மத்திய கிழக்கில் இஸ்ரேல் – ஈரான் இடையேயான மோதல் மற்றும் உக்ரைன் – ரஷ்யா போர் என உலக நாடுகளுக்கிடையே பதற்றம் அதிகரித்து வரும் நிலையில், மூன்றாம் உலகப்போர் குறித்த அச்சம் உலகளவில் எழுந்துள்ளது. இது தொடர்பாக இணையத்தில் வைரலாகி வரும் ஒரு ஆய்வறிக்கை வீடியோவில், போர் மூண்டால் உலகிலேயே மிகவும் பாதுகாப்பான நாடாக சுவிட்சர்லாந்து இருக்கும் எனக் குறிப்பிடப்பட்டுள்ளது.
அதன் மலைப்பாங்கான புவியியல் அமைப்பு, பல நூற்றாண்டுகளாகப் பின்பற்றி வரும் நடுநிலை கொள்கை மற்றும் அந்நாட்டின் ஒவ்வொரு குடிமகனுக்கும் போதுமான பாதாள பாதுகாப்பு பதுங்கு குழிகள் இருப்பது இதற்கு முக்கியக் காரணமாகக் கூறப்படுகிறது. அதே வேளையில், போர் முனைகளாக மாற வாய்ப்புள்ள ஜப்பான், தைவான், இஸ்ரேல், உக்ரைன் மற்றும் தென் கொரியா ஆகிய நாடுகள் மிக மோசமான பாதிப்புகளைச் சந்திக்கும் என அந்த வீடியோ எச்சரிக்கிறது.
ஒருவேளை மூன்றாம் உலகப்போர் ஏற்பட்டால், இந்தியா தனது பாரம்பரியமான ‘அணிசேராக் கொள்கையை’ மீண்டும் கையில் எடுக்கும் என எதிர்பார்க்கப்படுகிறது. எந்தவொரு அதிகார மையத்துடனும் (அமெரிக்கா அல்லது சீனா/ரஷ்யா) முழுமையாகத் தன்னை இணைத்துக் கொள்ளாமல் வெளியுறவுக் கொள்கையின் அடிப்படையில் இந்தியா செயல்படும். இருப்பினும், இந்தியப் பெருங்கடல் பிராந்தியத்தில் தனது இறையாண்மையைப் பாதுகாப்பதிலும், சீனா போன்ற அண்டை நாடுகளின் அச்சுறுத்தல்களை முறியடிப்பதிலும் இந்தியா மிகுந்த கவனத்துடன் இருக்கும். குறிப்பாக, போர்க் காலங்களில் உலக நாடுகளுக்குத் தேவையான மருந்துப் பொருட்கள் மற்றும் உணவுப் பொருட்களை வழங்கும் ஒரு ‘மனிதாபிமான மையமாக இந்தியா தன்னை நிலைநிறுத்திக் கொள்ளும்.
பொருளாதார ரீதியாகப் பார்த்தால், உலகப்போர் மூண்டால் கச்சா எண்ணெய் விலை உயர்வு மற்றும் விநியோகச் சங்கிலி பாதிப்பு போன்ற சவால்களை இந்தியா எதிர்கொள்ள நேரிடும். இதனைச் சமாளிக்க இந்தியா தற்போது ‘தற்சார்பு பாரதம்’ (Atmanirbhar Bharat) திட்டத்தின் கீழ் எரிசக்தி மற்றும் பாதுகாப்புத் துறையில் உள்நாட்டு உற்பத்தியை அதிகரித்து வருகிறது. சுமார் 90 லட்சம் இந்தியர்கள் வளைகுடா நாடுகளில் வசிப்பதால், அவர்களைப் பாதுகாப்பாக வெளியேற்றுவது இந்தியாவின் முதல் முன்னுரிமையாக இருக்கும். ஒட்டுமொத்தமாக, இந்தியா போரைத் தூண்டுவதை விட, உலக அமைதிக்கான ஒரு தூதுவராக இருந்து, பேச்சுவார்த்தை மூலம் தீர்வுகாணவே முயற்சிக்கும் என்பதுதான் அரசியல் நிபுணர்களின் கருத்தாக உள்ளது.
