நாக்பூரில் உள்ள விதர்பா கிரிக்கெட் சங்க மைதானத்தில் நடைபெற்ற முதல் டி20 போட்டியில் நியூசிலாந்தை வீழ்த்தி, இந்திய அணி தொடரைச் சிறப்பாகத் தொடங்கியது. டாஸ் தோற்று முதலில் பேட் செய்த இந்திய அணி, அதிரடியாக 239 ரன்கள் குவித்தது. 240 ரன்கள் எடுத்தால் வெற்றி என்ற இலக்குடன் களமிறங்கிய நியூசிலாந்து அணி, 7 விக்கெட் இழப்பிற்கு 190 ரன்கள் மட்டுமே எடுக்க முடிந்தது. இதன் விளைவாக, இந்தியா 48 ரன்கள் வித்தியாசத்தில் வெற்றி பெற்றது. இந்த வெற்றியில் ஐந்து இந்திய வீரர்கள் முக்கியப் பங்கு வகித்தனர்.
அபிஷேக் ஷர்மா இந்திய இன்னிங்ஸைத் தொடங்கிய விதம் போட்டிக்கு ஒரு சிறந்த தொடக்கத்தை அமைத்துக் கொடுத்தது. 240 என்ற ஸ்ட்ரைக் ரேட்டில் விளையாடிய அபிஷேக், வெறும் 35 பந்துகளில் 84 ரன்கள் எடுத்தார். அவரது இன்னிங்ஸில் 8 சிக்ஸர்களும் 5 பவுண்டரிகளும் அடங்கும். அபிஷேக் ஆட்ட நாயகனாகவும் தேர்ந்தெடுக்கப்பட்டார். அவரது அதிரடி பேட்டிங் இந்தியாவின் பெரிய ஸ்கோருக்கு அடித்தளமாக அமைந்தது.
பந்துவீச்சில், அர்ஷ்தீப் சிங் ஆரம்பத்திலேயே விக்கெட்டுகளை வீழ்த்தி நியூசிலாந்து அணிக்கு நெருக்கடி கொடுத்தார். ஆட்டத்தின் முதல் ஓவரிலேயே ஒரு ரன் மட்டுமே கொடுத்து ஒரு விக்கெட்டை வீழ்த்தினார். பவர் பிளேயில் அவர் வீசிய இரண்டு ஓவர்களில் வெறும் 13 ரன்கள் மட்டுமே விட்டுக்கொடுத்தார். அர்ஷ்தீப்பின் துல்லியமான லைன் மற்றும் லென்த் பந்துவீச்சிற்கு எதிராக நியூசிலாந்து பேட்ஸ்மேன்கள் திணறினர்.
ஹர்திக் பாண்டியா மீண்டும் ஒருமுறை தனது ஆல்-ரவுண்டர் பங்கை சிறப்பாக வெளிப்படுத்தினார். பேட்டிங்கில், 16 பந்துகளில் 25 ரன்கள் எடுத்து அணியை வலுப்படுத்தினார். பின்னர், பந்துவீச்சில், தனது முதல் ஓவரிலேயே சிக்கனமாகப் பந்துவீசி ஒரு முக்கியமான விக்கெட்டையும் கைப்பற்றினார். இந்த போட்டியில் அவரது அனுபவம் தெளிவாகத் தெரிந்தது.
அக்சர் படேல் சற்று அதிக ரன்களை விட்டுக்கொடுத்திருந்தாலும், அவர் போட்டியின் திருப்புமுனையாக அமைந்த விக்கெட்டை வீழ்த்தினார். ஆக்ரோஷமாக ரன்கள் குவித்து, ஆட்டத்தை நியூசிலாந்துக்குச் சாதகமாகத் திருப்பிக்கொண்டிருந்த கிளென் பிலிப்ஸை அவர் ஆட்டமிழக்கச் செய்தார். பிலிப்ஸ் 40 பந்துகளில் 78 ரன்கள் எடுத்து ஆட்டமிழந்தார்.
மேலும் இந்த போட்டியில் அணியாக மட்டுமின்றி கேப்டன் சூர்யகுமார் யாதவ், அபிஷேக் சர்மா ஆகியோர் பல ரெக்கார்டுகளை படைத்துள்ளனர். டி20 கிரிக்கெட்டில் 9,000 ரன்களை கடந்த 4வது இந்திய வீரர் சூர்யகுமார் யாதவ். டி20 கிரிக்கெட்டில் வேகமாக, 5,000 ரன்களை கடந்த வீரர் அபிஷேக் சர்மா (2,898 பந்துகளில்). டி20 கிரிக்கெட்டில் 25 அல்லது குறைவான பந்துகளில் அதிகமுறை அரைசதம்-அபிஷேக் சர்மா(8 முறை). டி20 கிரிக்கெட்டில் நியூசிலாந்துக்கு எதிரான ஒரு இன்னிங்ஸில் அதிக சிக்ஸர்கள் பட்டியலில் 2வது இடம்- அபிஷேக் சர்மா (8 சிக்ஸர்கள்).
