2025-ம் ஆண்டில் வெளியான 1,519-க்கும் மேற்பட்ட திரைப்படங்களில் 10 படங்கள் மட்டுமே பிரம்மாண்ட வெற்றி பெற்றுள்ளதாக புள்ளி விவரங்கள் தெரிவிக்கின்றன.
ஒவ்வொரு வருடமும் இந்தியாவில் உருவாகும் படங்களின் எண்ணிக்கை அதிகரித்து வருகிறது. இந்த வருடமும் தமிழ் உள்ளிட்ட பல்வேறு மொழிகளில் அதிக திரைப்படங்கள் உருவாகியுள்ளன. இந்தியா முழுவதும் பல மொழிகளில் சுமார் 1,519-க்கும் மேற்பட்ட திரைப்படங்கள் இந்தாண்டு வெளியாகி இருக்கின்றன. இதன் மூலம் மொத்தம் ரூ.12,291 கோடி வசூலாகியுள்ளன. இதில், 10 படங்கள் மட்டும் ரூ.4,443 கோடியை ஈட்டி அதிக வசூல் செய்த இந்தியத் திரைப்படங்களாக உருவெடுத்துள்ளன.
இதில் ரன்வீர் சிங், சாரா அர்ஜுன், மாதவன் நடித்த ‘துரந்தர்’, வசூலில் முதலிடத்தில் இருந்த ரிஷப் ஷெட்டியின் ‘காந்தாரா: சாப்டர் 1’ திரைப்படத்தை முந்தியிருக்கிறது. ‘துரந்தர்’ இந்தியாவில் ரூ.600 கோடியும் உலகம் முழுவதும் இப்போது வரை ரூ.925 கோடியையும் வசூலித்து ஓடிக் கொண்டிருக்கிறது. இதன் வசூல் இன்னும் அதிகரிக்கும் என்று கூறப்படுகிறது.
‘காந்தாரா: சாப்டர் 1’ திரைப்படம் இந்தியாவில் மட்டும் ரூ.622 கோடியும் உலகம் முழுவதும் ரூ.852 கோடியும் வசூலித்துள்ளது. விக்கி கவுஷல் நடித்து சூப்பர் ஹிட்டான ‘ஜாவா’ திரைப்படம், இந்தியாவில் மட்டும் ரூ.601 கோடியையும் உலகம் முழுவதும் ரூ.807 கோடியையும் ஈட்டியுள்ளது.
அஹான் பாண்டே, அனீத் பட்டா நடித்த ‘சயாரா’, இந்தியாவில் ரூ.330 கோடியும் உலகம் முழுவதும் ரூ.570 கோடியும் வசூலித்துள்ளது. முன்னணி ஹீரோக்கள் இல்லாத புதுமுக நடிகர்களின் படம் இவ்வளவு வசூலித்திருப்பது பாலிவுட்டில் ஆச்சரியத்தை ஏற்படுத்தியுள்ளது.
தமிழில் உருவாகி மற்ற மொழிகளில் மொழிமாற்றம் செய்யப்பட்ட ரஜினியின் ‘கூலி’, இந்தியாவில் ரூ.285 கோடியும் உலகம் முழுவதும் ரூ.518 கோடியையும் பெற்றுள்ளது. லோகேஷ் கனகராஜ் இயக்கியிருந்த இப்படம் அதிக எதிர்பார்ப்பை ஏற்படுத்தி இருந்தது.
இதற்கு அடுத்தடுத்த இடங்களில், வார் 2 (உலகம் முழுவதும் ரூ.364 கோடி), மகாவதார் நரசிம்மா (ரூ.326 கோடி), லோகா சாப்டர் 1: சந்திரா (ரூ.303 கோடி), பவன் கல்யாணின் ஓஜி (ரூ.295 கோடி), அக் ஷய்குமாரின் ஹவுஸ்புல் 5 (ரூ.288 கோடி) ஆகிய திரைப்படங்கள் உள்ளன.
