2026 ஆம் ஆண்டுக்கான காமன்வெல்த் விளையாட்டுப் போட்டிகள் நிறைவடைய உள்ள நிலையில், இந்திய அணியினர் பல்வேறு போட்டிகளிலும் தொடர்ச்சியாகப் பதக்கங்களைக் குவித்து அசத்தி வருகின்றனர். அந்த வகையில் ஜூடோ போட்டியில் இந்தியா அபாரமான ஆட்டத்தை வெளிப்படுத்தியுள்ளது. ஏற்கெனவே இரண்டு தங்கப் பதக்கங்கள் வெல்லப்பட்ட நிலையில், தற்போது பெண்களுக்கான 57 கிலோ எடைப்பிரிவில் இந்தியாவின் 28 வயது வீராங்கனை யாமினி மௌரியா வெள்ளிப் பதக்கத்தைக் கைப்பற்றி நாட்டிற்குப் பெருமை சேர்த்துள்ளார்.
இறுதிப் போட்டியில் இங்கிலாந்து வீராங்கனை அசெலியா டோபராக்கை எதிர்த்துப் போட்டியிட்ட யாமினி, ‘இப்போன்’ (Ippon) முறையில் தோல்வியைத் தழுவி தங்கப் பதக்கத்தைத் தவறவிட்டார். இருப்பினும், அஸ்மிதா டே மற்றும் ஹர்ஷ் சிங் ஆகியோர் ஜூடோவில் வரலாற்றுச் சிறப்புமிக்க இரண்டு தங்கப் பதக்கங்களை வென்ற வரிசையில், யாமினியின் இந்த வெள்ளிப் பதக்கமும் இணைந்துள்ளது.
இங்கிலாந்து வீராங்கனையுடனான இறுதிப் போராட்டம் மிகவும் பரபரப்பாக இருந்தது. போட்டியின் தொடக்கக் கட்டத்தில் அசெலியா டோபராக் யாமினியைப் பிடியி இறுகப் பிடிக்க முயன்றாலும், யாமினி அதைச் சிறப்பாகவே எதிர்கொண்டு தன்னை விடுவித்துக் கொண்டார். இருப்பினும், ‘கோல்டன் ஸ்கோர்’ நேரத்தின் போது யாமினிக்கு மூன்றாவது முறையாக ‘ஷிடோ’ (shido) அபராதம் விதிக்கப்பட்டதால், அவர் போட்டியிலிருந்து வெளியேற்றப்பட்டு வெள்ளிப் பதக்கத்துடன் திருப்தி அடைய நேரிட்டது.
வெள்ளிப் பதக்கம் வென்ற பிறகு செய்தியாளர்களிடம் பேசிய யாமினி மௌரியா, தங்கம் வெல்ல முடியாதது தமக்கு மிகுந்த ஏமாற்றம் அளிப்பதாகத் தெரிவித்தார். இறுதிவரை தான் மிகவும் தாக்குதல் ஆட்டத்தையே வெளிப்படுத்தியதாகவும், புள்ளிகளைக் குவிக்க முடியும் என்று நம்பியதாகவும் அவர் கூறினார்.
இதுகுறித்து அவர் மேலும் கூறுகையில், “தங்கப் பதக்கத்தை என்னால் வென்றிருக்க முடியும் என்பதால் எனக்கு சற்று ஏமாற்றமாகத்தான் உள்ளது. கடைசி நிமிடம் வரை நான் ஆக்ரோஷமாக விளையாடிப் புள்ளிகளைப் பெற முடியும் என்றே நம்பினேன். ஆனால், சில எதிர்மறையான நகர்வுகளால் எனக்கு அளிக்கப்பட்ட அபராதப் புள்ளியே இன்றைய தோல்விக்குக் காரணம் என நினைக்கிறேன்.
முதலாவதாக, இந்தப் பதக்கத்தை எனது நாட்டிற்கும் எனது குடும்பத்திற்கும் சமர்ப்பிக்கிறேன். அவர்கள் எனக்கு உறுதுணையாக நின்றார்கள். அடுத்து ஆசிய விளையாட்டுப் போட்டிகள் வரவுள்ளன, அதிலும் பதக்கம் வெல்ல முயற்சிப்பேன். தங்கம் வெல்வதற்காக எனது முழு முயற்சியையும் கொடுப்பேன்” என்று தெரிவித்தார்.
