ஸ்காட்லாந்தின் கிளாஸ்கோ நகரில் நடைபெற்று வரும் 2026 காமன்வெல்த் விளையாட்டுப் போட்டிகளில், இந்தியாவின் பதக்கப்பட்டியலில் வெள்ளிக்கிழமை அன்று மேலும் 2 தங்கப்பதக்கங்கள் இணைந்தன. ஆடவர் 60 கிலோ எடைப்பிரிவில் போட்டியிட்ட ஜூடோ வீரர் ஹர்ஷ் சிங், இந்தியாவின் கணக்கில் தங்கப்பதக்கத்தைச் சேர்த்துள்ளார். ஆஸ்திரேலியாவின் ஜோசுவா கட்ஸை (Joshua Katz) வீழ்த்தி அவர் இந்த வரலாற்றுத் தங்கத்தைக் கைப்பற்றினார்.
குறிப்பிடத்தக்க வகையில், பெண்களுக்கான 48 கிலோ எடைப்பிரிவு இறுதிப்போட்டியில் கனடாவின் ஹைடி குவாச்சை (Heidi Quach) வீழ்த்தி அஸ்மிதா தே தங்கம் வென்ற சில நிமிடங்களிலேயே ஹர்ஷ் சிங்கின் இந்த வெற்றியும் பதிவானது. இவர்களின் வெற்றியின் மூலம், நடப்பாண்டு காமன்வெல்த் விளையாட்டுப் போட்டிகளில் இந்தியாவின் தங்கப்பதக்க எண்ணிக்கை ஆறாக உயர்ந்தது.
23 வயதான ஹர்ஷ் சிங், தொடக்கத்தில் கட்ஸிடமிருந்து கடுமையான சவாலைச் சந்தித்தாலும், போட்டி முடிய வெறும் 41 வினாடிகள் மட்டுமே இருந்த நிலையில் மிகத் துணிச்சலான ஆட்டத்தை வெளிப்படுத்தினார். ஜூடோ விளையாட்டில் இரண்டாவது மிக உயர்ந்த புள்ளியளிக்கும் நுட்பமான ‘வசா-அரி’ (waza-ari) புள்ளியைப் பெற்று முன்னிலை பெற்ற அவர், மீதமுள்ள நான்கு நிமிடப் போட்டியில் தனது சிறப்பான தடுப்பாட்டத்தை வெளிப்படுத்தி இந்த மறக்க முடியாத வெற்றியை உறுதி செய்தார்.
பலமுறை ஓசியானியா சாம்பியன்ஷிப் பட்டங்களையும், ஆஸ்திரேலிய தேசிய பட்டங்களையும் வென்றதுடன், 2022 பர்மிங்காம் காமன்வெல்த் போட்டிகளில் வெண்கலமும் வென்ற அனுபவம் வாய்ந்த ஜோசுவா கட்ஸை வீழ்த்தி ஹர்ஷ் சிங் தங்கம் வென்றது ஒரு பெரும் திருப்புமுனையாகப் பார்க்கப்படுகிறது.
அஸ்மிதா தேவின் வரலாற்றுச் சிறப்புமிக்க வெற்றி: 1990 ஆம் ஆண்டு ஆக்லாந்து காமன்வெல்த் போட்டிகளில் ஜூடோ அறிமுகப்படுத்தப்பட்டதிலிருந்து, இந்திய ஜூடோ வீராங்கனைகள் பல்வேறு பதக்கங்களை வென்றிருந்தாலும், இதுவரை முதலிடத்தைப் பிடித்து வரலாறு படைத்ததில்லை. அந்த நீண்ட காத்திருப்புக்கு முற்றுப்புள்ளி வைக்கும் விதமாக அஸ்மிதா தே இந்தத் தங்கப்பதக்கத்தைக் வென்றுள்ளார்.
திரிபுராவை சேர்ந்த 23 வயதான ஜூடோ வீராங்கனை அஸ்மிதா தே, பெண்களுக்கான 48 கிலோ எடைப்பிரிவு இறுதிப்போட்டியில் கனடாவின் ஹைடி குவாச்சை எதிர்கொண்டார். போட்டியின் தொடக்கத்தில் அவர் பின்தங்கியிருந்தாலும், ஒரு யூகோ (yuko) புள்ளியை விட்டுக் கொடுத்து, அபராதமும் பெற்ற பின்னரும் அற்புதமான கம்பேக்கை வெளிப்படுத்தினார்.
தொடர்ந்து தீவிரமாகத் தாக்குதல் ஆட்டத்தில் ஈடுபட்ட அவர், சடன்-டெத் (sudden-death) கூடுதல் நேரத்தில் ஒரு யூகோ புள்ளியைப் பெற்று இந்த வரலாற்று வெற்றியைப் பதிவு செய்தார். ஆரம்பக் கட்ட பின்னடைவிலிருந்து மீண்டு வந்து தனது கனடா நாட்டு எதிராளியை வீழ்த்திய அஸ்மிதாவின் இந்தத் திறமை அனைவரின் பாராட்டுக்களையும் பெற்றுள்ளது.
