தமிழ்நாடு அரசு பழங்குடியினர் சமூகத்திற்கு வழங்கும் பல்வேறு சலுகைகளை முறைகேடாக பயன்படுத்த முயன்றவர்கள் மீது கடும் நடவடிக்கை எடுத்துள்ளது. 2018ஆம் ஆண்டு ஜனவரி முதல் 2026 மே 26 வரை வழங்கப்பட்ட காணிக்காரன் அல்லது காணிக்கர் சமூக சான்றிதழ்கள் குறித்து மாவட்ட ஆட்சியர்களுக்கு அரசு உத்தரவு பிறப்பித்துள்ளது.
காணிக்காரன், காணிக்கர் பழங்குடியினர் சமூகத்தினர் கன்னியாகுமரி மாவட்டம் மற்றும் தென்காசி மாவட்டத்தின் செங்கோட்டை, அம்பாசமுத்திரம் பகுதிகளில் மட்டுமே வாழ்ந்து வருகின்றனர். இந்நிலையில், சென்னை, செங்கல்பட்டு, கடலூர், கள்ளக்குறிச்சி, காஞ்சிபுரம், மதுரை, இராமநாதபுரம், திருவாரூர், வேலூர், விழுப்புரம் உள்ளிட்ட பல்வேறு மாவட்டங்களில் 954 பேருக்கு இந்த சமூகத்தைச் சேர்ந்தவர்கள் என்ற அடிப்படையில் பழங்குடியினர் சான்றிதழ்கள் வழங்கப்பட்டுள்ளது கண்டுபிடிக்கப்பட்டுள்ளது.
இதுகுறித்து சமூகநீதி மற்றும் சமூகநலத் துறை செயலாளர் டாக்டர் சுப்பையன் மாவட்ட ஆட்சியர்களுக்கு சுற்றறிக்கை அனுப்பி விசாரணை நடத்த உத்தரவிட்டுள்ளார். பழங்குடியினர் சமூகத்தினருக்கு கல்வி மற்றும் வேலைவாய்ப்பில் அரசு ஏராளமான சலுகைகளை வழங்கி வருகிறது. உயர் கல்வி நிறுவனங்களில் தனி இட ஒதுக்கீடு, பள்ளி மற்றும் கல்லூரி மாணவர்களுக்கு கல்வி உதவித் தொகை, ஊக்கத் தொகை ஆகியவை வழங்கப்படுகின்றன.
ஏகலைவா மாதிரி பள்ளிகள், அரசு பழங்குடியினர் நல உறைவிடப் பள்ளிகள் மூலம் இலவச தங்குமிட வசதியுடன் கல்வி வழங்கப்படுகிறது. அரசுப் பணிகளில் இட ஒதுக்கீடு, வயது வரம்பில் தளர்வு, போட்டித் தேர்வுகளுக்கு இலவச பயிற்சி மற்றும் உதவித் தொகை உள்ளிட்ட பல சிறப்பு சலுகைகள் உள்ளன. இந்த சலுகைகளைப் பெறுவதற்காகவே பலர் முறைகேட்டில் ஈடுபட்டதாக புகார்கள் எழுந்தன.
இதனையடுத்து, அரசு கடும் நடவடிக்கை எடுத்துள்ளது. கன்னியாகுமரி மற்றும் தென்காசி மாவட்டத்தின் குறிப்பிட்ட பகுதிகளைத் தவிர பிற மாவட்டங்களில் வழங்கப்பட்ட சான்றிதழ்கள் எந்த அடிப்படையில் வழங்கப்பட்டன என்பதை ஆட்சியர்கள் விசாரிக்க வேண்டும். முறைகேடு இருந்தால் உடனடியாக சான்றிதழ்களை ரத்து செய்து, எடுக்கப்பட்ட நடவடிக்கைகள் குறித்த அறிக்கையை அரசுக்கு சமர்ப்பிக்க உத்தரவு வழங்கப்பட்டுள்ளது.
இந்த நடவடிக்கை உண்மையான பழங்குடியினர் சமூகத்தினரின் உரிமைகளைப் பாதுகாக்கும் என்றும், சலுகைகளை முறைகேடாக பயன்படுத்த முயல்பவர்களுக்கு எச்சரிக்கையாக அமையும் என்றும் அரசு வட்டாரங்கள் தெரிவிக்கின்றன. மாவட்ட ஆட்சியர்கள் விரைவில் விசாரணையை முடித்து அறிக்கை அளிப்பார்கள் என எதிர்பார்க்கப்படுகிறது. இந்த நடவடிக்கை தமிழகத்தில் சாதி சான்றிதழ் வழங்கல் அமைப்பில் வெளிப்படைத்தன்மையை அதிகரிக்கும் எனக் கருதப்படுகிறது.
