தமிழக வெற்றிக் கழகத் தலைவரும் தமிழக முதலமைச்சருமான ச.ஜோசப் விஜய்யின் வீடு சென்னை கிழக்குகடற்கரை சாலையில் உள்ள நீலாங்கரை காஸுரினோ டிரைவ் சாலையில் அமைந்துள்ளது. முதலமைச்சரின் பக்கத்து வீடுதான் இயக்குநர் பாரதிராஜாவின் வீடு. இதே சாலையில்தான் முன்னாள் முதலமைச்சர் மு.க.ஸ்டாலினின் மகள் செந்தாமரையின் வீடு, இந்திய கிரிக்கெட் வீரர் உள்ளிட்ட பல விவிஐபிகளின் வீடுகளும் உள்ளன.
முதலமைச்சர் ச.ஜோசப் விஜய் சென்னை நீலாங்கரை இல்லத்தில் இருந்து 17 கிலோமீட்டர் பயணித்து தலைமை செயலகத்திற்கு வருகிறார். இதனால் வழிநெடுகிலும் போக்குவரத்து நெரிசல் ஏற்படுவதாகவும் மக்கள் சிரமத்திற்கு உள்ளாவதாகவும் செய்திகள் வெளியாகின
இந்நிலையில் முதலமைச்சரின் வழிகாட்டுதலின்படி வாகன அணிவகுப்பு செல்வதற்கென தனியாக பாதை அமைக்கப்பட்டுள்ளது.
சீராக போக்குவரத்து நடைபெறவும், பொதுமக்களுக்கு இடையூறு ஏற்படாத வகையிலும் சிறப்பு மாற்று போக்குவரத்து ஏற்பாடுகள் மேற்கொள்ளப்பட்டுள்ளது.
இதன்படி சாலையின் ஒரு பகுதியில் கூம்பு வடிவ பிளாஸ்டிக் தடைகள் வைக்கப்பட்டு போக்குவரத்து பிரித்து விடப்படுகிறது. இதனால் முதலமைச்சரின் கான்வாய் செல்லும்போதே, பொதுமக்களின் வாகனங்களும் சென்றுவர வசதியாக உள்ளது.
கடந்த ஆட்சியில் முதலமைச்சராக இருந்த மு.க.ஸ்டாலின், சில மாதங்களாக வாரம்தோறும் ஞாயிற்றுக் கிழமைகளில் அதிகாலையில் கிழக்கு கடற்கரை சாலையில் சைக்கிள் பயணம் மேற்கொண்டு வந்தார்.
அப்போதும் இதேபோல் சாலையில் கூம்புவடிவ பிளாஸ்டிக் தடைகள் பயன்படுத்தப்பட்டு சாலை பிரிக்கப்பட்டு மற்ற வாகனங்களும் செல்ல ஏற்பாடு செய்யப்பட்டிருந்தது.
தற்போது முதலமைச்சர் ஜோசப் விஜய்யும் , மு.க.ஸ்டாலினின் அதே வழியினைப் பின்பற்றுவதாகக் கூறப்படுகிறது.
