2026 டி20 உலகக் கோப்பைக்கான இந்திய அணியில் இருந்து ஹர்ஷித் ராணா விலகியுள்ளதாகவும், அவருக்குப் பதிலாக முகமது சிராஜ் அணியில் சேர்க்கப்படலாம் என்றும் தகவல்கள் தெரிவிக்கின்றன. தென் ஆப்ரிக்காவுக்கு எதிரான பயிற்சி போட்டியின் போது ஹர்ஷித் ராணா காயமடைந்ததாக கூறப்படுகிறது. அவரது உடல் நிலை குறித்து மருத்துவக் குழு தொடர்ந்து கண்காணித்து வருவதாகவும் தகவல்கள் தெரிவிக்கின்றன.
2026 டி20 உலகக் கோப்பைக்கான கேப்டன்களின் செய்தியாளர் சந்திப்பின்போது, இந்திய கேப்டன் சூர்யகுமார் யாதவ், ஹர்ஷித் ராணாவை அணியிலிருந்து நீக்குவது குறித்து இதுவரை பரிசீலிக்கப்படவில்லை என்று தெரிவித்தார்.
ஆனால் இந்தியன் எக்ஸ்பிரஸ் வெளியிட்டுள்ள செய்தியின்படி, ஹர்ஷித் ராணா சரியான நேரத்திற்குள் முழு உடல் தகுதியை பெற முடியாத நிலை இருக்கலாம். அந்த அறிக்கையில், ஹர்ஷித் ராணா தொடர்பான இறுதி முடிவு இன்னும் எடுக்கப்படவில்லை என்றும், அவரது உடல்நிலை அவ்வளவு திருப்திகரமாக இல்லை என்றும் குறிப்பிடப்பட்டுள்ளது.
தென் ஆப்ரிக்காவுக்கு எதிரான வார்ம்-அப் போட்டியில், ஹர்ஷித் ராணா ஒரே ஓவரில் இரண்டு முறை தடுமாறி, தனது ரன்-அப்பை கூட முழுமையாக முடிக்க முடியாத நிலை ஏற்பட்டது. அந்த போட்டியின் போது, முழங்காலைக் கையால் பிடித்தபடி மைதானத்தை விட்டு வெளியேறினார் ஹர்ஷித்.
இந்திய அணியின் பந்துவீச்சில் ஹர்ஷித் ராணா முக்கியமான பங்காற்றி வந்தவர். அதோடு மட்டுமல்லாமல், எட்டாவது இடத்தில் களமிறங்கி அதிரடியான பேட்டிங் ஷாட்டுகளையும் அவர் வெளிப்படுத்தி வருகிறார். ஹர்ஷித்திற்குப் பதிலாக மாற்று வீரரைத் தேர்ந்தெடுப்பது கடினம் என்றும், ஆனால் இந்திய அணியிடம் பல மாற்று வழிகள் உள்ளன என்றும் கேப்டன் சூர்யகுமார் யாதவ் கூறியுள்ளார்.
தகவல்களின்படி, காயம் காரணமாக ஹர்ஷித் ராணாவுக்கு பதிலாக முகமது சிராஜ் அணியில் சேர்க்கப்பட வாய்ப்பு உள்ளது.சிராஜ், ஜூலை 2024க்கு பிறகு இந்திய அணிக்காக எந்த டி20 போட்டியிலும் விளையாடவில்லை. இருப்பினும், இதுவரை அவர் விளையாடிய 16 சர்வதேச டி20 போட்டிகளில் 14 விக்கெட்டுகளை கைப்பற்றியுள்ளார். மேலும், 2024 டி20 உலகக் கோப்பையை வென்ற இந்திய அணியில் அவரும் ஒரு பகுதியாக இருந்தார் என்பது குறிப்பிடத்தக்கது.
