தமிழகத்தில் கடந்த சில நாட்களாக ஏற்ற இறக்கத்துடன் காணப்பட்டு வந்த தங்கத்தின் விலை, இன்று (ஏப்ரல் 29) அதிரடியாக குறைந்து சவரன் ரூ.1.12 லட்சத்திற்கும் கீழ் வந்துள்ளது. சர்வதேச சந்தையில் நிலவும் பொருளாதார மாற்றங்கள் மற்றும் டாலரின் மதிப்பு போன்ற காரணங்களால், சென்னையில் ஆபரணத் தங்கத்தின் விலை இன்று சவரனுக்கு ரூ.1,200 வரை சரிந்துள்ளது. கடந்த இரண்டு நாட்களாகவே தங்கம் விலை குறைந்து வருவது நகைப்பிரியர்களுக்கு மகிழ்ச்சியை ஏற்படுத்தியுள்ளது.
விலை நிலவரத்தை விரிவாகப் பார்த்தால், சென்னையில் இன்று 22 கேரட் ஆபரணத் தங்கம் கிராமுக்கு ரூ.150 குறைந்து ரூ.13,950-க்கு விற்பனையாகிறது. இதன் மூலம் ஒரு சவரன் தங்கம் ரூ.1,11,600-க்கு விற்பனை செய்யப்படுகிறது. நேற்று சவரனுக்கு ரூ.1,040 குறைந்த நிலையில், இன்றும் பெரிய அளவில் சரிவு ஏற்பட்டுள்ளதால், கடந்த இரண்டு நாட்களில் மட்டும் தங்கம் விலை சவரனுக்கு ரூ.2,240 வரை குறைந்துள்ளது குறிப்பிடத்தக்கது.
வெள்ளி விலையைப் பொறுத்தவரையில் இன்று பெரிய மாற்றமின்றி நேற்றைய விலையிலேயே நீடிக்கிறது. ஒரு கிராம் வெள்ளி ரூ.265-க்கும், ஒரு கிலோ பார் வெள்ளி ரூ.2,65,000-க்கும் விற்பனையாகிறது. கடந்த சில மாதங்களாக உச்சத்தைத் தொட்டு வந்த தங்கம் விலை, தற்போது தொடர்ந்து சரிவைச் சந்தித்து வருவதால் கடைகளில் மக்கள் கூட்டம் அதிகரிக்கத் தொடங்கியுள்ளது.
