வியட்நாம் நாட்டின் லாம் டாங் மாகாணத்திலிருந்து ஹோ சி மின் நகரை நோக்கி நேற்று இரவு புறப்பட்ட ஆம்னி பேருந்து, இன்று அதிகாலை டாங் நாய் நகரில் உள்ள தேசிய நெடுஞ்சாலையில் பயங்கர தீ விபத்தில் சிக்கியது. இந்த விபத்தில் 7 பயணிகள் உடல் முழுவதும் கருகி உயிரிழந்த சோகம் நிகழ்ந்துள்ளது.
பேருந்தில் மொத்தம் 24 பயணிகள் இருந்ததாக அதிகாரிகள் தெரிவித்தனர். இரவு முழுவதும் பயணித்த பேருந்து அதிகாலை நேரத்தில் டாங் நாய் பகுதியில் சென்றுகொண்டிருந்தபோது திடீரென தீ பற்றியது. தீ மிக வேகமாக பரவியதால் பயணிகள் பீதியடைந்து தப்பிக்க முயற்சித்தனர். ஆனாலும், சிலர் வெளியேற முடியாமல் தீயின் பிடியில் சிக்கினர். விபத்தில் 7 பேர் சம்பவ இடத்திலேயே உயிரிழந்தனர். அவர்களின் உடல்கள் முழுமையாக கருகிய நிலையில் மீட்கப்பட்டதாக மீட்புக்குழு தெரிவித்தது.
மேலும் 5 பயணிகள் படுகாயமடைந்து அருகிலுள்ள மருத்துவமனையில் தீவிர சிகிச்சைக்கு அனுமதிக்கப்பட்டுள்ளனர். மற்ற பயணிகள் சிறு காயங்களுடன் தப்பியதாகக் கூறப்படுகிறது. தகவல் அறிந்த உடனேயே தீயணைப்பு மற்றும் மீட்புப் படையினர் சம்பவ இடத்துக்கு விரைந்து வந்து தீயை அணைக்க முயற்சித்தனர். காயமடைந்தவர்களை உடனடியாக மருத்துவ உதவிக்கு அழைத்துச் சென்றனர். பேருந்து முழுவதும் தீக்கிரையாகி, எஞ்சியவை மட்டுமே எரிந்த நிலையில் காணப்பட்டன.
வியட்நாம் போக்குவரத்து அதிகாரிகள் இந்த விபத்துக்கான காரணம் குறித்து தீவிர விசாரணை நடத்தி வருகின்றனர். பேருந்தின் எஞ்சின் பழுது, மின் கோளாறு அல்லது பயணிகளின் பொருட்களில் இருந்த ஏதேனும் எரியக்கூடிய பொருள் காரணமாக இருக்கலாம் என சந்தேகம் வெளியிடப்பட்டுள்ளது. முழு விபத்து குறித்த அறிக்கை விரைவில் வெளியாகும் என எதிர்பார்க்கப்படுகிறது.
