நாடாளுமன்ற பட்ஜெட் கூட்டத்தொடரின் முதல் நாளில் குடியரசுத் தலைவர் திரௌபதி முர்மு தனது உரையை நிகழ்த்தினார்.
நாடாளுமன்றத்தின் பட்ஜெட் கூட்டத்தொடரின் முதல் நாள் கூட்டம் இன்று குடியரசுத் தலைவர் திரௌபதி முர்மு உரையுடன் தொடங்கியது. சமூக நீதி, உள்ளடக்கிய வளர்ச்சி மற்றும் வளர்ந்த இந்தியாவுக்கான மத்திய அரசின் தொலைநோக்குப் பார்வையை அவர் கோடிட்டுக் காட்டினார்.
தொடர்ந்து அவர் பேசியதாவது, “இந்தியா அனைத்துத் துறைகளிலும் முன்னேறி வருகிறது. தற்சார்பு வாழ்க்கை இல்லாமல் சுதந்திரம் முழுமையடையாது. கடந்த 11 ஆண்டுகளில் நாட்டின் பொருளாதார நிலை கணிசமாக வலுப்பெற்றுள்ளது. பணவீக்கத்தைக் குறைவாகப் பேணியதில் நாங்கள் ஒரு சாதனையைப் படைத்துள்ளோம். இது நடுத்தர வர்க்கத்தினருக்கும் ஏழைகளுக்கும் நேரடியாகப் பயனளித்துள்ளது,” என்று கூறினார்.
ஜி.எஸ்.டி வரி விதிப்பில் மாற்றம் கொண்டுவரப்பட்டது ஒரு சரித்திர நிகழ்வு. இதன் மூலமாக சேமிப்பு என்பது நடுத்தர குடும்பத்தில் அதிகரித்துள்ளது. கிட்டத்தட்ட ஒரு லட்சம் கோடி ரூபாய்க்கு மேல் சேமிப்பு என்பது மேற்கொள்ளப்பட்டிருக்கிறது. அருணாச்சல் பிரதேசம், திரிபுரா, மிசோரம் ஆகிய மாநிலங்களின் தலைநகரங்கள் அகல ரயில் பாதைகள் மூலமாக இணைக்கப்பட்டிருக்கிறது. உஜ்வாலா திட்டத்தின் மூலம் இதுவரை 10 கோடிக்கும் மேற்பட்ட குடும்பங்களுக்கு எல்.பி.ஜி இணைப்புகள் வழங்கப்பட்டுள்ளது.
எனது அரசாங்கம் வெளிப்படையான மற்றும் நேர்மையான அமைப்புகளை நிறுவனமயமாக்கி வருகிறது. ஒரே ஆண்டில், நேரடிப் பணப் பரிமாற்றம் மூலம் ரூ.1.75 லட்சம் கோடிக்கும் அதிகமான மதிப்புள்ள பலன்கள் நேரடியாகப் பயனாளிகளுக்கு மாற்றப்பட்டுள்ளன. எண்ணெய் வித்துக்கள் உற்பத்தியில் இந்தியா புதிய சாதனை படைக்கப்பட்டுள்ளது. மீனவர்கள் நலனுக்கு பல்வேறு நடவடிக்கை எடுக்கப்பட்டுள்ளன.
விரைவில் பயங்கரவாதம் முற்றிலுமாக ஒழிக்கப்படும்: ‘ஆபரேஷன் சிந்துர்’ குறித்துப் பேசிய குடியரசுத் தலைவர் திரௌபதி முர்மு, “இந்திய ராணுவத்தின் துணிச்சலையும் வீரத்தையும் நாங்கள் கண்டிருக்கிறோம். பயங்கரவாதத் தளம் அழிக்கப்பட்டுள்ளது. எதிர்கால பயங்கரவாதத் தாக்குதல்களுக்கு உறுதியான மற்றும் தீர்க்கமான பதில் அளிக்கப்படும். சிந்து நதி நீர் ஒப்பந்தமும் இதன் ஒரு பகுதியாகும்.” மாவோயிஸ்டுகள் குறித்துப் பேசிய குடியரசுத் தலைவர் முர்மு, மாவோயிஸ்ட் பயங்கரவாதிகளுக்கு எதிராகத் தீர்க்கமான நடவடிக்கை எடுக்கப்பட்டுள்ளது என்றார். இன்று, மாவோயிஸ்ட் பயங்கரவாதிகளின் ஆதிக்கம் 126 மாவட்டங்களிலிருந்து 8 மாவட்டங்களாகக் குறைந்துள்ளது. வெறும் 3 மாவட்டங்கள் மட்டுமே தீவிரமாகப் பாதிக்கப்பட்டுள்ளன. 2,000-க்கும் மேற்பட்ட மாவோயிஸ்டுகள் சரணடைந்துள்ளனர். நாட்டில் இருந்து பயங்கரவாதம் முழுமையாக ஒழிக்கப்படும் நாள் வெகு தொலைவில் இல்லை என்றார்.
