அமெரிக்க அதிபர் டொனால்ட் டிரம்பின் நெருங்கிய அரசியல் கூட்டாளியும், தெற்கு கரோலினா மாநிலத்தைச் சேர்ந்த குடியரசுக் கட்சி செனட்டருமான லின்ட்சி கிரஹாம் (71) திடீர் உடல்நலக்குறைவால் காலமானார்.
இந்த தகவலை அவரது அலுவலகம் அதிகாரப்பூர்வமாக உறுதிப்படுத்தியுள்ளது. குடும்பத்தினர் இந்த துயரமான நேரத்தில் தனியுரிமையை மதிக்குமாறும், அவர்களுக்காக பிரார்த்தனை செய்யுமாறும் கேட்டுக்கொண்டுள்ளனர்.
இதையடுத்து, தனது Truth Social தளத்தில் இரங்கல் பதிவு வெளியிட்ட அமெரிக்க அதிபர் டொனால்ட் டிரம்ப், “நான் அறிந்த மிகச் சிறந்த மனிதர்களிலும், மிகச் சிறந்த செனட்டர்களிலும் ஒருவரான லின்ட்சி கிரஹாம் மறைந்துவிட்டார். அவர் எப்போதும் நாட்டிற்காக உழைத்த உண்மையான அமெரிக்க தேசபக்தர். அவரது மறைவு மிகப்பெரிய இழப்பு. இறுதிச்சடங்கு உள்ளிட்ட விவரங்கள் பின்னர் அறிவிக்கப்படும். இது மிகவும் சோகமான செய்தி” என்று தெரிவித்துள்ளார்.
செனட் பெரும்பான்மை தலைவர் அஞ்சலி
அமெரிக்க செனட் பெரும்பான்மைத் தலைவர் ஜான் தியூன், லின்ட்சி கிரஹாமை தனது நெருங்கிய நண்பரும் சக உறுப்பினருமாக நினைவுகூர்ந்தார்.
அவர் வெளியிட்ட இரங்கல் செய்தியில், “விமானப்படையிலும், காங்கிரஸிலும் அவர் ஆற்றிய நீண்டகால சேவை உலகின் பல பகுதிகளுக்கு அவரை அழைத்துச் சென்றது. அமெரிக்காவின் நலன்களுக்காகவும், சுதந்திரத்தை விரும்பும் நாடுகளுக்காகவும் அவர் உறுதுணையாக இருந்தார். கூட்டாட்சி நீதித்துறை, தேசிய பாதுகாப்பு மற்றும் தெற்கு கரோலினா மாநில வளர்ச்சியில் அவர் ஏற்படுத்திய தாக்கம் தலைமுறைகள் கடந்தும் நினைவுகூரப்படும்” என்று குறிப்பிட்டுள்ளார்.
நெதன்யாகு, ஜெலன்ஸ்கி இரங்கல்
இஸ்ரேல் பிரதமர் பெஞ்சமின் நெதன்யாகு, லின்ட்சி கிரஹாமை “இஸ்ரேலின் மிகச் சிறந்த நண்பர்களில் ஒருவர்” என்று புகழ்ந்து இரங்கல் தெரிவித்துள்ளார்.
உக்ரைன் அதிபர் வோலோடிமிர் ஜெலன்ஸ்கி தனது இரங்கல் பதிவில், “லின்ட்சி கிரஹாம் சுதந்திரத்தின் உண்மையான பாதுகாவலர். உக்ரைனுக்கு இரு கட்சிகளின் ஆதரவைப் பெற அவர் தொடர்ந்து பாடுபட்டார். ரஷ்யாவுக்கு எதிரான கடுமையான தடைகள் உள்ளிட்ட அமைதிக்கான முயற்சிகளில் அண்மைக் காலமாக தீவிரமாக ஈடுபட்டிருந்தார். உக்ரைன் மக்களுக்காக அவர் ஆற்றிய பங்களிப்பை நாங்கள் என்றும் மறக்க மாட்டோம்” என்று தெரிவித்துள்ளார்.
2002-ஆம் ஆண்டு அமெரிக்க செனட்டிற்கு தேர்ந்தெடுக்கப்பட்ட லின்ட்சி கிரஹாம், முன்னாள் தெற்கு கரோலினா ஆளுநரும் செனட்டருமான ஸ்ட்ரோம் தர்மண்டிற்குப் பிறகு அந்தப் பதவியை ஏற்றார். தேசிய பாதுகாப்பு, வெளிநாட்டு கொள்கை மற்றும் அமெரிக்காவின் சர்வதேச உறவுகளில் முக்கிய பங்கு வகித்த அரசியல்வாதியாக அவர் அறியப்பட்டார்.
