பிரதமர் நரேந்திர மோடியின் சமூக ஊடக செல்வாக்கு நிகரற்றதாகத் திகழ்கிறது. கடந்த ஒரு மாதத்தில், எக்ஸ் தளத்தில் அதிக ஈடுபாடு பெற்ற பதிவுகளில் அவரது பதிவுகளே ஆதிக்கம் செலுத்தியுள்ளன. இந்தியாவில் அதிகம் விரும்பப்பட்ட பத்து ட்வீட்களில் எட்டு அவரது பதிவுகளாகும். இந்தச் சாதனையை வேறு எந்த அரசியல் தலைவரும் நெருங்கக்கூட இல்லை.
எக்ஸ் தளத்தின் புதிய “Most Liked” அம்சத்தின்படி, நாட்டில் அதிகம் விரும்பப்பட்ட முதல் 10 ட்வீட்களில் வேறு எந்த அரசியல் தலைவரின் பதிவுகளும் இடம்பெறவில்லை. பிரதமர் மோடியின் முக்கியப் பதிவுகளில் ஒன்றாக, இந்தியாவுக்கு வருகை தந்திருந்த ரஷ்ய அதிபர் விளாடிமிர் புதினுக்கு இந்து சமய நூலான பகவத் கீதையின் ஒரு பிரதியை வழங்கிய பதிவு இடம் பெற்றது. அந்த பதிவு 6.7 மில்லியன் பேர் வரை சென்றடைந்து, 2.31 லட்சம் லைக்குகளைப் பெற்று மிக உயர்ந்த ஈடுபாட்டை பெற்றது.
அந்த பதிவில் பிரதமர் எழுதியிருந்தது,“ரஷ்ய மொழியில் உள்ள கீதையின் ஒரு பிரதியை ஜனாதிபதி புடினுக்கு வழங்கினேன். கீதையின் போதனைகள் உலகம் முழுவதும் உள்ள கோடிக்கணக்கான மக்களுக்கு ஊக்கமளிக்கின்றன. @KremlinRussia_E.”
பிரதமர் மோடி, அதிபர் புதினுக்கு டெல்லியில் வரவேற்பு அளித்த மற்றொரு பதிவும் குறிப்பிடத்தக்க கவனத்தைப் பெற்றது. அது10.6 மில்லியன் பயனர்களை சென்றடைந்து, 2.14 லட்சம் லைக்குகளைப் பெற்றது. அந்த பதிவில் பிரதமர் மோடி எழுதியிருந்தது,
“என் நண்பர், ஜனாதிபதி புடினை இந்தியாவில் வரவேற்பதில் மகிழ்ச்சி. இன்று மாலை மற்றும் நாளை நடைபெற உள்ள எங்களின் சந்திப்புகளை ஆவலுடன் எதிர்நோக்குகிறேன். இந்தியா–ரஷ்யா நட்பு காலத்தால் சோதிக்கப்பட்டது; அது எங்கள் மக்களுக்கு பெரும் நன்மைகளை அளித்துள்ளது. @KremlinRussia_E.”
பிரதமர் நரேந்திர மோடி 29 நாடுகளின் உயரிய குடிமகன் விருதுகளையும் பெற்றுள்ளார். இது அவரது தனிப்பட்ட ஆளுமை அணுகுமுறையையும், உலக அரங்கில் இந்தியாவின் வளர்ந்து வரும் அந்தஸ்தையும் பிரதிபலிக்கும் ஒரு அரிய சிறப்பாகும். மூன்று நாடுகளுக்கான தனது சுற்றுப்பயணத்தின் இறுதிப் பகுதியாக ஓமனுக்கு மேற்கொண்ட இரண்டு நாள் அரசுமுறைப் பயணத்தின் போது பிரதமருக்கு ‘ஆர்டர் ஆஃப் ஓமான் (முதல் வகுப்பு)’ விருது வழங்கப்பட்டது. ஓமனின் தேசத் தந்தை சுல்தான் காபூஸ் பின் சயீத் அவர்களால் 1970-ல் நிறுவப்பட்ட இந்த மதிப்புமிக்க விருது, இருதரப்பு உறவுகள், பொது உறவுகள் மற்றும் உலக அமைதியை வலுப்படுத்துவதில் ஆற்றிய சிறப்பான பங்களிப்புகளை அங்கீகரிக்கும் வகையில் வழங்கப்படுகிறது.
விருதைப் பெற்ற பிறகு தனது நன்றியைத் தெரிவித்த பிரதமர் மோடி, சுல்தான் ஹைதம் பின் தாரிக் அவர்களுக்கு நன்றி கூறினார். இந்த கௌரவம் “இந்தியா மற்றும் ஓமன் மக்களின் பாசம் மற்றும் நம்பிக்கையின் சின்னம்” என்றும் அவர் குறிப்பிட்டார்.
“பல நூற்றாண்டுகளாக, நமது முன்னோர்கள் ஒருவருக்கொருவர் தொடர்பில் இருந்து, கடல்வழி வர்த்தகத்தில் ஈடுபட்டுள்ளனர். அரபிக்கடல் நமது நாடுகளுக்கு இடையே ஒரு வலுவான பாலமாக மாறியுள்ளது. இந்த கௌரவத்தை நான் இந்திய மக்களுக்கு அர்ப்பணிக்கிறேன். மாண்ட்வியிலிருந்து மஸ்கட்டிற்குப் பயணம் செய்து இந்த உறவுக்கு அடித்தளமிட்ட நமது முன்னோர்களுக்கும் இந்த கௌரவத்தை அர்ப்பணிக்கிறேன். பல நூற்றாண்டுகளாக நடந்த பரிமாற்றங்கள் மூலம் இரு நாடுகளின் முன்னேற்றத்திற்கும் பங்களித்த மாலுமிகளுக்கும் இந்த கௌரவம் அர்ப்பணிக்கப்படுகிறது,” என்று பிரதமர் எக்ஸ் சமூக வலைதளத்தில் பதிவிட்டுள்ளார்.
