நெடுஞ்சாலைத்துறை டெண்டர் ஒதுக்கீட்டில் ரூ.3.23 கோடி முறைகேடு நடைபெற்றதாக முன்னாள் நெடுஞ்சாலைத்துறை அமைச்சர் எ.வ.வேலு, அரசு அதிகாரிகள் 9 பேர் மற்றும் தனியார் ஒப்பந்ததாரர் ஒருவர் மீது லஞ்ச ஒழிப்புத்துறை வழக்குப்பதிவு செய்தது. “அறப்போர் இயக்கம்” ஒருங்கிணைப்பாளர் ஜெயராம் வெங்கடேசன் அளித்த புகாரின் அடிப்படையில் இந்த வழக்கு பதிவு செய்யப்பட்டது.
இதையடுத்து கடந்த ஜூன் 25-ஆம் தேதி சென்னை, திருவண்ணாமலை, கரூர், திண்டுக்கல், கோவை, திருப்பூர் உள்ளிட்ட மாவட்டங்களில் மொத்தம் 20 இடங்களில் லஞ்ச ஒழிப்புத்துறை அதிகாரிகள் சோதனை மேற்கொண்டனர். அப்போது நெடுஞ்சாலைத்துறை தொடர்பான முக்கிய ஆவணங்கள், டிஜிட்டல் சான்றுகள், சொத்து தொடர்பான ஆவணங்கள் உள்ளிட்டவை கைப்பற்றப்பட்டதுடன், ரூ.40 லட்சம் ரொக்கமும் பறிமுதல் செய்யப்பட்டதாக லஞ்ச ஒழிப்புத்துறை தெரிவித்தது.
இதன் தொடர்ச்சியாக கைப்பற்றப்பட்ட ஆவணங்கள் மற்றும் புகார்தாரர் அளித்த தகவல்களின் அடிப்படையில் விசாரணைக்காக எ.வ.வேலுவுக்கு கடந்த 3 ஆம் தேதி நேரில் ஆஜராகி விளக்கம் அளிக்க முதல் சம்மன் அனுப்பப்பட்டது. அதன்படி ஆஜராக வேண்டிய நாளில், சிங்கப்பூரில் உள்ள மருத்துவமனையில் இருதய சிகிச்சை பெற்று வருவதால் நேரில் ஆஜராக இயலாது என்றும், சிகிச்சை முடிந்ததும் விசாரணைக்கு முழு ஒத்துழைப்பு அளிப்பதாகவும் அவர் வழக்கறிஞர்கள் மூலம் விளக்க மனு தாக்கல் செய்து கால அவகாசம் கோரியிருந்தார்.
இந்த நிலையில், இன்று மீண்டும் ஆதரவாக வேண்டும் என லஞ்ச ஒழிப்புத்துறை இரண்டாவது முறையாக சம்மன் அனுப்பியதைத் தொடர்ந்து, கடந்த மூன்று நாட்களுக்கு முன்னால் சிங்கப்பூரில் சிகிச்சை பெற்று வந்த முன்னாள் அமைச்சர் எ.வ.வேலு சென்னை திரும்பி இருந்தார் அப்போது லஞ்ச ஒழிப்பு துறை விசாரணைக்கு முழு ஒத்துழைப்பு கொடுப்பேன் எனக்கு நீதி கிடைக்கும் என பேசி இருந்தார்.
இந்த நிலையில் இன்று காலை முன்னாள் அமைச்சர் எ.வ.வேலு இன்று சென்னை ஆலந்தூரில் உள்ள லஞ்ச ஒழிப்புத்துறை தலைமை அலுவலகத்தில் நேரில் ஆஜராகியுள்ளார். அவரிடம் டெண்டர் ஒதுக்கீடு, நிதி பரிவர்த்தனைகள், கைப்பற்றப்பட்ட ஆவணங்கள், டிஜிட்டல் ஆதாரங்கள் உள்ளிட்ட பல்வேறு அம்சங்கள் குறித்து அதிகாரிகள் விரிவாக விசாரணை நடத்தி வருகின்றனர்.
விசாரணையின் அடிப்படையில் அடுத்தகட்ட நடவடிக்கைகள் குறித்து லஞ்ச ஒழிப்புத்துறை அதிகாரிகள் முடிவு எடுக்க உள்ளதாக தகவல்கள் தெரிவிக்கின்றன.
