கால்பந்து உலகின் ஜாம்பவான் லியோனல் மெஸ்ஸியின் மடியில் 6 மாத குழந்தையாக இருந்த சிறுவன், இன்று உலகக் கோப்பை கால்பந்து தொடரில் தனது முதல் கோலை அடித்து வரலாற்றுச் சாதனை படைத்துள்ளார்.
ஸ்பெயின் நாட்டின் இளம் நட்சத்திரமான லாமின் யமால் (Lamine Yamal), சவூதி அரேபியாவுக்கு எதிரான உலகக் கோப்பை போட்டியில் இந்த மைல்கல்லை எட்டியுள்ளார். இதன் மூலம் மெஸ்ஸி மற்றும் யமால் ஆகிய இருவருக்கு இடையே ஆச்சரியமூட்டும் சில அரிய தற்செயல் நிகழ்வுகள் நடந்துள்ளன.
கடந்த 2006ஆம் ஆண்டு லியோனல் மெஸ்ஸி தனது முதல் உலகக் கோப்பையில் விளையாடினார். அதற்கு அடுத்த ஆண்டான 2007இல், யுனிசெஃப் (UNICEF) அமைப்பின் தொண்டு நிகழ்ச்சி ஒன்றில் 18 வயதான மெஸ்ஸி பங்கேற்றார். அப்போது அங்கு வந்த ஒரு 6 மாதக் குழந்தையை கைகளில் ஏந்தியபடி மெஸ்ஸி புகைப்படம் எடுத்துக் கொண்டார். அந்தப் புகைப்படத்தில் இருந்த குழந்தைதான் இன்றைய கால்பந்து உலகின் இளம் புயல் லாமின் யமால். சுமார் 17 ஆண்டுகள் யாருக்கும் தெரியாமல் இருந்த இந்தப் புகைப்படம், 2024ஆம் ஆண்டு “புராணங்களின் தொடக்கம்” என்ற தலைப்புடன் இணையத்தில் வெளியாகி உலகையே ஆச்சரியத்தில் ஆழ்த்தியது.
ஸ்பெயின் அணிக்காக யூரோ 2024 கோப்பையை வெல்வதில் முக்கியப் பங்கு வகித்த 16 வயது யமால், தற்போது 2026 உலகக் கோப்பை தொடரில் கால்பதித்துள்ளார். இது மெஸ்ஸியின் கடைசி உலகக் கோப்பையாகக் கருதப்படும் நிலையில், யமாலுக்கு இது முதல் உலகக் கோப்பையாகும். சவூதி அரேபியாவுக்கு எதிராக யமால் அடித்த முதல் உலகக் கோப்பை கோலில், மெஸ்ஸியின் முதல் கோலோடு ஒப்பிடத்தக்க 2 வியத்தகு ஒற்றுமைகள் காணப்படுகின்றன:
லியோனல் மெஸ்ஸி தனது முதல் உலகக் கோப்பை கோலை அடித்தபோது அவருக்கு வயது 18 ஆண்டுகள் 357 நாட்கள். ஆனால், லாமின் யமால் தனது முதல் உலகக் கோப்பை கோலை 18 ஆண்டுகள் 343 நாட்களில் அடித்துள்ளார். அதாவது, மெஸ்ஸியை விட 14 நாட்கள் இளைய வயதிலேயே யமால் இந்தச் சாதனையைச் செய்துள்ளார்.
பொதுவாக மெஸ்ஸி மற்றும் யமால் இருவருமே இடது காலால் அபாரமாக விளையாடக்கூடியவர்கள். ஆனால், மெஸ்ஸி தனது முதல் உலகக் கோப்பை கோலை வலது காலால் தான் அடித்திருந்தார். அதேபோல, தற்போது யமாலும் சவூதி அரேபியாவுக்கு எதிரான தனது முதல் உலகக் கோப்பை கோலை தனது வலது காலால் அடித்து அசத்தியுள்ளார்.
அன்று மெஸ்ஸியின் கைகளில் குழந்தையாகத் தவழ்ந்த யமால், இன்று அதே மெஸ்ஸியின் சாதனைகளோடு ஒப்பிடப்படும் அளவிற்கு உலகக் கோப்பையில் கோல் அடித்து ஜொலிப்பது கால்பந்து ரசிகர்களை மிரள வைத்துள்ளது.
