மேற்கு ஆசிய பிராந்தியத்தில் தொடர்ந்து நீடித்து வரும் போர் பதற்றங்களுக்கு மத்தியில், குஜராத் மாநிலத்திற்கு கச்சா எண்ணெய் ஏற்றி வந்த வணிகக் கப்பல் மீது நடத்தப்பட்ட தாக்குதலுக்கு இந்தியா தனது கடும் கண்டனத்தைப் பதிவு செய்துள்ளது. இந்தத் தாக்குதல் சர்வதேச கடல்வழிப் போக்குவரத்தின் பாதுகாப்பிற்கு விடப்பட்ட சவாலாகக் கருதும் இந்தியா, மோதல் போக்குகளில் ஈடுபடும் நாடுகள் சர்வதேச விதிகளுக்கு உட்பட்டு செயல்பட வேண்டும் என அறிவுறுத்தியுள்ளது. குறிப்பாக, பொருளாதார முக்கியத்துவம் வாய்ந்த கடல்சார் பாதைகளில் இத்தகைய அச்சுறுத்தல்கள் நிலவுவது உலகளாவிய வர்த்தகத்தைப் பாதிக்கும் என கவலை தெரிவித்துள்ளது.
மத்திய வெளியுறவுத்துறை அமைச்சகம் வெளியிட்டுள்ள அறிக்கையில், தற்போதைய பதற்றமான சூழலில் வணிகக் கப்பல்களை ராணுவ இலக்குகளாக மாற்றுவது முற்றிலும் தவிர்க்கப்பட வேண்டிய ஒன்று என வலியுறுத்தியுள்ளது. “வணிகக் கப்பல் போக்குவரத்து என்பது உலகப் பொருளாதாரத்தின் உயிர்நாடி; அதனை ஆயுத மோதல்களுக்கு இலக்காக மாற்றக்கூடாது” என்று இந்தியா ஆணித்தரமாகக் கூறியுள்ளது. மேலும், கடல்சார் வர்த்தக சுதந்திரம் என்பது அனைத்து நாடுகளின் அடிப்படை உரிமை என்றும், அதனைத் தடுக்கும் எந்தவொரு முயற்சியும் ஏற்றுக்கொள்ளப்பட மாட்டாது என்றும் தெரிவிக்கப்பட்டுள்ளது.
இந்த விவகாரத்தில் அப்பாவி பொதுமக்களின் உயிருக்கு ஆபத்து ஏற்படுவதையும், கடல்சார் ஊழியர்களின் பாதுகாப்பை அச்சுறுத்துவதையும் இந்தியா வன்மையாகக் கண்டித்துள்ளது. போர் அல்லது மோதல்களின் பெயரால் அப்பாவி மக்களைப் பலிகடா ஆக்குவதை எந்த வகையிலும் ஏற்க முடியாது என்று கூறியுள்ள இந்தியா, சம்பந்தப்பட்ட தரப்பினர் உடனடியாகத் தாக்குதல்களை நிறுத்திவிட்டு அமைதிப் பேச்சுவார்த்தையின் மூலம் தீர்வு காண வேண்டும் என வலியுறுத்தியுள்ளது. இத்தகைய தாக்குதல்கள் தொடர்ந்தால், அது எரிபொருள் விலையேற்றம் மற்றும் சர்வதேசப் பொருளாதாரச் சிக்கல்களுக்கு வழிவகுக்கும் என்றும் எச்சரித்துள்ளது.
