மத்திய அரசு கொண்டுவரத் திட்டமிட்டுள்ள தொகுதி மறுவரையறை மசோதா தொடர்பாக விரிவான அரசியல் கலந்தாலோசனை நடத்த வேண்டும் என வலியுறுத்தியுள்ள மக்களவை எதிர்க்கட்சித் தலைவர் ராகுல் காந்தி, இது தொடர்பாக நாடாளுமன்ற விவகாரங்கள் துறை அமைச்சர் கிரண் ரிஜிஜுவிடம் 3 முக்கிய நிபந்தனைகளை முன்வைத்துள்ளார்.
நாடாளுமன்ற மழைக்காலக் கூட்டத்தொடரில் தொடர் அமளி நிலவி வரும் சூழலில், நாடாளுமன்ற வளாகத்தில் உள்ள ராகுல் காந்தியின் அலுவலகத்தில் சுமார் 50 நிமிடங்கள் இந்தச் சந்திப்பு நடைபெற்றது. இதில் காங்கிரஸ் மூத்த தலைவரும் எம்பியுமான பிரியங்கா காந்தி வத்ராவும் பங்கேற்றார்.
இந்தச் சந்திப்பின் போது, மசோதாவை நாடாளுமன்றத்தில் தாக்கல் செய்வதற்கு முன்பாக, கூடுதல் அரசியல் ஒருமைப்பாடு அவசியம் எனத் தெரிவித்த ராகுல் காந்தி, அரசுக்குக் கீழ்க்கண்ட 3 முக்கிய நிபந்தனைகளை முன்வைத்துள்ளார்:
அனைத்துக் கட்சிக் கூட்டத்தை உடனடியாகக் கூட்ட வேண்டும். 50% தொகுதி உயர்வை முன்மொழியும் மசோதாவின் வரைவை அனைத்து அரசியல் கட்சிகளுக்கும் முன்னதாகவே சுற்றறிக்கையாக அனுப்ப வேண்டும். மத்திய உள்துறை அமைச்சர் அமித் ஷா நேரடியாக எதிர்க்கட்சித் தலைவர்களைச் சந்தித்துப் பேச்சுவார்த்தை நடத்த வேண்டும்.
தொகுதி மறுவரையறை மசோதா குறித்து எதிர்க்கட்சிகளின் நிலையை அறிந்துகொள்ளவும், ஆதரவைத் திரட்டவும் மத்திய அரசு இந்த ஆலோசனையைத் தொடங்கியுள்ளது. இதனிடையே, அயோத்தி ராமர் கோயில் நன்கொடை முறைகேடு புகார்கள் மற்றும் ஜூலை 20 அன்று மாணவர்கள் மீது நடத்தப்பட்ட காவல்துறை துப்பாக்கிச் சூடு ஆகியவை குறித்துப் பிரதமர் நரேந்திர மோடியும், உள்துறை அமைச்சர் அமித் ஷாவும் நாடாளுமன்றத்தில் விளக்கமளிக்க வேண்டும் என வலியுறுத்தி எதிர்க்கட்சிகள் தொடர்ந்து போராட்டத்தில் ஈடுபட்டு வருகின்றன. இதனால் நாடாளுமன்றத்தின் இரு அவைகளும் தொடர்ந்து முடங்கி வரும் பின்னணியில் இந்தச் சந்திப்பு நடந்துள்ளது குறிப்பிடத்தக்கது.
