2026 பிஃபா உலகக் கோப்பை கால்பந்து போட்டி மெக்சிகோ சிட்டியில் பரபரப்பான தொடக்கத்தைக் கண்டுள்ளது. கோல்களை விட சிவப்பு அட்டைகள் அதிகமாகப் பதிவான இந்த விறுவிறுப்பான தொடக்க ஆட்டத்தில், மெக்சிகோ 2-0 என்ற கோல் கணக்கில் தென்னாப்பிரிக்காவை வீழ்த்தியது.
கடந்த 2010 உலகக் கோப்பையின் தொடக்க ஆட்டத்தில், ஜோகன்னஸ்பர்க் நகரில் இரு அணிகளும் 1-1 என சமநிலை வகித்தன. அதற்குப் பிறகு 16 ஆண்டுகள் கழித்து, தற்போது மெக்சிகோவின் எஸ்டாடியோ அஸ்டெகா மைதானத்தில் நடந்த போட்டியில், உள்ளூர் ரசிகர்களின் ஆதரவோடு ஜூலியன் குய்னோன்ஸ் மற்றும் ரவுல் ஜிமினெஸ் ஆகியோர் அடித்த கோல்களால் மெக்சிகோ 3 புள்ளிகளைப் பெற்றது.
மெக்சிகோவின் அதிரடித் தொடக்கம்
ஆட்டம் தொடங்கிய 9-வது நிமிடத்திலேயே மெக்சிகோ தனது முதல் கோலை அடித்து அசத்தியது. தென்னாப்பிரிக்க வீரர் சிபெபெலோ சிதோலிடமிருந்து, எரிக் லிரா பந்தைப் பறிக்க, அதை லாவகமாகப் பிடித்த ஜூலியன் குய்னோன்ஸ், பெனால்டி பகுதிக்கு வெளியேயிருந்து பந்தை கோல் போஸ்ட்டிற்குள் செலுத்தினார். இதுவே 2026 உலகக் கோப்பையின் முதல் கோல் ஆகும்.
இந்த கோல் ஜேவியர் அகுய்ரேவின் மெக்சிகோ அணிக்கு பெரும் நம்பிக்கையைத் தந்தது. இதனால் ஆட்டத்தின் பெரும்பகுதி பந்து அவர்களின் கட்டுப்பாட்டிலேயே இருந்தது. முதல் பாதி முடிவதற்குள் குய்னோன்ஸ் மற்றொரு கோல் அடிக்க முயன்றார், ஆனால் பந்து போஸ்ட்டில் பட்டுத் திரும்பியது. மறுபுறம் தென்னாப்பிரிக்க அணியால் மெக்சிகோவின் தடுப்பாட்டத்தை மீறி கோல் அடிக்க முடியவில்லை.
தென்னாப்பிரிக்காவின் பின்னடைவு
தென்னாப்பிரிக்க வீரர் சிபெபெலோ சிதோலுக்கு ‘ஸ்ட்ரெய்ட் ரெட் கார்டு’ காட்டப்பட்டதை அடுத்து அந்த அணி பெரும் பின்னடைவைச் சந்தித்தது.
இதன் மூலம் தென்னாப்பிரிக்கா 10 வீரர்களுடன் விளையாட வேண்டிய கட்டாயத்திற்குத் தள்ளப்பட்டது. மெக்சிகோ தொடர்ந்து ஆதிக்கம் செலுத்தியது.
இரண்டாவது சிவப்பு அட்டை!
ஆட்டத்தின் 67-வது நிமிடத்தில் மெக்சிகோ தனது இரண்டாவது கோலை பதிவு செய்தது. அனுபவமிக்க நட்சத்திர வீரர் ரவுல் ஜிமினெஸ், மிக அருகில் இருந்து தலையால் முட்டி பந்தை கோலாக்கினார். இதன் மூலம் மெக்சிகோ 2-0 என பலமான முன்னிலை பெற்றது.
இந்த கோலின் போது மைதானத்தில் இருந்த ரசிகர்கள் ஆரவாரம் செய்து கொண்டாடினர். இதற்குச் சற்று முன்புதான், உலகக் கோப்பையின் மிக இளம் வீரரான 17 வயது கில்பர்டோ மோரா மாற்று வீரராக மைதானத்திற்குள் நுழைந்தபோது ரசிகர்களின் பலத்த வரவேற்பைப் பெற்றார்.
இதற்கிடையில், தென்னாப்பிரிக்க வீரர் தெம்பா ஸ்வானே, மெக்சிகோவின் ராபர்டோ அல்வராடோ மீது வன்முறையான முறையில் மோதியதாக மறுஆய்வில் தெரியவந்தது. இதையடுத்து நடுவர் அவருக்கும் சிவப்பு அட்டை காட்டினார். இதனால் தென்னாப்பிரிக்க அணி 9 வீரர்களாகக் குறைந்தது.
இதன் மூலம், உலகக் கோப்பை தொடக்க ஆட்டத்தில் இரண்டு வீரர்கள் சிவப்பு அட்டை பெற்று வெளியேற்றப்பட்ட இரண்டாவது அணி என்ற மோசமான சாதனையை தென்னாப்பிரிக்கா பெற்றது .முன்னதாக 1990-ல் அர்ஜென்டினாவுக்கு எதிரான போட்டியில் கேமரூன் அணி இந்த நிலையைச் சந்தித்தது.
10 வீரர்களுடன் முடித்த மெக்சிகோ
ஆட்டத்தின் கூடுதல் நேரத்தில், தென்னாப்பிரிக்காவின் கோல் வாய்ப்பைத் தடுத்ததற்காக மெக்சிகோ வீரர் சீசர் மான்டெஸ் என்பவருக்கும் ஸ்ட்ரெய்ட் ரெட் கார்டு காட்டப்பட்டது.
இதனால் மெக்சிகோ அணியும் 10 வீரர்களாகக் குறைந்தது. இறுதியில் 10 மெக்சிகோ வீரர்களும், 9 தென்னாப்பிரிக்க வீரர்களும் களத்தில் இருந்த நிலையில் ஆட்டம் முடிவுக்கு வந்தது. உலகக் கோப்பை வரலாற்றில் தொடக்க ஆட்டத்தில் 3 சிவப்பு அட்டைகள் காட்டப்பட்டது இதுவே முதல் முறையாகும். இந்தப் போட்டியில் தென்னாப்பிரிக்காவின் டெபோஹோ மொகோயினா, கோசினாதி சிபிசி ஆகியோருக்கும் மெக்சிகோவின் பிரையன் குட்டிரெஸுக்கு மஞ்சள் அட்டைகள் காட்டப்பட்டன.
Group A பிரிவில் மெக்சிகோ 3 புள்ளிகளுடன் தனது கணக்கைத் தொடங்கியுள்ளது. தனது அடுத்த போட்டியில் ஜூன் 18 அன்று தென்கொரியாவை எதிர்கொள்கிறது.
இதேபோல் தென்னாப்பிரிக்கா அணி, ஜூன் 18 அன்று செக் குடியரசு அணியை எதிர்கொள்கிறது. இதில் தோற்றால் அடுத்த சுற்றுக்குச் செல்லும் வாய்ப்பு அந்த அணிக்கு மிகவும் கடினமாகிவிடும்.
