காவிரி பெருக்கு..!! தமிழகத்திற்கு கைகொடுத்த இயற்கை.. தணிந்த அரசியல் சூடு!

காவிரி நீர்ப்பிடிப்புப் பகுதிகளில் கனமழை கொட்டித் தீர்த்ததால், தமிழகத்தை நோக்கி நீர் வரத்து அதிகரித்துள்ளது. இதனால் டெல்டா மாவட்ட விவசாயிகள் மகிழ்ச்சியடைந்துள்ளனர். குறுவை சாகுபடி பாதிக்கப்பட்ட நிலையில், இப்போது சம்பா சாகுபடிக்கான நம்பிக்கை பிறந்துள்ளது. இந்த ஆண்டு ஜூன் 12-ஆம் தேதி மேட்டூர் அணையில் தண்ணீர் அளவு 79 அடிக்கும் குறைவாக இருந்ததால், பாசனத்திற்கு நீர் திறக்கப்படவில்லை. இதனால் டெல்டா மாவட்டங்களில் குறுவை சாகுபடி முழுமையாக பாதிக்கப்பட்டது.

தமிழகம் கர்நாடகத்திடம் காவிரி நீரைக் கோரியபோதும், வழக்கம் போல் மறுப்பு தெரிவிக்கப்பட்டது. ஜூன் 28-ஆம் தேதி நடைபெற்ற காவிரி ஒழுங்காற்றுக் குழு கூட்டத்தில், தமிழக அரசு அழுத்தமாக வாதங்களை முன்வைத்தது. அதன்படி, 15 நாட்களுக்கு வினாடிக்கு 3,500 கனஅடி வீதம் (சுமார் 4½ டி.எம்.சி.) நீர் திறக்க அறிவுறுத்தப்பட்டது. ஆனால் கர்நாடகம் இதையும் மறுத்து, காவிரி மேலாண்மை ஆணையத்தில் முறையிட்டது. ஜூலை 24-ஆம் தேதி ஆணையம் மீண்டும் கூடி, கர்நாடக வாதத்தை நிராகரித்து, உச்சநீதிமன்ற உத்தரவுப்படி நீர் திறக்க உத்தரவிட்டது.

இந்த உத்தரவுக்கு எதிர்ப்பு தெரிவித்து கர்நாடக அமைப்புகள் போராட்டத்தில் ஈடுபட்டன. இரு மாநில முதலமைச்சர்களும் பெங்களூரில் சந்திக்க ஏற்பாடு செய்யப்பட்ட நிலையில், கர்நாடகத்தில் எதிர்ப்பு வலுத்ததால் டி.கே.சிவகுமார், தமிழக முதல்வர் வரவேண்டாம் எனக் கூறினார். தமிழக எதிர்க்கட்சிகளும் இந்த சந்திப்புக்கு எதிர்ப்பு தெரிவித்தன. இந்த அரசியல் பதற்றத்திற்கு இடையே, ஜூலை 31-ஆம் தேதி காவிரி நீர்ப்பிடிப்புப் பகுதிகளில் கனமழை பெய்தது.

கர்நாடக அணைகளில் நீர்வரத்து அதிகரித்ததால், பாதுகாப்பு கருதி கபினி அணையில் இருந்து நீர் திறக்கப்பட்டது. தற்போது தமிழகத்திற்கு வினாடிக்கு சுமார் 28,000 கனஅடி நீர் வந்து கொண்டிருக்கிறது. காவிரி நீர் எல்லையைக் கடந்து தமிழக மண்ணை வந்தடைந்துள்ளது. கர்நாடக அணைகளில் தற்போது கிருஷ்ணராஜசாகரில் 91.8 அடி (மொத்த கொள்ளளவு 124.8 அடி), கபினியில் 56.28 அடி (65 அடி), ஹேரங்கியில் 127.55 அடி (129 அடி), ஹேமாவதியில் 100.98 அடி (117 அடி) நீர் உள்ளது.

இந்த அணைகள் வேகமாக நிரம்பும் நிலையில், தமிழகத்திற்கான நீர் திறப்பு மேலும் அதிகரிக்கும் என எதிர்பார்க்கப்படுகிறது. மேட்டூர் அணையில் தற்போது 73.82 அடி நீர் உள்ளது. வரும் நாட்களில் நீர்வரத்து அதிகரித்து, சம்பா சாகுபடிக்காவது மேட்டூரில் இருந்து நீர் திறக்க வாய்ப்புள்ளது.