மகளிர் பாதுகாப்புக்காக இன்று தொடங்கப்படும் என்று அறிவித்திருந்த ‘சிறப்பு அதிரடிப்படை’ திட்டத்தை நிறுத்திவைத்துள்ளது ஏன்? என கனிமொழி எம்.பி கேள்வி எழுப்பியுள்ளார்.
மகளிர் பாதுகாப்பை வலுப்படுத்தும் நோக்கில் தமிழக வெற்றிக் கழகம் (தவெக) அரசு அறிவித்த ‘சிங்கப்பெண்’ சிறப்பு அதிரடிப்படை திட்டத்தின் தொடக்க விழா கடைசி நேரத்தில் திடீரென ரத்து செய்யப்பட்டுள்ளது. இந்த நடவடிக்கை அரசியல் வட்டாரத்தில் பெரும் சர்ச்சையை ஏற்படுத்தியுள்ளது. முதலமைச்சர் ஜோசப் விஜய் பொறுப்பேற்ற உடனேயே பெண்கள் நலன் கருதி இந்த சிறப்புப் படையை அமைப்பதாக அறிவித்தார். இதன்படி, பவானீஸ்வரி ஐ.ஜி. தலைமையில் ஒரு போலீஸ் சூப்பிரண்டு, இரண்டு துணை சூப்பிரண்டுகள், நான்கு இன்ஸ்பெக்டர்கள் உள்பட 30க்கும் மேற்பட்ட பெண் அதிகாரிகள் இணைக்கப்பட உள்ளனர்.
இவர்களுக்கு தனித்துவமான நேவி ப்ளூ அரைக்கை சட்டை, காக்கி பேண்ட், கருப்பு தொப்பி மற்றும் கருப்பு ஷூக்கள் கொண்ட புதிய சீருடை வடிவமைக்கப்பட்டது. இந்தப் படை மாநிலம் முழுவதும் பெண்களுக்கு எதிரான குற்றங்களைத் தடுக்கவும், உடனடி நடவடிக்கை எடுக்கவும் செயல்படும் என எதிர்பார்க்கப்பட்டது. முதலில் மே 27-ம் தேதி ராஜரத்தினம் விளையாட்டு மைதானத்தில் விழா நடைபெற ஏற்பாடுகள் செய்யப்பட்டிருந்தன. ஆனால் முதலமைச்சரின் டெல்லி பயணம் காரணமாக அது தள்ளிப்போடப்பட்டது. பின்னர் மே 29-ம் தேதி (இன்று) விழா நடைபெறும் என அறிவிக்கப்பட்டு, அழைப்பிதழ்கள் விநியோகம், மேடை அலங்காரம் உள்ளிட்ட ஏற்பாடுகள் துரிதமாக மேற்கொள்ளப்பட்டன.
எனினும், கடைசி நேரத்தில் விழா ரத்து செய்யப்பட்டதாக காவல்துறை தரப்பில் தெரிவிக்கப்பட்டுள்ளது. புதிய தேதி விரைவில் அறிவிக்கப்படும் எனக் கூறப்பட்டாலும், இந்த இரண்டு முறை தள்ளிப்போடப்பட்ட சம்பவம் பல்வேறு ஊகங்களுக்கு வழிவகுத்துள்ளது. இந்நிலையில், தி.மு.க. எம்.பி. கனிமொழி தனது எக்ஸ் (ட்விட்டர்) பக்கத்தில் கடும் கேள்வி எழுப்பியுள்ளார். “கடலூரில் இளம்பெண் கொலை, தூத்துக்குடியில் இளைஞர் வெட்டிக்கொலை உள்ளிட்ட சம்பவங்கள் தொடர்ந்து நடைபெறும் போது, மகளிர் பாதுகாப்புக்காக அறிவித்த சிறப்பு அதிரடிப்படை திட்டத்தை ஏன் நிறுத்தி வைத்துள்ளீர்கள்? தமிழ்நாட்டில் அதிகரிக்கும் சட்ட ஒழுங்கு பிரச்சனைகளுக்கு த.வெ.க. அரசு எப்போது தீர்வு காணப் போகிறது?” என அவர் வினவியுள்ளார்.
பெண்கள் பாதுகாப்பு விவகாரத்தில் அரசு துரித நடவடிக்கை எடுக்க வேண்டும் என பொதுமக்கள் மற்றும் அரசியல் கட்சிகள் எதிர்பார்ப்பு அதிகரித்துள்ள நிலையில், இந்த ரத்து முடிவு அரசின் முன்னுரிமையை கேள்விக்குள்ளாக்கியுள்ளது. சமீபகாலமாக பெண்கள் மற்றும் இளைஞர்கள் மீதான வன்முறை சம்பவங்கள் அதிகரித்து வரும் சூழலில், ‘சிங்கப்பெண்’ படையை விரைவில் செயல்படுத்தி மக்களின் நம்பிக்கையை த.வெ.க. அரசு மீட்டெடுக்க வேண்டும் என அரசியல் வட்டாரங்கள் வலியுறுத்துகின்றன. இந்தத் திட்டம் முழுமையாகச் செயல்படுத்தப்பட்டால், மாநிலத்தில் பெண்கள் பாதுகாப்பு கணிசமாக மேம்படும் எனக் கருதப்படுகிறது.
