இதயத்தை பாதுகாக்கும் கோவிட் தடுப்பூசிகள்!. கட்டுக்கதைகளை நம்பாதீர்கள்!. புதிய ஆய்வின் உண்மை!

கோவிட்-19 தடுப்பூசிகள் தொற்றுநோயிலிருந்து மட்டுமல்லாமல், நீண்டகால இதய ஆரோக்கியத்திற்கும் முக்கியப் பாதுகாப்பு அரணாக விளங்குவதாகப் புதிய ஆய்வுகள் தெரிவிக்கின்றன. இதயம் தொடர்பான சிக்கல்கள் குறித்துப் பரப்பப்படும் தவறான கருத்துகளைக் களைந்து, தடுப்பூசியின் நன்மைகளைப் புரிந்துகொள்ளுமாறு இதய சிகிச்சை நிபுணர்கள் பொதுமக்களுக்கு வேண்டுகோள் விடுத்துள்ளனர்.

ஜேஏஎம்ஏ இண்டர்னல் மெடிசின்’ (JAMA Internal Medicine) இதழில் வெளியான சமீபத்திய ஆய்வின்படி, கோவிட்-19 தடுப்பூசி செலுத்திக்கொண்டவர்களுக்கு மாரடைப்பு மற்றும் பக்கவாதம் ஏற்படும் அபாயம் சுமார் 40 சதவீதம் வரை குறைவதாகத் தெரியவந்துள்ளது. இது குறித்து கருத்து தெரிவித்த பாரஸ் ஹெல்த் நிறுவனத்தின் இதய சிகிச்சை நிபுணர் டாக்டர் அமித் பூஷன் சர்மா, “கோவிட்-19 நோய்த்தொற்றால் ஏற்படும் ஆபத்து, தடுப்பூசியால் ஏற்படக்கூடிய அரிதான பக்கவிளைவுகளை விட மிக அதிகம் என்பதை மக்கள் புரிந்துகொள்ள வேண்டும்” என்று குறிப்பிட்டார்.

கோவிட்-19 நுரையீரலைப் பாதிப்பது மட்டுமல்லாமல், இதய அமைப்பையும் மோசமாகப் பாதிக்கிறது. தொற்று உடலில் கடுமையான வீக்கத்தை  உருவாக்குவதோடு, இரத்த உறைதல், மாரடைப்பு, இதயத் துடிப்பு சீரின்மை மற்றும் இதய செயலிழப்பு போன்ற நீண்டகாலப் பாதிப்புகளை ஏற்படுத்தக்கூடும். இந்த அபாயங்களைக் குறைக்க தடுப்பூசி ஒரு மிகச்சிறந்த கருவியாகச் செயல்படுகிறது.

தடுப்பூசிகள் குறித்து சமூக வலைதளங்களில் உலவும் ஆதாரமற்ற கருத்துகளை நம்ப வேண்டாம் என்று ஆஸ்டர் சிஎம்ஐ மருத்துவமனையின் மூத்த இதய சிகிச்சை நிபுணர் டாக்டர் சஞ்சய் பட் அறிவுறுத்தியுள்ளார். “மக்கள் தங்கள் சந்தேகங்களை மருத்துவர்களிடம் கேட்டுத் தெளிவுபெற வேண்டும். அச்சத்தை உண்டாக்கும் தகவல்களைப் புறந்தள்ளிவிட்டு, அறிவியல் பூர்வமான உண்மைகளின் அடிப்படையில் முடிவுகளை எடுக்க வேண்டும்” என்று அவர் கேட்டுக்கொண்டார்.

நன்மைகள்: தடுப்பூசி செலுத்துவதன் மூலம், மாரடைப்பு மற்றும் பக்கவாதம் ஏற்படும் அபாயம் குறைகிறது. இரத்த உறைதல் தொடர்பான சிக்கல்கள் தடுக்கப்படுகின்றன.  கோவிட்-19 தொற்றின் கடுமையான பாதிப்புகள் மற்றும் உயிரிழப்புகள் தடுக்கப்படுகின்றன.

தடுப்பூசி என்பது வெறும் தொற்று தடுப்பு மட்டுமல்ல, அது எதிர்கால இதய ஆரோக்கியத்தைப் பாதுகாக்கும் ஒரு முன்னெச்சரிக்கை நடவடிக்கையும் கூட. அறிவியல் ஆதாரங்களுடன் கூடிய வெளிப்படையான தகவல்களே மக்களின் நம்பிக்கையை மீட்டெடுக்க உதவும் என்று மருத்துவர்கள் வலியுறுத்துகின்றனர்.