திராவிடர் கழகத் தலைவர் கி. வீரமணியின் 93வது பிறந்தநாளையொட்டி, அவரை நேரில் சந்தித்து முதலமைச்சர் மு.க. ஸ்டாலின் வாழ்த்துக்களைத் தெரிவித்தார்.
திராவிடர் கழகத் தலைவர் கி. வீரமணி தனது 93வது பிறந்தநாளைக் கொண்டாடினார். இதையொட்டி சென்னையில் உள்ள அவரின் இல்லத்திற்கு முதலமைச்சரும், திமுக தலைவருமான ஸ்டாலின் நேரில் சென்று தனது வாழ்த்தை தெரிவித்தார்.
இதையடுத்து எக்ஸ் பக்கத்தில் அவருக்கு வாழ்த்து தெரிவித்து ஸ்டாலின் பதிவுகளை வெளியிட்டார். அதில், “தொடரட்டும் ஆசிரியர் அய்யாவின் தொண்டறம்! தமிழ் மக்கள் நலமே தமது நலமாய், சமூகநீதி காப்பதே தன் வாழ்க்கைக் கடமையாய்ச் செயல்படும் மூப்பினை வென்ற மூவாப் போராளி கி. வீரமணி அய்யா அவர்களுக்குப் பிறந்தநாள் வாழ்த்துகள்.
பெரியார் திடலும் – அண்ணா அறிவாலயமும் இணைந்து விரட்ட வேண்டிய பல ஆபத்துகள் தமிழ்நாட்டைச் சுற்றி வட்டமடித்துக் கொண்டே இருக்கின்றன. பெரியாரியத் தடியும், பேரறிஞரின் மதியும், முத்தமிழறிஞரிடம் கற்ற உழைப்பும் கொண்டு #DravidianModel நல்லாட்சி நிலைக்கச் செய்வோம், ஆசிரியர் அய்யாவின் அறிவுரைகளோடு தமிழ்நாட்டைத் தொடர்ந்து காப்போம்!” என தெரிவித்திருந்தார்.
