கிறிஸ்டியானோ ரொனால்டோ தலைமையிலான போர்ச்சுகல் அணி, தனது முதல் குழுநிலைப் போட்டியில் டிஆர் காங்கோவுடன் 1-1 என்ற கோல் கணக்கில் டிரா செய்தது பார்வையாளர்களுக்கு ஏமாற்றத்தை அளித்தது. ஜோவோ நெவ்ஸ் அடித்த ஆரம்பகால கோலை, யோயானே விஸ்ஸா சமன் செய்ததால் போர்ச்சுகல் வெற்றியைத் தவறவிட்டது.
தனது ஆறாவது உலகக் கோப்பை தொடரில் களமிறங்கிய கிறிஸ்டியானோ ரொனால்டோ தாக்குதல் பகுதியில் பெரிதாக தாக்கத்தை ஏற்படுத்தத் தவறினார். அதேபோல் மான்செஸ்டர் யுனைடெட் நட்சத்திரம் பெர்னார்டோ சில்வாவும் எதிர்பார்த்த அளவில் செயல்படவில்லை. போட்டிக்கு முன்பு கோப்பையை வெல்லும் அணிகளில் ஒன்றாகக் கருதப்பட்ட ராபர்டோ மார்டினஸ் பயிற்சியளிக்கும் போர்ச்சுகல், தனது ஆதிக்கத்தை நிரூபிக்கத் தவறிவிட்டது.
போட்டி தொடங்கிய 6-வது நிமிடத்திலேயே போர்ச்சுகல் முன்னிலை பெற்றது. பெட்ரோ நேட்டோ வழங்கிய துல்லியமான கிராஸை ஜோவோ நெவ்ஸ் தலையால் முட்டி அதனைக் கோலாக மாற்றினார். இது அவரது நான்காவது சர்வதேச கோலாகும்.
ஆரம்பத்தில் முன்னிலை பெற்றாலும், போகப் போக போர்ச்சுகலின் ஆட்ட வேகம் குறைந்தது. பந்தைக் கட்டுப்பாட்டில் வைத்திருந்தாலும், தாக்குதல் வாய்ப்புகளை உருவாக்குவதில் சிரமப்பட்டனர். மறுபுறம், டிஆர் காங்கோ எதிர்தாக்குதல்களில் தீவிரம் காட்டியது.
அதன் பலனாக முதல் பாதியின் கூடுதல் நேரத்தில் ஆர்தர் மசுவாகு வழங்கிய கிராஸை யோயானே விஸ்ஸா தலையால் கோலாக மாற்றி டிஆர் காங்கோவுக்கு சமநிலையை பெற்றுத் தந்தார்.
இரண்டாம் பாதியின் தொடக்கத்தில் ஜோவோ கான்செலோ அடித்த அற்புதமான கோல் ஆஃப்சைடு காரணமாக நிராகரிக்கப்பட்டது. பின்னர் செட்ரிக் பகாம்பு அடித்த ஷாட் கோல் கம்பத்தில் பட்டு வெளியேறியதால் போர்ச்சுகல் அதிர்ஷ்டவசமாக தப்பியது.
போட்டியின் இறுதிக் கட்டத்தில் மாற்று வீரராக களமிறங்கிய பிரான்சிஸ்கோ கொன்செய்சாவ் போர்ச்சுகல் தாக்குதலுக்கு புத்துணர்ச்சி அளித்தார். ரொனால்டோவுக்கு சில வாய்ப்புகளை உருவாக்கியபோதும், அனுபவம் மிக்க அந்த நட்சத்திர வீரரால் கோல் அடிக்க முடியாதது ரசிகர்களிடையே ஏமாற்றத்தை ஏற்படுத்தியது.
இறுதி நேரங்களில் போர்ச்சுகல் தீவிரமாக போராடியபோதும், கோலை அடிக்க முடியாமல் போனது. இதனால் 1974-க்குப் பிறகு முதல் முறையாக உலகக் கோப்பையில் பங்கேற்றுள்ள டிஆர் காங்கோ, முக்கியமான ஒரு புள்ளியை கைப்பற்றி வரலாற்றுச் சிறப்புமிக்க தொடக்கத்தைப் பதிவு செய்தது.
