம் வாரணாசியில் போக்குவரத்து நெரிசலைக் குறைக்கும் வகையில், கங்கை நதிக்கரையில் ₹14,448 கோடியில் 6 வழி உயர்மட்டப் பாலமும், வருணா நதிக்கரையில் ₹10,998 கோடியில் 4/6 வழி உயர்மட்டப் பாலமும் அமைக்கப்படவுள்ளதாக மத்திய அமைச்சர் அஸ்வினி வைஷ்ணன் தெரிவித்தார். ஒடிசா மற்றும் ஜார்கண்ட் மாநிலங்களை இணைக்கும் பரதீப் – ஹரிதாஸ்பூர் இரட்டை ரயில் பாதை திட்டத்திற்கு ₹2,542 கோடி ஒதுக்கப்பட்டுள்ளதாகவும் அவர் குறிப்பிட்டார்.
இந்தத் திட்டங்கள் அனைத்தும் இந்தியாவின் பொருளாதார வளர்ச்சியை ஊக்குவிப்பதுடன், லட்சக்கணக்கான புதிய வேலைவாய்ப்புகளை உருவாக்கும் என்றும், குறிப்பாக மின்னணு உற்பத்தி மற்றும் உள்நாட்டு உள்கட்டமைப்பில் பெரும் புரட்சியை ஏற்படுத்தும் என்றும் மத்திய அரசு தெரிவித்துள்ளது.
