சென்னை மக்களின் பெருகிவரும் குடிநீர் தேவையைக் கருத்தில்கொண்டு, கோவளம் அருகே ரூ.471 கோடி செலவில் 4,375 ஏக்கர் பரப்பளவில் புதிய நீர்த்தேக்கம் அமைக்கும் திட்டம் தமிழக அரசால் அறிவிக்கப்பட்டது. ஆனால், இந்த திட்டத்திற்கான சுற்றுச்சூழல் அனுமதி கோரி நீர்வளத்துறை சமர்ப்பித்த விண்ணப்பத்தை, மாநில நிபுணர் மதிப்பீட்டு குழு (SEAC) திருப்பி அனுப்பியுள்ளது.
சென்னையின் மக்கள்தொகை நாளுக்கு நாள் அதிகரித்து வருவதால், குடிநீர் தேவையும் கணிசமாக உயர்ந்து வருகிறது. தற்போது, சென்னைக்கு நாளொன்றுக்கு 1100 மில்லியன் லிட்டர் குடிநீர் விநியோகிக்கப்படுகிறது. இதில் 350 மில்லியன் லிட்டர் நீர் கடல்நீரை குடிநீராக்கும் நிலையங்கள் மூலமாகவும், மீதமுள்ள 750 மில்லியன் லிட்டர் நீர் ஏரிகள் மூலமாகவும் பெறப்படுகிறது. இந்த தேவை 2035 ஆம் ஆண்டில் 2523 மில்லியன் லிட்டராகவும், 2050 ஆம் ஆண்டில் 3756 மில்லியன் லிட்டராகவும் உயரும் என்று கணிக்கப்பட்டுள்ளது. இதைக் கருத்தில்கொண்டு, திருப்போரூர் வட்டம், கோவளம் அருகே சென்னையின் 6-வது நீர்த்தேக்கம் அமைக்கப்படும் என தமிழக அரசின் பட்ஜெட்டில் அறிவிக்கப்பட்டது.
இந்த அறிவிப்பின்படி, நீர்த்தேக்கம் கட்டுமானப் பணிகளை மேற்கொள்ள சுற்றுச்சூழல் அனுமதி கோரி நீர்வளத்துறை விண்ணப்பித்தது. இந்த விண்ணப்பத்தைப் பரிசீலனை செய்த மாநில நிபுணர் மதிப்பீட்டு குழு, இந்த திட்டத்திற்கு சுற்றுச்சூழல் அனுமதி தேவையில்லை என்றும், கடலோர மண்டல ஒழுங்குமுறை ஆணையத்தின் (CRZ) அனுமதிதான் தேவை என்றும் தெரிவித்து விண்ணப்பத்தைத் திருப்பி அனுப்பியுள்ளது. மேலும், மழைநீர் கால்வாயில் வரும் நீரை சுத்திகரிப்பு செய்து இந்த நீர்த்தேக்கத்தில் விடுவது தொடர்பாக சாத்தியக்கூறுகளை ஆய்வு செய்ய வேண்டும் என்றும் அக்குழு பரிந்துரைத்துள்ளது.
பழைய மாமல்லபுரம் சாலை மற்றும் கிழக்கு கடற்கரைச் சாலைகளுக்கு இடையில் அமையவுள்ள இந்த நீர்த்தேக்கம், ஆண்டுக்கு 2.25 டிஎம்சி வெள்ளநீரை சேமிக்கும் வகையிலும், 1.6 டிஎம்சி கொள்ளளவுடனும் ரூ.471 கோடியில் அமைக்க திட்டமிடப்பட்டுள்ளது. இதன் மூலம் ஆண்டுக்கு 170 மில்லியன் லிட்டர் குடிநீர் கிடைக்கும் என்றும், இது சென்னை மக்களின் குடிநீர் தேவையைப் பூர்த்தி செய்யும் என்றும் எதிர்பார்க்கப்படுகிறது.
இந்த புதிய திருப்பம் திட்டப்பணிகளை எவ்வாறு பாதிக்கும் என்பதை பொறுத்திருந்துதான் பார்க்க வேண்டும்.
