மகளிருக்கு மாதம் ரூ.2,500 உள்ளிட்ட திட்டங்கள் படிப்படியாக நிறைவேற்றப்படும் என்று வருவாய்த் துறை அமைச்சர் செங்கோட்டையன் விளக்கமளித்துள்ளார்.
கோவையில் செய்தியாளர்களிடம் பேசிய அவர், “கடந்த 8 மாத காலமாகத் தேர்தல் களம் உள்ளிட்ட பல்வேறு கடுமையான உழைப்பிற்குப் பிறகு, வழக்கமான உடல் பரிசோதனைக்காக மருத்துவமனையில் அனுமதி பெற்றிருந்தேன். ஆண்டுக்கு இருமுறை உடல் பரிசோதனை செய்வது எனது வழக்கம். அந்த வகையில், ‘மாஸ்டர் செக்-அப்’ அடிப்படையில் மருத்துவமனையில் தங்கி அனைத்துப் பரிசோதனைகளும் செய்து முடிக்கப்பட்டுள்ளது. எனது உடல்நிலை குறித்த அனைத்துப் பரிசோதனை முடிவுகளும் சரியாக இருப்பதாக மருத்துவமனை நிர்வாகம் ஒப்புதல் அளித்துள்ளது. தற்போது, விரைந்து அடுத்தகட்டப் பணிகளை மேற்கொள்வதற்காகச் சென்னைக்குச் சென்று கொண்டிருக்கிறேன் என்றார்.
அரசு மருத்துவமனைக்குச் செல்லாமல் தனியார் மருத்துவமனையில் சிகிச்சை பெற்றது குறித்த கேள்விக்கு பதிலளித்த அவர், “என்னைப்பொறுத்தவரை இது எனது உறவினரின் மருத்துவமனை. நான் எப்போதும் இங்கே தான் சிகிச்சை பெறுவது வழக்கம். இங்கு வந்தால் ஓய்வு எடுப்பதும் அங்குதான், அந்த முறையைத்தான் இப்போதும் பின்பற்றியுள்ளேன். உறவினர் மருத்துவமனை என்பதால் எனக்கு அங்கு அனைத்தும் இலவச சலுகையாகக் கிடைக்கிறது. எனவே, வேறு மருத்துவமனைக்குச் சென்று சிகிச்சை பெற வேண்டிய நிலை எனக்கு இல்லை. நான் வரும்போதெல்லாம் இங்கே தங்கிச் செல்வது தொடர்ந்து நடைபெறும் ஒரு நிகழ்வு தான்” என்று விளக்கமளித்தார்.
தொடர்ந்து பேசிய அவர், கோவை சிறுமி கொலை வழக்கு குறித்துக் காவல்துறை மேற்கு மண்டலத் தலைவர் (IG) தெளிவாக விளக்கியுள்ளார். இது தொடர்பாகச் சட்டத்துறையும், முதலமைச்சரும் தகுந்த உத்தரவுகளை வழங்கியுள்ளனர் என்றார்.
‘மகளிர் விடியல் பயணம்’ திட்டம் எப்போது துவங்கும் என்ற செய்தியாளர்களின் கேள்விக்கு, “திமுக ஆட்சியில் இந்தத் திட்டத்தை எப்படி வழங்கினார்கள், எத்தனை ஆண்டுகள் கழித்து வழங்கினார்கள் என்பது உங்களுக்கே தெரியும். ஒவ்வொரு திட்டங்களையும் படிப்படியாக வழங்குவதற்கு, அரசின் நிதி நிலைக்கு ஏற்பவே அரசு நடவடிக்கை எடுக்கும். இது முதலமைச்சர் முடிவு செய்ய வேண்டிய ஒன்று. இந்தத் கேள்வியை என்னிடம் கேட்பது சரியாக இருக்காது. திட்டங்கள் குறித்து முதல்வர் தான் உரியக் காலங்களில் எப்படிச் செய்ய வேண்டும் என்பதை முடிவு செய்வார்” என்று விளக்கமளித்தார்,