25 கோடி பேர் வறுமையில் இருந்து மீட்பு: மத்திய அரசின் சாதனைகளை பட்டியலிட்டு பேசிய திரௌபதி முர்மு, ஆயுஷ்மான் பாரத் திட்டத்தின் கீழ் 11 கோடிக்கும் அதிகமானோர், இலவச மருத்துவ சிகிச்சையை பெற்றிருப்பதாக கூறினார். கடந்த 10 ஆண்டுகளில் ஏழை மக்களுக்கு 4 கோடி வீடுகள் கட்டப்பட்டுள்ளன. 10 வருடங்களில் 25 கோடி பேர் வறுமையில் இருந்து மீட்கப்பட்டதாகவும் கூறியுள்ளார்.
இந்திய அரசின் நோக்கம் நாட்டை மேம்படுத்துவதாகும்: குடியரசுத் தலைவர் திரௌபதி முர்மு கூறியதாவது: “இந்தியா சூரிய மின்சக்தித் துறையில் வேகமாக முன்னேறி வருகிறது. இரண்டு மில்லியன் சூரிய மின்சக்தி அமைப்புகள் நிறுவப்பட்டு, கோடிக்கணக்கான குடும்பங்களின் வீடுகளில் மின்சார உற்பத்தி அதிகரிக்கப்பட்டுள்ளது. கடந்த 11 ஆண்டுகளில் வடகிழக்கு மாநிலங்களில் 7,200-க்கும் மேற்பட்ட நெடுஞ்சாலைகள் அமைக்கப்பட்டுள்ளன. ரயில்வே மேம்பாட்டிற்காக ₹80,000 கோடிக்கும் மேல் முதலீடு செய்யப்பட்டுள்ளது.
இந்த தசாப்தம் வடகிழக்கு மாநிலங்களின் பாதுகாப்புக்குத் தீர்க்கமானதாக அமைந்துள்ளது. பழங்குடியினர் பகுதிகளில் உள்ள 20,000-க்கும் மேற்பட்ட கிராமங்கள் மேம்பாட்டுடன் இணைக்கப்பட்டு வருகின்றன. பட்டியல் சமூக மாணவர்களுக்கு ₹42,000 கோடி மதிப்புள்ள கல்வி உதவித்தொகைகள் வழங்கப்பட்டுள்ளன. செழிப்பான விவசாயியே வளர்ந்த இந்தியாவின் இலக்கு என்று எனது அரசாங்கம் கருதுகிறது என்று திரௌபதி முர்மு கூறினார்.
நாட்டின் கிட்டத்தட்ட 95 கோடி குடிமக்களுக்கு சமூகப் பாதுகாப்பு சலுகைகள் இப்போது கிடைக்கின்றன. செமி கண்டக்டர் சிப்புகள் உற்பத்தியில் உலகத்திற்கே முன்மாதிரியாக இந்தியா திகழ்கிறது. வடகிழக்கு மாநிலங்களில் AIIMS உள்ளிட்ட மருத்துவமனைகள் உருவாக்கப்பட்டுள்ளது.
