மாடலிங் துறையில் இருந்து திரையுலகில் தனக்கென ஒரு அடையாளத்தை உருவாக்கியுள்ள நடிகை சனம் ஷெட்டி உடல்நலக் குறைவு காரணமாக மருத்துவமனையில் அனுமதிக்கப்பட்டுள்ளதாக தகவல் வெளியாகியுள்ளது. இதனால் அவரது ரசிகர்கள் மற்றும் திரையுலக நண்பர்கள் கவலை அடைந்துள்ளனர்.
பெங்களூருவில் பிறந்து வளர்ந்த சனம் ஷெட்டி, ஆரம்ப காலத்திலேயே மாடலிங் துறையில் ஆர்வம் காட்டி பல்வேறு அழகிப்போட்டிகளில் பங்கேற்றார். தனது திறமையாலும் தன்னம்பிக்கையாலும் 2016-ஆம் ஆண்டு நடைபெற்ற “மிஸ் சவுத் இந்தியா” பட்டத்தை வென்று கவனம் பெற்றார். அதன் பின்னர் திரைப்பட வாய்ப்புகளைப் பெற்று தமிழ் சினிமாவில் அறிமுகமானார்.
தமிழில் ‘அம்புலி’, ‘கதம் கதம்’, ‘வெள்ளையா இருக்குறவன் பொய் சொல்லமாட்டான்’, ‘வால்டர்’, ‘ஊமை செந்நாய்’ உள்ளிட்ட பல படங்களில் நடித்துள்ள அவர், தனது இயல்பான நடிப்பின் மூலம் ரசிகர்களின் பாராட்டைப் பெற்றார். திரைப்படங்களைத் தொடர்ந்து தொலைக்காட்சி நிகழ்ச்சிகளிலும் பங்கேற்று வந்த சனம் ஷெட்டி, குறிப்பாக பிரபல ரியாலிட்டி நிகழ்ச்சியான பிக்பாஸ் மூலம் மக்களிடையே மேலும் பரவலாக அறியப்பட்டார்.
சினிமா துறையில் பெண்கள் எதிர்கொள்ளும் சவால்கள் மற்றும் பாலியல் புகார்கள் தொடர்பாக வெளிப்படையாக கருத்து தெரிவித்ததன் மூலமும் அவர் செய்திகளில் இடம்பிடித்தார். சமூக பிரச்சினைகள் குறித்த தனது கருத்துகளை தைரியமாக பதிவு செய்து வந்ததால், சமூக வலைதளங்களிலும் அவருக்கு தனி ரசிகர் பட்டாளம் உருவானது.
இந்நிலையில், சனம் ஷெட்டிக்கு வயிறு தொடர்பான உடல்நலப் பிரச்சினை ஏற்பட்டுள்ளதாக கூறப்படுகிறது. இதற்காக மருத்துவர்களின் ஆலோசனையின்படி சிறிய அளவிலான அறுவை சிகிச்சை மேற்கொள்ளப்பட உள்ளதாக தகவல்கள் தெரிவிக்கின்றன. தற்போது அவர் மருத்துவமனையில் சிகிச்சை பெற்று வருகிறார்.
மருத்துவமனையில் இருக்கும் அவரது புகைப்படங்கள் சமூக வலைதளங்களில் வெளியாகியதைத் தொடர்ந்து ரசிகர்கள் பலரும் அவருக்கு ஆறுதல் தெரிவித்து வருகின்றனர். மேலும், அவர் விரைவில் பூரண நலம்பெற்று மீண்டும் தனது வழக்கமான பணிகளில் ஈடுபட வேண்டும் என்று வாழ்த்துகளையும் பிரார்த்தனைகளையும் சமூக வலைதளங்கள் வாயிலாக பதிவிட்டு வருகின்றனர். சிகிச்சைக்குப் பிறகு அவரது உடல்நிலை சீராக இருப்பதாகவும், விரைவில் வீடு திரும்புவார் என்றும் நெருங்கிய வட்டாரங்கள் நம்பிக்கை தெரிவித்துள்ளன.
