ஜூன் மாதத்திற்கான ஐசிசி (ICC) மகளிர் சிறந்த கிரிக்கெட் வீராங்கனை விருதுக்கான பரிந்துரைக்கப்பட்ட வீராங்கனைகளின் பட்டியலை சர்வதேச கிரிக்கெட் கவுன்சில் (ICC) அறிவித்துள்ளது.
இந்தப் பட்டியலில் ஸ்காட்லாந்து கேப்டன் கேத்ரின் பிரைஸ், இந்திய சுழற்பந்து வீச்சாளர் ஸ்ரீ சரணி, இங்கிலாந்து தொடக்க வீராங்கனை டேனி வயட்-ஹோட்ஜ் ஆகியோர் இடம்பெற்றுள்ளனர்.
முத்திரை பதித்த ஸ்ரீ சரணி
2026 மகளிர் டி20 உலகக் கோப்பையில் இந்திய அணிக்காக விளையாடிய இடதுகை சுழற்பந்து வீச்சாளர் ஸ்ரீ சரணி, தொடரில் அதிக விக்கெட்டுகள் வீழ்த்திய வீராங்கனையாகத் திகழ்ந்தார்.
அவர் 6 டி20 போட்டிகளில் 14 விக்கெட்டுகளை, சராசரியாக 11.00 மற்றும் 6.69 எகானமி விகிதத்தில் கைப்பற்றினார்.
பாகிஸ்தானுக்கு எதிராக 3/21, நெதர்லாந்துக்கு எதிராக 4/19, தென்னாப்பிரிக்காவுக்கு எதிராக 3/24 என்ற சிறப்பான பந்துவீச்சை வெளிப்படுத்தினார். இந்திய அணி லீக் சுற்றிலேயே வெளியேறினாலும், ஐந்து குழுநிலைப் போட்டிகளிலும் குறைந்தது இரண்டு விக்கெட்டுகளையாவது வீழ்த்தி ஸ்ரீ சரணி தொடர்ச்சியான சிறப்பான ஆட்டத்தை வெளிப்படுத்தினார்.
கேத்ரின் பிரைஸ்
ஸ்காட்லாந்து கேப்டன் கேத்ரின் பிரைஸ், ஜூன் மாதத்தில் 7 டி20 போட்டிகளில் 178 ரன்கள் குவித்ததுடன், 11 விக்கெட்டுகளையும் கைப்பற்றினார். வங்கதேசம் மற்றும் நெதர்லாந்துக்கு எதிரான முத்தரப்பு தொடரில் அணியை வெற்றிக்கு வழிநடத்திய அவர், உலகக் கோப்பையிலும் அயர்லாந்துக்கு எதிராக 60 ரன்கள் விளாசி அசத்தினார்.
டேனி வயட்-ஹோட்ஜ்
இங்கிலாந்து தொடக்க வீராங்கனை டேனி வயட்-ஹோட்ஜ், 6 டி20 போட்டிகளில் 287 ரன்கள் குவித்து அபாரமான ஆட்டத்தை வெளிப்படுத்தினார்.
இலங்கைக்கு எதிராக ஆட்டமிழக்காமல் 105 ரன்கள், மேற்கிந்தியத் தீவுகளுக்கு எதிராக 65 ரன்கள், நியூசிலாந்துக்கு எதிராக ஆட்டமிழக்காமல் 89 ரன்கள் எடுத்தார்.
உலகக் கோப்பை முழுவதும் 302 ரன்கள் குவித்து, ஐசிசி மகளிர் டி20 உலகக் கோப்பை வரலாற்றில் 300 ரன்களை கடந்த முதல் வீராங்கனை என்ற சாதனையையும் டேனி வயட்-ஹோட்ஜ் படைத்துள்ளார்.
