தென்காசியில் அரசு வழக்கறிஞர் பட்டப் பகலில் சரமாரியாக வெட்டி கொலை செய்யப்பட்ட சம்பவம் பெரும் பரபரப்பை ஏற்படுத்தியுள்ளது. இது குறித்து போலீஸார் விசாரணை நடத்தி வருகின்றனர்.
தென்காசி மாவட்டம், ஊர்மேலழகியான் கிராமத்தைச் சேர்ந்தவர் முத்துக்குமாரசாமி. இவருக்கு ராஜாத்தி என்ற மனைவியும், ஒரு மகள், ஒரு மகன் உள்ளனர். செங்கோட்டை நீதிமன்றத்தில் அரசு வழக்கறிஞராக பணியாற்றி வந்த முத்துக்குமாரசாமி, தென்காசி தெற்கு மாவட்ட திமுக வழக்கறிஞர் அணி துணை அமைப்பாளராகவும் இருந்தார். தென்காசி கூலக்கடை பஜாரில் அலுவலகம் வைத்துள்ளார்.
இன்று மதியம் முத்துக்குமாரசாமி தனது அலுவலகத்தில் இருந்தபோது அவரை மர்ம நபர் சரமாரியாக வெட்டிவிட்டு தப்பிச் சென்றுள்ளளார். இதில் பலத்த காயமடைந்த முத்துக்குமாரசாமி, உயிருக்கு போராடினார். இதைப் பார்த்த அக்கம்பக்கத்தில் உள்ளவர்கள், போலீஸாருக்கு தகவல் தெரிவித்தனர். தென்காசி போலீஸார் விரைந்து சென்று, முத்துக்குமாரசாமியை மீட்டு சிகிச்சைக்காக தென்காசி அரசு மருத்துவமனைக்கு அனுப்பிவைத்தனர்.
எப்போதும் மக்கள் நடமாட்டம் அதிகம் உள்ள பகுதியில், பட்டப் பகலில் நடைபெற்ற இந்தச் சம்பவம் அப்பகுதியில் பதற்றத்தை ஏற்படுத்தியது. இதுகுறித்து தகவல் அறிந்த சக வழக்கறிஞர்கள் தென்காசி அரசு மருத்துவமனை அருகில் திரண்டு, சாலை மறியல் போராட்டத்தில் ஈடுபட்டனர்.
