இந்திய தேசிய நெடுஞ்சாலை ஆணையம் (NHAI), வரும் ஏப்ரல் 1, 2026 முதல் நடைமுறைக்கு வரும் வகையில் FASTag வருடாந்திர பாஸ் கட்டணத்தை உயர்த்தி அறிவித்துள்ளது. 2026-27 நிதியாண்டிற்கான இந்த மாற்றங்கள் நெடுஞ்சாலைப் பயணிகளின் பட்ஜெட்டில் சிறிய தாக்கத்தை ஏற்படுத்தும்.
அதன்படி, இதுவரை ரூ.3000 ஆக இருந்த வருடாந்திர பாஸ் கட்டணம், தற்போது ரூ.3,075 ஆக உயர்த்தப்பட்டுள்ளது. அதாவது, சுமார் 2.5% அல்லது ரூ.75 கூடுதலாக வசூலிக்கப்பட உள்ளது. கார்கள், ஜீப்கள் மற்றும் வேன்கள் போன்ற வணிக ரீதியல்லாத தனியார் வாகனங்களுக்கு மட்டுமே இந்த பாஸ் பொருந்தும்.
இந்த பாஸ் வாங்கிய தேதியிலிருந்து ஒரு வருடம் அல்லது 200 முறை சுங்கச்சாவடிகளைக் கடக்கும் வரை செல்லுபடியாகும். நாடு முழுவதும் உள்ள சுமார் 1,150 தேசிய நெடுஞ்சாலை சுங்கச்சாவடிகளில் இதனைப் பயன்படுத்தலாம். 200 முறையைத் தாண்டியவுடன், உங்கள் FASTag தானாகவே சாதாரண நிலைக்குத் திரும்பிவிடும் (வழக்கமான கட்டணம் கழிக்கப்படும்).
FASTag வருடாந்திர பாஸ் ஆன்லைனில் வாங்குவது எப்படி?
நீங்கள் புதிய பாஸ் வாங்கவோ அல்லது புதுப்பிக்கவோ விரும்பினால், கீழ்க்கண்ட எளிய வழிமுறைகளைப் பின்பற்றலாம்:
படி 1:உங்கள் மொபைலில் ‘Rajmarg Yatra’ செயலியைப் பதிவிறக்கவும் அல்லது NHAI அதிகாரப்பூர்வ இணையதளத்திற்குச் செல்லவும்.
படி 2: உங்கள் வாகன எண் மற்றும் FASTag ஐடி (ID) விவரங்களை உள்ளிட்டு லாகின் செய்யவும்.
படி 3: ‘Annual Pass’ என்ற விருப்பத்தைத் தேர்ந்தெடுக்கவும்.
படி 4: உங்கள் வாகனம் தகுதியானதுதானா என்பதை உறுதி செய்துவிட்டு, ரூ.3075 (ஏப்ரல் 1-க்கு முன் ₹3,000) தொகையை UPI, டெபிட்/கிரெடிட் கார்டு அல்லது நெட் பேங்கிங் மூலம் செலுத்தவும்.
படி 5: பணம் செலுத்திய 2 மணி நேரத்திற்குள் உங்கள் வாகனத்தின் FASTag உடன் இந்த பாஸ் இணைக்கப்பட்டுச் செயல்படத் தொடங்கும்.
