தவெக அமைச்சரவையில் விடுதலை சிறுத்தைகள் கட்சி இடம்பெற்றதை விமர்சித்து சமூக வலைதளத்தில் திமுக எம்.பி. ராசா பதிவிட்ட கவிதை கடும் விமர்சனங்களையும் கண்டனங்களையும் எதிர்கொண்ட நிலையில், அதனை பின்னர் நீக்கினார்.
இந்த நிலையில், கடந்த காலங்களில் திமுகவுக்கு தங்கள் கட்சி எந்த அளவுக்கு திமுகவுக்கு உறுதுணையாக இருந்தது என்பதை விளக்கி விடுதலை சிறுத்தைகள் கட்சி, தனது சமூக வலைத்தள பக்கத்தில் பதிவிட்டுள்ளது.
கலைஞர் மறைவுக்குப் பின்…
தலைவர் கலைஞர் மறைந்து, மு.க.ஸ்டாலின் அவர்கள் தலைமைப் பொறுப்பை ஏற்ற அந்த இக்கட்டான காலகட்டத்தில், அவர்தான் தமிழ்நாட்டின் அடுத்த முகவரியாக வர வேண்டும் என்று முதன்முதலில் பொதுமேடைகளில் முழங்கியவர் நம் தலைவர் எழுச்சித் தமிழர் திருமாவளவன். திமுகவின் தலைமை மாற்றத்தின் போது தார்மீக பலமாய் நின்றது விசிக!
2019 நாடாளுமன்றத் தேர்தல்: தனிச்சின்னம் துணிச்சல்!
2019-ல் திமுக கூட்டணிக்கு மிகப்பெரிய பலமே விசிக-வின் வாக்கு வங்கிதான். கூட்டணி தர்மத்திற்காக, திமுகவின் உதயசூரியன் சின்னத்தில் போட்டியிடாமல், ‘பானை’ சின்னத்தை வாங்கி, தேர்தல் களத்தில் விசிக காட்டிய உழைப்புதான் 38 தொகுதிகளில் திமுக கூட்டணி வெல்ல அஸ்திவாரமிட்டது.
2021 சட்டமன்றத் தேர்தல்: ஸ்டாலின் முதல்வராக விசிக உழைப்பு!
மு.க.ஸ்டாலின் அவர்கள் முதலமைச்சராக அரியணை ஏறுவதற்குக் காரணமே வட மாவட்டங்களிலும், மத்திய மாவட்டங்களிலும் விசிகவின் வாக்குகள் அப்படியே திமுகவுக்குப் போய் சேர்ந்ததுதான்.
6 தொகுதிகள் மட்டுமே ஒதுக்கப்பட்ட போதிலும், “பாசிசத்தை வீழ்த்த வேண்டும், ஸ்டாலின் முதல்வராக வேண்டும்” என்ற ஒற்றை நோக்கோடு சிறுத்தைகள் இரத்தம் சிந்தி உழைத்தனர்.
விசிக போட்டியிட்ட 6-ல் 4 தொகுதிகளில் தனிச்சின்னத்தில் நின்று வென்று, திமுகவின் வெற்றிக்கு அரணாக நின்றது!
சனாதன எதிர்ப்புப் போர் – திமுகவுக்குக் கிடைத்த கேடயம்!
பாஜக மற்றும் சனாதன சக்திகள் திமுக அரசைத் தீவிரமாகத் தாக்கிய போதெல்லாம், அதற்கு முதன்முதலில் களத்தில் நின்று அறிவுப்பூர்வமாகவும் ஆக்ரோஷமாகவும் பதிலடி கொடுத்தது விசிக தான். திமுக அரசுக்கு அரசியல் ரீதியாக எழும் நெருக்கடிகளுக்கெல்லாம் தத்துவார்த்த கேடயமாக நின்றவர் தலைவர் திருமாவளவன்!
வாக்கு மட்டும் எங்களுடையது, ஆட்சிப் பீடம் மட்டும் உங்களுடையதா?
திமுகவின் மிகக் கடினமான நேரங்களில் அரணாக நின்ற விசிக, இன்று “அதிகாரத்தில் பங்கு” என்ற தன் கொள்கைக்காக தவெக-வோடு கரம் கோர்த்ததும் உங்களுக்கு வலிக்கிறதா?
கூட்டணிக் கட்சிகளை வெறும் ‘வாக்கு வங்கி’ ஏணியாக நினைத்த உங்களின் சுயநல அரசியலுக்கு வரலாறு மிக விரைவில் பாடம் புகட்டும்! எனப் பதிவிடப்பட்டுள்ளது.
