திருச்சி-காரைக்கால் ரயில் சேவையில் மாற்றம்.. பயணிகளே நோட் பண்ணிக்கோங்க!

திருச்சி ரயில்வே கோட்டத்திற்குட்பட்ட திருவாரூர் மற்றும் கீழ்வேளூர் இடையே நடைபெற்று வரும் பொறியியல் பணிகள் காரணமாக, சில ரயில் சேவைகளில் தற்காலிக மாற்றங்கள் அறிவிக்கப்பட்டுள்ளன. தெற்கு ரயில்வே நிர்வாகம் வெளியிட்டுள்ள செய்திக்குறிப்பில் இந்தத் தகவல் தெரிவிக்கப்பட்டுள்ளது.

மாற்றப்பட்ட ரயில் சேவைகள்:

திருச்சி – காரைக்கால் டெமு ரயில் (வண்டி எண் 76820):

இன்றும் (திங்கட்கிழமை), ஜூன் 25, 26, 27, 28, 29 ஆகிய தேதிகளிலும் இந்த ரயில் திருச்சி ஜங்ஷனில் இருந்து காலை 8.35 மணிக்கு புறப்பட்டு திருவாரூர் வரை மட்டுமே இயக்கப்படும். அதாவது, திருவாரூர் – காரைக்கால் இடையே சேவை ரத்து செய்யப்பட்டுள்ளது.

காரைக்கால் – திருச்சி டெமு ரயில் (வண்டி எண் 76819):

இன்றும், ஜூன் 25, 26, 27, 28, 29 ஆகிய தேதிகளிலும் இந்த ரயில் காரைக்கால் – திருவாரூர் இடையே பகுதியாக ரத்து செய்யப்படுகிறது. இந்த ரயில் திருவாரூரில் இருந்து மாலை 4.15 மணிக்கு புறப்பட்டு திருச்சிக்கு வந்தடையும்.

காரைக்கால் – தஞ்சை பயணிகள் ரயில் (வண்டி எண் 56817):

இன்றும், ஜூன் 25, 26, 27, 28, 29 ஆகிய தேதிகளிலும் இந்த ரயில் காரைக்காலில் இருந்து பகல் 1 மணிக்கு புறப்பட்டு 30 நிமிடங்கள் தாமதமாக தஞ்சையை சென்றடையும்.

ரயில் பயணிகள் இந்த மாற்றங்களை கவனத்தில் கொண்டு தங்கள் பயணத்தைத் திட்டமிடுமாறு ரயில்வே கோட்ட நிர்வாகம் கேட்டுக்கொண்டுள்ளது.