தமிழகத்தில் ஜூலை மாதத்துக்கான வீட்டு மின் கட்டணம் வழக்கத்தை விட 2 முதல் 3 மடங்கு அதிகமாக வந்துள்ளதாக பல்வேறு தரப்பினரிடமிருந்தும் புகார்கள் எழுந்ததைத் தொடர்ந்து, மே மாதக் கட்டணத்துடன் ஒப்பிடும்போது அதிக மாறுபாடு கொண்ட 3.70 லட்சம் வீட்டு மின் இணைப்புகளைக் கள ஆய்வு செய்து மறு பரிசீலனை செய்ய தமிழ்நாடு மின்சார வாரியம் உத்தரவிட்டுள்ளது.
ஜூலை மாதத்திற்கான இருமாத மின் கட்டணம் வழக்கத்தை விட அதிகமாக வந்துள்ளதாக நுகர்வோர் வேதனை தெரிவித்தனர். கடந்த முறை ரூ.300 முதல் ரூ.400 வரை மின் கட்டணம் செலுத்தியவர்களுக்கு இந்த முறை ரூ.800 முதல் ரூ.1,000 வரை கட்டணம் விதிக்கப்பட்டுள்ளதாகவும், இலவச மின்சாரச் சலுகைகள் இருந்தும் அதிகத் தொகை வசூலிக்கப்பட்டுள்ளதாகவும் சமூக வலைதளங்களில் பொதுமக்கள் தொடர்ந்து புகார்களைப் பதிவிட்டு வந்தனர்.
பொதுமக்களின் புகார்களைத் தொடர்ந்து, மின்சார வாரியம் மூத்த அதிகாரிகளைக் கொண்டு நேரடியாக மறுஆய்வு நடத்த முடிவு செய்துள்ளது. இதற்காக அதிகாரிகளுக்கு ஆய்வு இலக்குகள் நிர்ணயிக்கப்பட்டுள்ளன: தலைமைப் பொறியாளர்களுக்கு தலா 25 இணைப்புகள், கண்காணிப்பு/மேற்பார்வைப் பொறியாளர்களுக்கு தலா 50 இணைப்புகள், செயற்பொறியாளர்களுக்கு தலா 75 இணைப்புகள் என நிர்ணயிக்கப்பட்டுள்ளது. உதவி செயற்பொறியாளர்கள் & உதவிப் பொறியாளர்களுக்கு தலா 100 இணைப்புகள், கணக்கு அலுவலர்கள் & மதிப்பீட்டு அதிகாரிகளுக்கு தலா 100 முதல் 150 இணைப்புகள் வரை நிர்ணயிக்கப்பட்டுள்ளது.
இந்த 3.70 லட்சம் மின் இணைப்புகளின் நேரடி கள ஆய்வை ஆகஸ்ட் 7-ம் தேதிக்குள் நிறைவு செய்து அறிக்கை சமர்ப்பிக்க உத்தரவிடப்பட்டுள்ளது. ஆய்வின்போது மீட்டர் கணக்கெடுப்பு, கணக்கீடு அல்லது கட்டண நிர்ணயத்தில் ஏதேனும் பிழைகள்/தவறுகள் கண்டறியப்பட்டால், உடனடியாக உரிய திருத்த நடவடிக்கைகளை மேற்கொள்ள வேண்டும் என்றும் அறிவுறுத்தப்பட்டுள்ளது.
கடும் கோடை வெயில் காரணமாக வீடுகளில் A/C மற்றும் மின் விசிறிகளின் பயன்பாடு அதிகரித்ததே மின் நுகர்வு உயர முக்கியக் காரணம் என அதிகாரிகள் தெரிவித்தாலும், புகார்களின் உண்மைத்தன்மையை அறியவே இந்த விரிவான கள ஆய்வு நடத்தப்படுவதாகத் தெரிவித்துள்ளனர்.
