தென்னாப்பிரிக்க அணிக்கு எதிரான 2வது ஒருநாள் கிரிக்கெட் போட்டியில், கோலி, கெய்க்வாட் ஆகியோர் சதமடித்த போதிலும் இந்திய அணி அதிர்ச்சித் தோல்வியடைந்தது.
ராய்ப்பூரில் இன்று தெ.ஆப்பிரிக்கா, இந்திய அணிகளுக்கு இடையே 2வது ஒருநாள் கிரிக்கெட் போட்டி நடைபெற்றது. இதில் டாஸ் வென்ற தெ.ஆப்பிரிக்க அணி பந்துவீச்சை தேர்வு செய்தது. இதையடுத்து, இந்திய அணி முதலில் பேட்டிங் செய்தது.
ஜெய்ஸ்வால், ரோஹித் சர்மா ஆகியோர் சொற்ப ரன்களில் அவுட்டாகினர். எனினும் 3வது விக்கெட்டுக்கு கோலி, கெய்க்வாட் சிறப்பான ஆட்டத்தை வெளிப்படுத்தினர். கெய்க்வாட்டுடன் ஜோடி சேர்ந்து அதிரடியாக கோலி விளையாடினார். இருவரும் சிறப்பாக விளையாடி அடுத்தடுத்து சதத்தை பதிவு செய்தனர்.
கெய்க்வாட் அதிரடியாக விளையாடி 105 ரன்கள் சேர்த்த நிலையில் ஆட்டமிழந்தார். மறுமுனையில் கோலி 90 பந்துகளில் 100 ரன்களை குவித்தார். இதில் 7 பவுண்டரிகள், 2 சிக்சர்கள் அடங்கும். இந்த சதம், ஒருநாள் கிரிக்கெட் அரங்கில் கோலியின் 53வது சதமாகும். அதேபோல், சர்வதேச அரங்கில் அவரின் 84வது சதமாகும்.
தொடர்ந்து சிறப்பாக ஆடிய விராட் கோலி 102 ரன்களில் ஆட்டமிழந்தார். அப்போது இந்திய அணி 39.1 ஓவர்களில் 4 விக்கெட்டுகள் இழப்பிற்கு 284 ரன்களை சேர்த்திருந்தது.
இதையடுத்து 5வது விக்கெட்டுக்கு ஜோடி சேர்ந்த கேப்டன் கே.எல். ராகுல், ஜடேஜா ஆகியோர் சிறப்பான ஆட்டத்தை வெளிப்படுத்தினர். கே.எல். ராகுல் அதிரடியாக விளையாடி 66 ரன்களை குவித்தார்.
50 ஓவர்கள் முடிவில் 5 விக்கெட்டுகள் இழப்பிற்கு 358 ரன்களை இந்திய அணி குவித்தது. இதையடுத்து 359 ரன்கள் என்ற இமாலய இலக்கை கவனத்தில் கொண்டு தெ.ஆப்பிரிக்க அணி விளையாடியது.
ஆரம்பம் முதல் அதிரடியாக தென்னாப்பிரிக்க வீரர்கள் விளையாடினர். பிரமாண்ட ஸ்கோரை நினைத்து கவலைப்படாமல், அவர்கள் ரன் வேட்டையில் ஈடுபட்டனர். நாலாபுறமும் இந்திய அணியின் பந்துவீச்சை நொறுக்கித் தள்ளிய தெ.ஆப்பிரிக்க அணி வீரர்கள் மார்கரம் 110, பவுமா 46, ப்ரீட்ஸ்க் 68, ப்ரவீஸ் 54 ரன்களை குவித்தனர்.
இதையடுத்து வந்த வீரர்களும் அதிரடியில் கலக்கவே, தென்னாப்பிரிக்க அணி 49.2 ஓவர்களில் 6 விக்கெட்டுகளை மட்டுமே இழந்து 359 ரன்களை எடுத்து 4 விக்கெட்டுகள் வித்தியாசத்தில் போட்டியில் வென்றது.
இந்த வெற்றியின் மூலம் 3 போட்டிகள் கொண்ட தொடரில், இந்தியா, தெ.ஆப்பிரிக்கா ஆகியவை தலா ஒரு வெற்றி பெற்று, புள்ளிப் பட்டியலில் 1-1 என்று சமநிலை வகிக்கின்றன.
