உக்ரைன் மீது ரஷ்யா நடத்திய இரவு நேர ட்ரோன் மற்றும் ஏவுகணைத் தாக்குதல்களில் கீவ் உள்ளிட்ட பல பகுதிகளில் 3 பேர் உயிரிழந்தனர். தலைநகர் கீவ் தொடர்ந்து இரண்டாவது நாளாக சக்திவாய்ந்த தாக்குதலுக்கு உள்ளானது.
நள்ளிரவுக்குப் பிறகு கீவ் நகரில் பலத்த வெடிச் சத்தங்கள் கேட்டதாகவும், அதன் பின்னரே வான்வழி தாக்குதல் எச்சரிக்கை விடுக்கப்பட்டதாகவும் அதிகாரிகள் தெரிவித்தனர். பொதுவாக தாக்குதலுக்கு முன்பே எச்சரிக்கை விடுக்கப்படும் நிலையில், இந்த முறை வெடிப்புகளுக்குப் பிறகு எச்சரிக்கை வெளியானது குறிப்பிடத்தக்கது.
உக்ரைனின் கார்கிவ் நகரில் நடந்த தொடர் தாக்குதல்களில் 2 பேர் உயிரிழந்ததுடன், 20 பேர் காயமடைந்தனர் என்று அந்த நகரின் மேயர் இகோர் தெரெகோவ் தெரிவித்தார்.
உக்ரைன் விமானப்படை வெளியிட்ட தகவலின்படி, ரஷ்யா ஒரே இரவில் 169 நீண்ட தூர தாக்குதல் ட்ரோன்கள் மற்றும் 7 ஏவுகணைகளை ஏவியது. இதில் 5 பாலிஸ்டிக் ஏவுகணைகளும் அடங்கும். உக்ரைன் வான் பாதுகாப்புப் படைகள் 139 ட்ரோன்களை சுட்டு வீழ்த்தியோ அல்லது செயலிழக்கச் செய்தோ தடுத்ததாகவும், 2 ரேடார் எதிர்ப்பு ஏவுகணைகள் இலக்கை அடையவில்லை என்றும் தெரிவிக்கப்பட்டது. இருப்பினும், 5 பாலிஸ்டிக் ஏவுகணைகளும், 20 ட்ரோன்களும் 15 இடங்களில் தாக்குதலை மேற்கொண்டதாக உக்ரைன் தெரிவித்துள்ளது.
மறுபுறம், கீவில் உள்ள ஆயுத உற்பத்தி மையங்கள் மீது தாக்குதல் நடத்தியதாக ரஷ்ய பாதுகாப்பு அமைச்சகம் தெரிவித்துள்ளது. குறிப்பாக, ‘Flamingo’ குரூஸ் ஏவுகணைக்கான உதிரிபாகங்கள் தயாரிக்கும் தொழிற்சாலை மற்றும் நடுத்தர, நீண்ட தூர ட்ரோன்கள் ஒன்றுசேர்க்கப்படும் மையம் குறிவைத்து தாக்கப்பட்டதாக ரஷ்யா கூறியுள்ளது.
ரஷ்ய பாதுகாப்பு அமைச்சகத்தின் தகவலின்படி, செவ்வாய்க்கிழமை இரவு முதல் புதன்கிழமை அதிகாலை வரை உக்ரைன் ஏவிய 415 ட்ரோன்கள் ரஷ்ய வான் பாதுகாப்புப் படைகளால் சுட்டு வீழ்த்தப்பட்டன.
ரஷ்யாவின் சரடோவ் பிராந்திய ஆளுநர் ரோமன் புசார்கின் கூறுகையில், உக்ரைன் நடத்திய ட்ரோன் தாக்குதலில் ஒருவர் உயிரிழந்ததுடன், பலர் காயமடைந்தனர். மேலும், சில தொழிற்சாலைகளும் சேதமடைந்ததாக தெரிவித்தார்.
உக்ரைன் அதிபர் வோலோடிமிர் செலென்ஸ்கி, ரஷ்யாவின் சரடோவ், டாடர்ஸ்தான், பாஷ்கோர்டோஸ்தான் மற்றும் வொரோனெஷ் உள்ளிட்ட பகுதிகளில் உக்ரைன் நீண்ட தூர தாக்குதல்களை நடத்தியதாக தெரிவித்தார். சரடோவ் மற்றும் டாடர்ஸ்தானில் உள்ள எண்ணெய் சுத்திகரிப்பு நிலையங்கள் தாக்கப்பட்டதாகவும் அவர் கூறினார்.
