கனடா பிரதமர் மார்க் கார்னி வரும் பிப்ரவரி 26-ம் தேதி இந்தியாவுக்குப் பயணம் மேற்கொள்ள உள்ள நிலையில், 2008 மும்பை பயங்கரவாதத் தாக்குதலில் தொடர்புடைய முக்கியக் குற்றவாளியான தஹவூர் ஹுசைன் ரானாவின் கனடா குடியுரிமையை ரத்து செய்வதற்கான நடவடிக்கைகளை கனடா அரசாங்கம் தொடங்கியுள்ளது. 26/11 தாக்குதலில் லஷ்கர்-இ-தொய்பா அமைப்பிற்கு உதவியதாகக் குற்றம் சாட்டப்பட்டுள்ள 65 வயதான ரானா, தற்போது இந்தியப் புலனாய்வு அமைப்புகளின் கட்டுப்பாட்டில் டெல்லியில் சிறையில் உள்ளார். இந்த தாக்குதலில் 160 க்கும் மேற்பட்டோர் கொல்லப்பட்டனர்.
ரானா கடந்த 1997-ம் ஆண்டு கனடாவிற்கு குடிபெயர்ந்து 2001-ல் அந்நாட்டின் குடியுரிமையைப் பெற்றார். ஆனால், அவர் தனது குடியுரிமை விண்ணப்பத்தின் போது தவறான தகவல்களை வழங்கியதாக கனடாவின் குடிவரவு மற்றும் குடியுரிமைத் துறை (IRCC) தெரிவித்துள்ளது. அவர் கனடாவில் வசித்த கால அளவைக் குறித்து பொய்யான தகவல்களைத் தந்துள்ளதாகவும், விண்ணப்பத்தில் குறிப்பிட்ட காலங்களில் அவர் கனடாவில் தங்கியிருக்கவில்லை என்றும் விசாரணையில் தெரியவந்துள்ளது. குறிப்பாக, அவர் கனடாவில் இருப்பதாகக் கூறிய காலத்தில் அமெரிக்காவின் சிகாகோவில் தங்கியிருந்து வியாபாரம் செய்ததாக ராயல் கனடியன் மவுண்டட் போலீஸ் கண்டுபிடித்துள்ளது. இருப்பினும், இந்த ரத்து பயங்கரவாத குற்றச்சாட்டுகளுடன் தொடர்புடையது அல்ல என்று கூறப்படுகிறது. மாறாக, ரானா தவறான தகவல்கள் மூலம் குடியுரிமை பெற்றதாக அந்தத் துறை கூறுகிறது.
இந்த விவகாரம் தற்போது கனடா ஃபெடரல் நீதிமன்றத்தின் பரிசீலனைக்குச் சென்றுள்ளது. ரானா மோசடி செய்து குடியுரிமையைப் பெற்றாரா என்பதை நீதிமன்றம் தீர்மானிக்கும். கனடா குடியுரிமையின் கண்ணியத்தைக் காக்க இத்தகைய நடவடிக்கைகள் அவசியம் என்று அந்நாட்டு அரசு விளக்கமளித்துள்ளது. இதற்கிடையில், கடந்த ஏப்ரல் 2025-ல் அமெரிக்காவிலிருந்து இந்தியாவிடம் ஒப்படைக்கப்பட்ட ரானா மீது மும்பை தாக்குதல் தொடர்பான வழக்கு விசாரணைகள் இந்தியாவில் தீவிரமாக நடைபெற்று வருகின்றன என்பது குறிப்பிடத்தக்கது.
