ஐசிசி மகளிர் டி20 உலகக்கோப்பை வரலாற்றில் 12 ஆண்டுகால காத்திருப்புக்கு முற்றுப்புள்ளி வைத்து,முதல் வெற்றியைப் பதிவு செய்துள்ளது அயர்லாந்து அணி.
சனிக்கிழமை நடைபெற்ற 2026 ஐசிசி மகளிர் டி20 உலகக்கோப்பை குழு சுற்றின் கடைசி போட்டியில், வெஸ்ட் இண்டீஸ் அணியை 6 விக்கெட் வித்தியாசத்தில் வீழ்த்தியதன் வழியே அயர்லாந்து அணி இந்த வரலாற்றுச் சாதனையைப் படைத்துள்ளது.
129 ரன்கள் என்ற இலக்கை நோக்கி களமிறங்கிய அயர்லாந்து, ஆர்லா பிரெண்டர்காஸ்ட் விளாசிய அபார அரைசதம் (63) மற்றும் ஏமி ஹண்டர் (28) ஆகியோரின் சிறப்பான ஆட்டத்தால், இன்னும் 11 பந்துகள் மீதமிருக்கையில் வெற்றியை வசப்படுத்தியது.
அயர்லாந்து அணி ஏற்கனவே அரையிறுதி வாய்ப்பை இழந்திருந்தாலும், இந்த வெற்றி வெஸ்ட் இண்டீஸ் அணியின் அரையிறுதி கனவுக்கு பெரிய பின்னடைவை ஏற்படுத்தியுள்ளது. தற்போது அந்த அணியின் அரையிறுதி வாய்ப்பு, நியூசிலாந்து – இங்கிலாந்து அணிகளுக்கு இடையிலான போட்டியின் முடிவைப் பொறுத்தே அமையும்.
முன்னதாக டாஸ் வென்று பந்துவீச்சைத் தேர்வு செய்த அயர்லாந்து, ஆரம்பம் முதலே வெஸ்ட் இண்டீஸ் அணிக்கு நெருக்கடி கொடுத்தது. முதல் ஓவரிலேயே கியானா ஜோசப் விக்கெட்டை கைப்பற்றிய ஏமி மகுவையர், கட்டுக்கோப்பான பந்துவீச்சை வெளிப்படுத்தினார்.
வெஸ்ட் இண்டீஸ் அணியின் அதிரடி பேட்டிங் வரிசை முழுமையாக தடுமாறியது. ஒரு சிக்சரும் அடிக்க முடியாமல் அந்த அணி 20 ஓவர்களில் 128 ரன்கள் மட்டுமே எடுத்தது.
ஹேலி மேத்யூஸ் 22 (25), ஸ்டெஃபானி டெய்லர், டியாண்ட்ரா டாட்டின் ஆகியோர் தலா ஓரளவு ரன்கள் சேர்த்தாலும், பெரிய கூட்டணி அமையவில்லை. இறுதியில் சினெல்லே ஹென்றி ஆட்டமிழக்காமல் 27 ரன்கள் எடுத்தார்.
அயர்லாந்து தரப்பில் அனைத்து பந்துவீச்சாளர்களும் விக்கெட் கைப்பற்றினர். குறிப்பாக ஏமி மகுவையர் 2/22 மற்றும் காரா முர்ரே 2/13 என்ற சிறப்பான பந்துவீச்சை பதிவு செய்தனர். ஹேலி மேத்யூஸின் முக்கிய விக்கெட்டையும் காரா முர்ரே கைப்பற்றினார்.
129 ரன்கள் இலக்கைத் துரத்திய அயர்லாந்து, தொடக்கத்தில் கேப்டன் கேபி லூயிஸ் விக்கெட்டை இழந்தாலும், பிரெண்டர்காஸ்ட் – ஏமி ஹண்டர் ஜோடி 53 பந்துகளில் 62 ரன்கள் சேர்த்து அணியை வெற்றிப் பாதைக்கு அழைத்துச் சென்றது.
ஆர்லா பிரெண்டர்காஸ்ட் தனது இன்னிங்சில் 8 பவுண்டரிகள் மற்றும் 2 சிக்சர்கள் விளாசி 63 ரன்கள் எடுத்தார். பின்னர் அவர் ஆட்டமிழந்தபோதும், ரெபெக்கா ஸ்டோகெல் மற்றும் லூயிஸ் லிட்டில் அமைதியாக ஆடி அணியை வெற்றிக்குக் கொண்டு சென்றனர்.
இறுதியில் ஆலியா அலெய்ன் வீசிய பந்தை பவுண்டரிக்கு விரட்டிய லூயிஸ் லிட்டில், அயர்லாந்தின் வரலாற்று சிறப்புமிக்க முதல் உலகக்கோப்பை வெற்றியை உறுதி செய்தார்.
