தமிழகத்தின் பாரம்பரிய காலை உணவு வகைகளில் மிகவும் பிரபலமான உணவான இட்லி இந்தியாவில் 2025ஆம் ஆண்டில் இணையத்தில் அதிகம் தேடப்பட்ட உணவுகளின் பட்டியலில் முதலிடத்தை பிடித்துள்ளது.
இட்லி என்பது தென்னிந்தியாவின் பிரதான உணவாக இருந்து வருகிறது. அனைவருமே விரும்பி சாப்பிடும் இந்த காலை உணவு, குழந்தைகளிலிருந்து முதியவர்கள் வரை அனைவருக்கும் ஏற்றதாகும். என்னதான் இன்று நமது ஊர்களில் வித விதமாக புதிய உணவு வந்துவிட்டாலும், இட்லிக்கு இருக்கும் மவுசு என்றும் குறைவதில்லை. ஏனெனில் இட்லி செய்வது ரொம்ப எளிது, அதே நேரம் இதில் நம் உடலுக்கு கேடு விளைவிக்கும் எந்தப் பொருட்களும் கலக்கப்படுவதில்லை. முழுவதும் ஆவியில் வேகவைத்து சமைக்கப்படும் உணவு என்பதால், அனைவரின் தேர்வாகவும் இது இருக்கிறது.
இந்தநிலையில், இந்தியாவில் 2025ஆம் ஆண்டில் இணையத்தில் அதிகம் தேடப்பட்ட உணவுகளின் பட்டியல் வெளியிடப்பட்டுள்ளது. அதன்படி, தமிழகத்தின் பாரம்பரிய காலை உணவு வகைகளில் மிகவும் பிரபலமான உணவான இட்லி தான் முதலிடத்தில் உள்ளது.
இரண்டாவது இடத்தில் Pornstar Martini உள்ளது. இது மிகவும் பிரபலமான மற்றும் நவீனமான ஒரு காக்டெய்ல் ஆகும். இதனைத்தொடர்ந்து மூன்றாவது இடத்தில் மிகவும் பிரபலமான உணவான Modak / Ukadiche Modak உள்ளது. நான்காவது இடத்தில் Thekua உள்ளது. இது வட இந்திய மாநிலங்களில் மிகவும் பிரபலமான ஒரு பாரம்பரிய இனிப்பு ஆகும்.
ஐந்தாவது இடத்தில் உகாதி பச்சடி உள்ளது. இது ஆந்திரா, தெலுங்கானா மற்றும் கர்நாடக மாநிலங்களின் ஒரு பாரம்பரிய பிரசாதமாகும். ஆறாவது இடத்தில் பீட்ரூட் கஞ்சியும், ஏழாவது இடத்தில் திருவாதிரை களி உள்ளது. திருவாதிரை களி மார்கழி மாதத்தில் வரும் திருவாதிரை திருநாளன்று சிவபெருமானுக்குப் படைக்கப்படும் பிரசாதமாகும்.
எட்டாவது இடத்தில் Yorkshire Pudding உள்ளது. இது இங்கிலாந்தில் மிகவும் பிரபலமான ஒரு பாரம்பரிய உணவு வகையாகும். இறுதியாக ஒன்பதாவது இடத்தில் கோந்து கட்டிராவும், பத்தாவது இடத்தில் தென்னிந்தியாவின் மிக பிரபலமான உணவுகளில் ஒன்றான கொழுக்கட்டை உள்ளது.
