முதலமைச்சராக விஜய் பொறுப்பேற்ற பின் இரண்டாவது முறையாக மகளிர் உரிமை தொகை வழங்கப்பட்டுள்ளது குறிப்பிடத்தக்கது.
தமிழக அரசின் மகளிர் உரிமைத்தொகை திட்டத்தின் கீழ் ஜூன் மாதத்திற்கான நிதியுதவி இன்று பயனாளிகளின் வங்கி கணக்குகளில் வரவு வைக்கப்பட்டுள்ளது. வழக்கமாக ஒவ்வொரு மாதமும் 15-ஆம் தேதி வழங்கப்பட்டு வரும் இந்தத் தொகை, இம்மாதமும் அதே நடைமுறையில் வழங்கப்பட்டுள்ளதால் மாநிலம் முழுவதும் உள்ள பயனாளிகள் பயன்பெற்றுள்ளனர்.
முன்னாள் திமுக ஆட்சிக் காலத்தில் அறிமுகப்படுத்தப்பட்ட இந்தத் திட்டத்தின் மூலம் தகுதியான பெண்களுக்கு மாதந்தோறும் ரூ.1,000 வழங்கப்பட்டு வந்தது. சமீபத்தில் நடைபெற்ற சட்டமன்றத் தேர்தலின் பின்னர் தவெக தலைமையிலான புதிய அரசு ஆட்சிப் பொறுப்பேற்றது. புதிய முதலமைச்சராக பொறுப்பேற்றுள்ள விஜய் தலைமையிலான அரசில் மகளிர் உரிமைத்தொகை வழங்கப்படுவது இது இரண்டாவது முறையாகும்.
தேர்தல் பிரசாரத்தின்போது மகளிர் உரிமைத்தொகையை ரூ.1,000 இலிருந்து ரூ.2,500 ஆக உயர்த்தி வழங்க நடவடிக்கை எடுக்கப்படும் என்று தவெக தலைவர் விஜய் உறுதியளித்திருந்தார். இதனையடுத்து, ஆட்சிப் பொறுப்பேற்ற பின்னர் திட்டத்தை விரிவுபடுத்தவும், மறுசீரமைப்பு செய்யவும் தேவையான கால அவகாசம் தேவைப்படுவதாக முதலமைச்சர் கடந்த மாதம் தெரிவித்திருந்தார். திட்டத்தில் மாற்றங்கள் மேற்கொள்ளப்படும் வரை தற்போதைய நடைமுறையின்படி தொகை வழங்கப்படும் என்றும் அவர் குறிப்பிட்டிருந்தார்.
அதன்படி, மே மாதத்திற்கான உரிமைத்தொகை கடந்த மாதம் 15-ஆம் தேதி வழங்கப்பட்ட நிலையில், ஜூன் மாதத்திற்கான ரூ.1,000 உதவித்தொகையும் இன்று பயனாளிகளின் வங்கி கணக்குகளில் நேரடியாக செலுத்தப்பட்டுள்ளது. மாநிலம் முழுவதும் சுமார் 1 கோடியே 31 லட்சம் பெண்கள் இந்தத் திட்டத்தின் கீழ் பயனடைந்துள்ளதாக அரசு வட்டாரங்கள் தெரிவித்துள்ளன.
பெண்களின் பொருளாதார நிலையை வலுப்படுத்தும் நோக்கில் செயல்படுத்தப்பட்டு வரும் இந்தத் திட்டம், குடும்பச் செலவுகளை சமாளிக்கவும், பெண்களின் நிதிசார் சுயநிறைவை மேம்படுத்தவும் உதவிகரமாக இருப்பதாக பயனாளிகள் தெரிவித்து வருகின்றனர். திட்டத்தின் மறுசீரமைப்பு தொடர்பான அடுத்தகட்ட அறிவிப்புகள் குறித்து மக்களிடையே எதிர்பார்ப்பு நிலவி வருகிறது.