உணவு பதப்படுத்தும் திறன் 20 சதவீதம் அதிகரிப்பு: “பிரதம மந்திரி கிசான் சம்மான் நிதி திட்டம் தொடங்கப்பட்டது, இதன் மூலம் இதுவரை 4 லட்சம் கோடி ரூபாய் அனுப்பப்பட்டுள்ளது. நாட்டில் எண்ணெய் வித்துப் பயிர்களின் உற்பத்தியும் அதிகரித்துள்ளது. கால்நடை வளர்ப்பு, மீன்வளம் மற்றும் தேனீ வளர்ப்பு ஆகியவையும் ஒருங்கிணைக்கப்பட்டு வருகின்றன. மீனவர்களுக்குப் பயனளிக்கும் வகையில் ஒரு புதிய கொள்கை வகுக்கப்பட்டுள்ளது. 2014-ஆம் ஆண்டுடன் ஒப்பிடுகையில், மீன்வளம் 105 சதவீதம் அதிகரித்துள்ளது. நாட்டில் உணவு பதப்படுத்தும் திறன் 20 சதவீதம் அதிகரித்துள்ளது.”
மேலும் திருக்குறளை மேற்கோள்கட்டி உரையாற்றிய முர்மு, திருவள்ளுவர் கூறுவது போல, எந்த தொழில் செய்பவராக இருந்தாலும், விவசாயத்தை சார்ந்துதான் இருக்கவேண்டும் என்று கூறியுள்ளார். மேலும் இந்த ஆட்சியில் உணவுப் பொருட்கள் இறக்குமதியை குறைக்க எண்ணெய் பயிர்கள் உற்பத்திக்கான தேசிய திட்டங்கள் வகுக்கப்பட்டுள்ளதாக கூறியுள்ளார்.
தமிழ்நாட்டில் பாம்பன் பாலம் செயல்பாட்டில் கொண்டுவரப்பட்டுள்ளது. ஜல் ஜீவன் மிஷன் திட்டத்தின் மூலம் 12.5 கோடி குடும்பங்களுக்கு குடிநீர் குழாய் இணைப்பு வழங்கி உள்ளது. கைப்பேசி உற்பத்தியில் உலகிலேயே இரண்டாவது இடத்தில் இந்தியா உள்ளது. விண்வெளி சுற்றுலா செயல்படுத்த இந்தியாவுக்கு வெகு தூரம் இல்லை. உலகம் முழுவதும் பொருளாதார மந்த நிலை இருந்தபோதும் இந்தியாவில் பொருளாதாரம் வலுவுடன் இருக்கிறது.
பெண்களுக்காக சிறப்புத் திட்டங்கள்”: “அனைத்து குடிமக்களுக்கும் சம உரிமை அளிப்பதன் மூலமே தேசத்தின் வளர்ச்சி சாத்தியமாகும். எனது அரசாங்கம் பெண்களுக்காக சிறப்புத் திட்டங்களை உருவாக்கியுள்ளது. 10 கோடி பெண்கள் சுயஉதவிக் குழுக்களுடன் இணைக்கப்பட்டுள்ளனர். 3 கோடி பெண்களை இணைப்பதே இலக்கு, இதில் 60 லட்சத்திற்கும் மேற்பட்ட பெண்கள் ‘லட்சாதிபதி தீதி’ ஆக மாறியுள்ளனர். ‘ட்ரோன் தீதி’ திட்டமும் வேகமாக முன்னேறி வருகிறது.”
அரசுத் திட்டங்கள் வேலைவாய்ப்பை அதிகரிக்கின்றன: முத்ரா திட்டத்தின் கீழ் இதுவரை சுமார் ₹38 லட்சம் கோடி விடுவிக்கப்பட்டுள்ளதாகவும், வேலைவாய்ப்புக்காக சுமார் 12 கோடி கடன்கள் வழங்கப்பட்டுள்ளதாகவும் குடியரசுத் தலைவர் திரௌபதி முர்மு தெரிவித்தார். மேலும், பிரதமரின் ஸ்வநிதி திட்டத்தின் கீழ் 72 லட்சம் பேருக்கு சுமார் ₹16 லட்சம் கோடி வழங்கப்பட்டுள்ளதாகவும் அவர் கூறினார். நாட்டில் சுமார் 2 லட்சம் ஸ்டார்ட்அப் நிறுவனங்கள் பதிவு செய்யப்பட்டுள்ளதாகவும், அவை 20 லட்சத்திற்கும் மேற்பட்டோருக்கு வேலைவாய்ப்பு அளித்து வருவதாகவும், இந்த ஸ்டார்ட்அப் நிறுவனங்களில் சுமார் 40% நிறுவனங்களில் பெண் இயக்குநர்கள் இருப்பதாகவும் குடியரசுத் தலைவர் குறிப்பிட்டார்.
