தமிழக சட்டசபை தேர்தலுக்கான வாக்கு எண்ணிக்கை நாளை நடைபெறுவதையொட்டி, மாநிலம் முழுவதும் விரிவான பாதுகாப்பு மற்றும் நிர்வாக ஏற்பாடுகள் செய்யப்பட்டுள்ளன. கடந்த மாதம் 23-ம் தேதி வாக்குப்பதிவு நிறைவடைந்த நிலையில், 234 தொகுதிகளிலும் பயன்படுத்தப்பட்ட மின்னணு வாக்குப்பதிவு இயந்திரங்கள் 62 மையங்களில் மூன்று அடுக்கு பாதுகாப்பின் கீழ் வைக்கப்பட்டுள்ளன. இந்த மையங்களில் 18 ஆயிரம் காவல்துறையினரும், 40-க்கும் மேற்பட்ட கம்பெனி துணை ராணுவப் படையினரும் துப்பாக்கி ஏந்திய நிலையில் தீவிர கண்காணிப்புப் பணியில் ஈடுபட்டுள்ளனர்.
வாக்கு எண்ணிக்கை நடைமுறைகள் குறித்து விளக்கம் அளித்துள்ள தமிழக தலைமை தேர்தல் அதிகாரி அர்ச்சனா பட்நாயக் வெளியிட்ட அறிக்கையில், மின்னணு இயந்திரங்கள் மற்றும் தபால் வாக்குகளை எண்ணுவதற்குத் தனித்தனியாக அறைகள் ஒதுக்கப்பட்டுள்ளதாகத் தெரிவித்துள்ளார். மொத்தம் 234 அறைகளில் இயந்திர வாக்குகளும், 240 அறைகளில் தபால் வாக்குகளும் எண்ணப்பட உள்ளன. இதற்காக 3,324 மேஜைகள் அமைக்கப்பட்டு, 10,545 பணியாளர்கள் இப்பணியில் ஈடுபடுத்தப்பட்டுள்ளனர். மேலும், வெளிப்படைத்தன்மையை உறுதி செய்ய 4,624 நுண் பார்வையாளர்களும், தேர்தல் ஆணையத்தால் நியமிக்கப்பட்ட 234 பார்வையாளர்களும் இப்பணிகளை நேரில் கண்காணிப்பார்கள்.
தேர்தல் ஆணையம் இம்முறை ஒரு புதிய பாதுகாப்பு முயற்சியாக, ‘கியூஆர் கோடு’ (QR Code) வசதியுடன் கூடிய புகைப்பட அடையாள அட்டையை அறிமுகப்படுத்தியுள்ளது. இதன் மூலம் அனுமதி பெற்றவர்கள் மட்டுமே ஸ்கேன் செய்யப்பட்டு மையத்திற்குள் அனுமதிக்கப்படுவார்கள். தபால் வாக்குகளை எண்ணுவதற்கு ஏதுவாக கூடுதலாக 1,135 உதவி தேர்தல் நடத்தும் அலுவலர்கள் நியமிக்கப்பட்டுள்ளனர். நாளை காலை 8 மணிக்கு முதலில் தபால் வாக்குகளுடன் தொடங்கும் இந்த எண்ணிக்கை, காலை 8:30 மணி முதல் மின்னணு இயந்திரங்களில் பதிவான வாக்குகளை எண்ணும் பணியாகத் தொடரும்.
ஒவ்வொரு சுற்றின் முடிவுகளும் அந்தந்த மையங்களில் ஒலிபெருக்கி வாயிலாக உடனுக்குடன் அறிவிக்கப்படும். பொதுமக்கள் மற்றும் அரசியல் கட்சியினர் தேர்தல் முடிவுகளைத் துல்லியமாகத் தெரிந்துகொள்ள ‘ECI-NET’ செயலி மற்றும் தேர்தல் ஆணையத்தின் அதிகாரப்பூர்வ இணையதளமான results.eci.gov.in ஆகியவற்றிலும் தகவல்கள் பதிவேற்றப்படும். சுமூகமான முறையில் வாக்கு எண்ணிக்கையை நடத்தி முடிக்க அனைத்து மாவட்ட நிர்வாகங்களும் தயார் நிலையில் உள்ளதாகத் தேர்தல் ஆணையம் உறுதி அளித்துள்ளது.
