உக்ரைன் மீதான போருக்கு நிதி திரட்டுவதைத் தடுக்கும் நோக்கில், ரஷ்யாவின் எரிசக்தித் துறை மற்றும் அந்நாட்டிடம் இருந்து கச்சா எண்ணெய் வாங்கும் இந்தியா, சீனா உள்ளிட்ட நாடுகள் மீது கடும் தடைகளை விதிக்க வகை செய்யும் புதிய மசோதா அமெரிக்க செனட் சபையில் நிறைவேற்றப்பட்டுள்ளது.
‘லிண்ட்சே ஓ கிரகாம் ரஷ்யா மற்றும் ஈரான் தடைகள் சட்டம் 2026’ (Lindsey O Graham Sanctioning Russia and Iran Act of 2026) என்ற பெயரிலான இந்த மசோதாவுக்கு ஆதரவாக 86 வாக்குகளும், எதிர்த்து 11 வாக்குகளும் பதிவாகின. உக்ரைன் போரைக் காரணம்காட்டி ரஷ்யா மீது தடைகளை விதிக்க தீவிரமாக வலியுறுத்தி வந்த குடியரசுக் கட்சியின் மூத்த செனட்டர் லிண்ட்சே கிரகாம் கடந்த ஜூலை 11 அன்று காலமானதைத் தொடர்ந்து, அவரது நினைவாகவே இந்த மசோதாவுக்கு இப்பெயர் சூட்டப்பட்டுள்ளது.
தற்போது அமெரிக்க நாடாளுமன்றத்திற்கு கோடைகால விடுமுறை என்பதால், பிரதிநிதிகள் சபையில் இந்த மசோதா மீதான வாக்கெடுப்பு வரும் செப்டம்பர் மாதத்தில் நடைபெறும் என எதிர்பார்க்கப்படுகிறது.
இந்த மசோதாவின் முதன்மை இலக்கு ரஷ்யாவின் எரிசக்தி துறையாகும். இது சட்டமானால், ரஷ்யாவில் இருந்து இறக்குமதி செய்யப்படும் எண்ணெய் மற்றும் எரிவாயு மீது 500 சதவீதம் வரை வரிகளை விதிக்க டிரம்பின் நிர்வாகத்திற்கு அதிகாரம் கிடைக்கும்.
மேலும், ரஷ்யாவிடம் இருந்து அதிக அளவில் கச்சா எண்ணெய் இறக்குமதி செய்யும் இந்தியா, சீனா, அஜர்பைஜான், ஹங்கேரி மற்றும் ஸ்லோவாக்கியா ஆகிய ஐந்து நாடுகளின் இறக்குமதிகள் மீதும் 100 சதவீதம் வரை கூடுதல் வரிகளை விதிக்க இந்த மசோதா அமெரிக்க அரசுக்கு வழிவகை செய்கிறது.
எரிசக்தித் துறையைத் தவிர்த்து, ரஷ்ய அதிபர் விளாதிமிர் புடின், அந்நாட்டின் முக்கிய அதிகாரிகள், தொழிலதிபர்கள் மற்றும் நிதி நிறுவனங்கள் மீதும் தடைகள் விதிக்கப்படவுள்ளன. அத்துடன், ஈரான் எரிசக்தித் துறையில் முதலீடு செய்யும் நிறுவனங்களுக்குத் தண்டனை விதிக்கும் ‘ஈரான் தடைகள் சட்டம் 1996’-ன் காலவரையறை 2031 வரை நீட்டிக்கப்பட உள்ளது.
இந்த நடவடிக்கை ரஷ்யாவைப் பேச்சுவார்த்தைக்குக் கொண்டுவந்து போரை முடிவுக்குக் கொண்டுவர உதவும் என அமெரிக்கக் குடியரசுக் கட்சியினர் தெரிவிக்கின்றனர். ஆனால், அதிபர் டொனால்ட் டிரம்ப் வரிகளை ஆயுதமாகப் பயன்படுத்தி வர்த்தகப் போரை உருவாக்குவதாகவும், இதனால் அமெரிக்க மக்களே பாதிப்புக்குள்ளாவார்கள் என்றும் ஜனநாயகக் கட்சியினர் இத்திட்டத்திற்கு எதிர்ப்பு தெரிவித்து விமர்சித்துள்ளனர்.
