கோவை மாநகரின் ஆர்.எஸ்.புரம் பகுதியில் தனியார் செய்தி குழுமம் மற்றும் பல்வேறு தனியார் அமைப்புகளின் இணைந்த முயற்சியில் ‘ஹாப்பி ஸ்ட்ரீட்’ நிகழ்ச்சி இரண்டாவது வாரமாக வெற்றிகரமாக நடைபெற்றது. நகரவாசிகளின் அன்றாட வாழ்க்கையின் அழுத்தங்களிலிருந்து சிறிது நேரம் விலகி, உற்சாகத்துடன் இணைந்து மகிழ்வதற்கான இந்த நிகழ்வு, அனைத்து வயதினரையும் ஒன்றிணைத்து ஒரு தனித்துவமான அனுபவத்தை அளித்தது.
ஞாயிற்றுக்கிழமையான இன்று காலை தொடங்கிய விழாவில் இசை, நடனம், டிஜே நிகழ்ச்சிகள், உடற்பயிற்சி ஆகியவை முன்னிலை வகித்தன. சிறுவர்கள் முதல் முதியவர்கள் வரை அனைவரும் தங்கள் வயது வித்தியாசத்தை மறந்து ஆடிப்பாடி மகிழ்ந்தனர். துடிப்பான இசைக்கு ஏற்ப நடனமாடிய இளைஞர்களின் உற்சாகம், சுற்றிலும் உள்ளவர்களையும் தொற்றிக்கொள்ளச் செய்தது. அதேநேரத்தில், பல்வேறு உடற்பயிற்சி அமர்வுகள் நடத்தப்பட்டு, பங்கேற்பாளர்கள் உடல் நலத்தின் முக்கியத்துவத்தை உணர்ந்து கொள்ளும் வாய்ப்பு கிடைத்தது.
நிகழ்வின் சிறப்பம்சமாக, பல குடும்பங்கள் தங்கள் வளர்ப்பு நாய், பூனை உள்ளிட்ட செல்லப்பிராணிகளுடன் வந்து பங்கேற்றனர். குழந்தைகள் செல்லப்பிராணிகளுடன் விளையாடிய காட்சிகள் இதயத்தை நெகிழச் செய்தன. இளைஞர்கள் சைக்கிள் சாகச நிகழ்ச்சிகளின் மூலம் தங்கள் திறமையை வெளிப்படுத்தினர். சிலம்பம் சுழற்றிய வீரர்களின் ஆற்றல் மிக்க நிகழ்வு பார்வையாளர்களை வியப்பில் ஆழ்த்தியது. மேலும், பல்வேறு விளையாட்டுப் போட்டிகள் ஏற்பாடு செய்யப்பட்டிருந்தன. குழந்தைகளுக்கான ஓட்டப் போட்டி, பந்து விளையாட்டுகள் என பல்வேறு நிகழ்வுகள் நடைபெற்றன.
முதியவர்கள் டயர் இழுத்தல் போட்டியில் பங்கேற்று, இளமையான உற்சாகத்துடன் போட்டியிட்டு அனைவரையும் உற்சாகப்படுத்தினர். இதனால் அவர்களது முகங்களில் தெரிந்த மகிழ்ச்சி குறிப்பிடத்தக்கதாக இருந்தது. பேஸ் பெயிண்டிங் நிகழ்வு இளைஞர்கள் மற்றும் கல்லூரி மாணவிகளிடையே பெரும் வரவேற்பைப் பெற்றது. வண்ணமயமான ஓவியங்கள் முகங்களில் தீட்டப்பட்டபோது, அவர்கள் மகிழ்ச்சியில் திளைத்தனர். இந்த நிகழ்வு குழந்தைகளிடமும் பெரும் உற்சாகத்தை ஏற்படுத்தியது.
ஹாப்பி ஸ்ட்ரீட் நிகழ்ச்சி நகரின் பொதுமக்களிடையே ஆரோக்கியமான வாழ்க்கை முறை, குடும்ப பிணைப்பு மற்றும் சமூக ஒற்றுமையை ஊக்குவிக்கும் வகையில் அமைந்திருந்தது. முதல் வாரத்தைப் போலவே இரண்டாவது வாரமும் பெரும் எண்ணிக்கையில் பொதுமக்கள் கலந்துகொண்டதால், அடுத்த வாரங்களுக்கான எதிர்பார்ப்பும் அதிகரித்துள்ளது. இத்தகைய நிகழ்வுகள் கோவை நகரின் சமூக வாழ்வை சிறப்பிக்கும் என்பதில் சந்தேகமில்லை.
