23-வது உலகக் கோப்பை கால்பந்து தொடர் அமெரிக்கா, மெக்சிகோ மற்றும் கனடாவில் நடைபெற்று வருகிறது. 48 அணிகள் பங்கேற்றுள்ள இப்போட்டியில், இன்று காலை 3.30 மணிக்கு போஸ்டனில் ‘ஐ’ பிரிவு லீக் ஆட்டத்தில் ஈராக் மற்றும் நார்வே அணிகள் பலப்பரீட்சை நடத்தின. போட்டி ஆரம்பித்த 29வது நிமிடத்தில் நார்வே நட்சத்திர வீரர் எர்லிங் ஹாலண்ட் கோல் அடித்து அணிக்கு 1-0 என்ற முன்னிலையை பெற்றுத்தந்தார்.
தொடர்ந்து 39வது நிமிடத்தில் ஈராக் அணியின் அய்மன் ஹூசைன் கோல் அடித்து ஆட்டத்தை 1-1என சமநிலைக்கு கொண்டு வந்தார். முதல் பாதி முடிவடைவதற்கு முன்பாக, 43-வது நிமிடத்தில் எர்லிங் ஹாலண்ட் தனது இரண்டாவது கோலை பதிவு செய்து நார்வே அணியை 2-1 என்ற கணக்கில் முன்னிலைக்கு கொண்டு சென்றார். இதன் மூலம் முதல் பாதி முடிவில் நார்வே முன்னிலையில் இருந்தது.
இரண்டாம் பாதியிலும் அதிகாரம் செலுத்திய நார்வே அணி, 76வது நிமிடத்தில் 3-1என்ற கோல் கணக்கில் முன்னேறிய நிலையில், இறுதியில் 4-1 என்ற கோல் கணக்கில் நார்வே அணி தனது முதல் வெற்றியை பதிவு செய்தது. இந்த வெற்றியின் மூலம் நார்வே அணி 3 புள்ளிகளுடன் ’ஐ’ பிரிவில் முதலிடத்தில் உள்ளது.
